'ಬಿಗ್ ಬಾಸ್ ಕನ್ನಡ 13' ಕಾರ್ಯಕ್ರಮ ಪ್ರಸಾರವಾಗಲು ದಿನಗಣನೆ ಆರಂಭವಾಗಿದ್ದು, ಬಿಗ್ ಬಾಸ್ ಮನೆಯೊಳಗೆ ನಟ ದರ್ಶನ್ ನಟನೆಯ ಚಿತ್ರಗಳ ಹಾಡುಗಳನ್ನು ಏಕೆ ಹಾಕುವುದಿಲ್ಲ ಎಂಬ ಪ್ರಶ್ನೆಗೆ ನಿರೂಪಕ ಕಿಚ್ಚ ಸುದೀಪ್ ಪ್ರತಿಕ್ರಿಯಿಸಿದ್ದಾರೆ.
ಇತ್ತೀಚಿನ ಮಾಧ್ಯಮ ಸಂವಾದವೊಂದರಲ್ಲಿ, ಮನೆಯೊಳಗಿರುವ ಸ್ಪರ್ಧಿಗಳಿಗಾಗಿ ಇತರ ಕನ್ನಡದ ಇತರ ನಟರ ಹಾಡುಗಳನ್ನು ಪ್ರಸಾರ ಮಾಡಲಾಗುತ್ತಿದ್ದರೂ, ದರ್ಶನ್ ಅವರ ಹಾಡುಗಳನ್ನು ಮಾತ್ರ ಏಕೆ ಕಾರ್ಯಕ್ರಮದಲ್ಲಿ ಪ್ರಸಾರ ಮಾಡುವುದಿಲ್ಲ ಎಂದು ಸುದೀಪ್ ಅವರನ್ನು ಪ್ರಶ್ನಿಸಲಾಯಿತು. ಹಕ್ಕುಸ್ವಾಮ್ಯಕ್ಕೆ (ಕಾಪಿರೈಟ್) ಸಂಬಂಧಿಸಿದ ಸಮಸ್ಯೆಗಳು ಇದಕ್ಕೆ ಕಾರಣವಿರಬಹುದೇ ಎಂದೂ ಸಹ ಕೇಳಲಾಯಿತು.
ಈ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಸುದೀಪ್, ಆ ಬಗ್ಗೆ ಯಾರಿಗೂ ದ್ವೇಷವಿಲ್ಲ. ಈ ನಿರ್ಧಾರದ ಹಿಂದೆ ಇತರ ಕಾರಣಗಳಿರಬಹುದು. ಈ ವಿಷಯದ ಬಗ್ಗೆ ವಾಹಿನಿಯ ಕಾನೂನು ವಿಭಾಗದೊಂದಿಗೆ ಪರಿಶೀಲಿಸಬೇಕು. ಇಂತಹ ಪ್ರಶ್ನೆಗಳು ಚರ್ಚೆಯನ್ನು ಬೇರೆ ದಿಕ್ಕಿಗೆ ಕೊಂಡೊಯ್ಯಬಹುದು. ಈ ವಿಷಯದ ಸುತ್ತ ಅನಗತ್ಯ ವಿವಾದ ಸೃಷ್ಟಿಸುವ ಅಗತ್ಯವಿಲ್ಲ ಎಂದೂ ತಿಳಿಸಿದರು.
ದರ್ಶನ್ ಅವರೊಂದಿಗಿನ ಸಂಬಂಧದ ಕುರಿತು ದೀರ್ಘಕಾಲದಿಂದಲೂ ಇರುವ ಕುತೂಹಲದ ಹಿನ್ನೆಲೆಯಲ್ಲಿ, ಸುದೀಪ್ ಅವರ ಪ್ರತಿಕ್ರಿಯೆಯು ಗಮನ ಸೆಳೆದಿದೆ. ಈ ಇಬ್ಬರು ನಟರು ಹಿಂದೆ ಆಪ್ತ ಸ್ನೇಹಿತರಾಗಿದ್ದರು. ಆದರೆ, ನಂತರ ಅವರ ಸಂಬಂಧದಲ್ಲಿ ಅಂತರ ಉಂಟಾಯಿತು. ಅಂದಿನಿಂದ, ಈ ಇಬ್ಬರು ತಾರೆಗಳಿಗೆ ಸಂಬಂಧಿಸಿದ ಯಾವುದೇ ಬೆಳವಣಿಗೆಯು ಅಭಿಮಾನಿಗಳು ಮತ್ತು ಕನ್ನಡ ಚಿತ್ರರಂಗದ ಗಮನವನ್ನು ಹೆಚ್ಚಾಗಿ ಸೆಳೆಯುತ್ತಾ ಬಂದಿದೆ.
ಈ ಪ್ರಶ್ನೆಯು ಇದೀಗ ಅಭಿಮಾನಿಗಳ ವಲಯದಲ್ಲಿ ಚರ್ಚೆಗೆ ಕಾರಣವಾಗಿದ್ದು, ಇಬ್ಬರು ಪ್ರಮುಖ ತಾರೆಗಳು ಹಾಗೂ ಅವರ ನಡುವಿನ ಸಾರ್ವಜನಿಕ ಸಂಬಂಧದ ಕುರಿತು ಇರುವ ನಿರಂತರ ಆಸಕ್ತಿಯನ್ನು ಕೆರಳಿಸಿದೆ. ಕರ್ನಾಟಕದಲ್ಲಿ ದರ್ಶನ್ ಮತ್ತು ಸುದೀಪ್ ಇಬ್ಬರಿಗೂ ಅಪಾರ ಸಂಖ್ಯೆಯ ಅಭಿಮಾನಿ ಬಳಗವಿದೆ; ಹೀಗಾಗಿ, ಅವರನ್ನು ಒಳಗೊಂಡ ಸಣ್ಣಪುಟ್ಟ ವಿಷಯಗಳು ಕೂಡ ಸಾಮಾಜಿಕ ಜಾಲತಾಣಗಳಲ್ಲಿ ತ್ವರಿತವಾಗಿ ವ್ಯಾಪಕ ಚರ್ಚೆಗೆ ಕಾರಣವಾಗುತ್ತವೆ.
'ಬಿಗ್ ಬಾಸ್ ಕನ್ನಡ 13' ಆರಂಭವಾಗಲಿರುವ ಈ ಹೊತ್ತಿನಲ್ಲಿ, ವೀಕ್ಷಕರು ಕೇವಲ ಸ್ಪರ್ಧಿಗಳು ಮತ್ತು ಅವರ ನಡುವಿನ ಸಂವಹನವನ್ನಷ್ಟೇ ಅಲ್ಲದೆ, ಕಾರ್ಯಕ್ರಮದ ಸುತ್ತ ನಡೆಯುವ ವಿದ್ಯಮಾನಗಳನ್ನೂ ಗಮನಿಸಲಿದ್ದಾರೆ. ಅಂತಿಮವಾಗಿ ದರ್ಶನ್ ಅವರ ಹಾಡುಗಳನ್ನು ಮನೆಯೊಳಗೆ ಪ್ರಸಾರ ಮಾಡಲಾಗುತ್ತದೆಯೇ ಎಂಬುದನ್ನು ಕಾದುನೋಡಬೇಕಾಗಿದೆ.
ಸದ್ಯಕ್ಕೆ, ಸುದೀಪ್ ತಮ್ಮ ನಿಲುವನ್ನು ಸ್ಪಷ್ಟಪಡಿಸಿದ್ದು, ಇದರಲ್ಲಿ ಯಾವುದೇ ದ್ವೇಷದ ಭಾವನೆಯಿಲ್ಲ; ಹಾಗಾಗಿ, ಹಾಡೊಂದು ಪ್ರಸಾರವಾಗದಿರುವುದನ್ನು ವೈಯಕ್ತಿಕ ಸಂಘರ್ಷದ ಸಂಕೇತವೆಂದು ವೀಕ್ಷಕರು ಭಾವಿಸಬಾರದು ಎಂದಿದ್ದಾರೆ.
