ಹೈದರಾಬಾದ್: ಜುಲೈ 18 ರಂದು ತಿರುಪತಿಯಲ್ಲಿ ನಡೆಯಲಿರುವ ಕಾರ್ಯಕ್ರಮದಲ್ಲಿ ಪ್ರಮುಖ ಘೋಷಣೆ ಹೊರಬೀಳಬಹುದು ಎಂಬ ವದಂತಿ ಹರಡಿದ ನಂತರ, ನಟ ಜೂನಿಯರ್ ಎನ್ಟಿಆರ್ ಅವರ ರಾಜಕೀಯ ಪ್ರವೇಶದ ಬಗ್ಗೆ ಆಂಧ್ರಪ್ರದೇಶ ಮತ್ತು ತೆಲಂಗಾಣದಲ್ಲಿ ಮತ್ತೊಮ್ಮೆ ಬಿಸಿ ಬಿಸಿ ಚರ್ಚೆಗಳಾಗುತ್ತಿವೆ.
ಆದಾಗ್ಯೂ, ಈ ಕಾರ್ಯಕ್ರಮವು ರಾಜಕೀಯವಲ್ಲ ಮತ್ತು ಸಾಮಾಜಿಕ ಉಪಕ್ರಮ ಊರುವಾದದ ಮೇಲೆ ಮಾತ್ರ ಕೇಂದ್ರೀಕರಿಸುತ್ತದೆ ಎಂದು ಜೂನಿಯರ್ ಎನ್ಟಿಆರ್ ತಂಡ ಸ್ಪಷ್ಟಪಡಿಸಿದೆ.
ಸಾಮಾಜಿಕ ಮಾಧ್ಯಮ ಪೋಸ್ಟ್ಗಳು ಮತ್ತು ರಾಜಕೀಯ ಚರ್ಚೆಗಳು ಈ ಕಾರ್ಯಕ್ರಮವನ್ನು ಸಂಭಾವ್ಯ ರಾಜಕೀಯ ಪ್ರವೇಶದ ಆರಂಭ ಎಂದೇ ಹೇಳಿದ ನಂತರ ಈ ಸ್ಪಷ್ಟೀಕರಣ ಬಂದಿದೆ. ಇತ್ತೀಚೆಗೆ ರಾಜಕೀಯ ಪ್ರವೇಶಿಸಿದ ನಟ ವಿಜಯ್ ಮತ್ತು ಜೂನಿಯರ್ ಎನ್ಟಿಆರ್ ನಡುವಿನ ಹೋಲಿಕೆಗಳ ನಡುವೆ ವದಂತಿಗಳು ವೇಗ ಪಡೆದುಕೊಂಡವು.
ಈ ಕಾರ್ಯಕ್ರಮವನ್ನು ಬಹಳ ಹಿಂದೆಯೇ ಯೋಜಿಸಲಾಗಿತ್ತು ಮತ್ತು ಯಾವುದೇ ರಾಜಕೀಯ ಪಕ್ಷ ಅಥವಾ ರಾಜಕೀಯ ಘೋಷಣೆಯೊಂದಿಗೆ ಯಾವುದೇ ಸಂಬಂಧವಿಲ್ಲ ಎಂದು ಜೂನಿಯರ್ ಎನ್ಟಿಆರ್ ಅವರ ತಂಡ ಮತ್ತು ಅಭಿಮಾನಿ ಸಂಘಟನೆಗಳು ಸ್ಪಷ್ಟಪಡಿಸಿವೆ.
ಜೂನಿಯರ್ ಎನ್ಟಿಆರ್ ಸುತ್ತಲಿನ ರಾಜಕೀಯ ಸಂಚಲನ ಹೊಸದಲ್ಲ. 43 ವರ್ಷದ ಜೂನಿಯರ್ ಎನ್ಟಿಆರ್, 1982 ರಲ್ಲಿ ತೆಲುಗು ದೇಶಂ ಪಕ್ಷ (ಟಿಡಿಪಿ) ಸ್ಥಾಪಿಸಿದ ಪ್ರಸಿದ್ಧ ನಟ ಮತ್ತು ಆಂಧ್ರಪ್ರದೇಶದ ಮಾಜಿ ಮುಖ್ಯಮಂತ್ರಿ ಎನ್ಟಿ ರಾಮರಾವ್ ಅವರ ಮೊಮ್ಮಗನಾಗಿ ಬಲವಾದ ರಾಜಕೀಯ ಪರಂಪರೆಯ ಹಿನ್ನೆಲೆ ಹೊಂದಿದ್ದಾರೆ.
ಅವರ ತಂದೆ ನಂದಮೂರಿ ಹರಿಕೃಷ್ಣ ಕೂಡ ಟಿಡಿಪಿ (TDP) ಜೊತೆ ಗುರುತಿಸಿಕೊಂಡಿದ್ದರು ಮತ್ತು ರಾಜ್ಯಸಭಾ ಸದಸ್ಯರಾಗಿ ಸೇವೆ ಸಲ್ಲಿಸಿದ್ದರು; ಇತ್ತ ಅವರ ಚಿಕ್ಕಪ್ಪ, ನಟ ಬಾಲಕೃಷ್ಣ ಅವರು ಮೂರು ಬಾರಿ ಟಿಡಿಪಿ ಶಾಸಕರಾಗಿದ್ದಾರೆ.
ಜೂನಿಯರ್ ಎನ್ಟಿಆರ್ ಅವರ ರಾಜಕೀಯ ಸಂಪರ್ಕವು ಟಿಡಿಪಿ ಮುಖ್ಯಸ್ಥ ಮತ್ತು ಆಂಧ್ರಪ್ರದೇಶ ಮುಖ್ಯಮಂತ್ರಿ ಚಂದ್ರಬಾಬು ನಾಯ್ಡು ಅವರ ಕುಟುಂಬಕ್ಕೂ ಸಂಬಂಧಿಸಿದೆ. ಚಂದ್ರಬಾಬು ನಾಯ್ಡು ಅವರು ಎನ್ಟಿಆರ್ ಸೀನಿಯರ್ ಅವರ ಪುತ್ರಿ ನರ ಭುವನೇಶ್ವರಿಯನ್ನು ವಿವಾಹವಾದರು. ಈ ಮೂಲಕ ನಾಯ್ಡು, ಜೂನಿಯರ್ ಎನ್ಟಿಆರ್ ಅವರ ಮಾವನಾಗುತ್ತಾರೆ.
2009ರಲ್ಲಿ ಆಂಧ್ರಪ್ರದೇಶ ವಿಧಾನಸಭೆ ಮತ್ತು ಲೋಕಸಭಾ ಚುನಾವಣೆಗಳ ಸಮಯದಲ್ಲಿ ಟಿಡಿಪಿ ಪರ ಪ್ರಚಾರ ಮಾಡುವ ಮೂಲಕ ಜೂನಿಯರ್ ಎನ್ಟಿಆರ್ ರಾಜಕೀಯದಲ್ಲಿ ಸಕ್ರಿಯರಾದರು. ಅವರ ಉತ್ಸಾಹಭರಿತ ಭಾಷಣಗಳು ಹೆಚ್ಚಿನ ಗಮನ ಸೆಳೆಯಿತು. ಇದರಿಂದಾಗಿ ಅವರಿಗೆ ರಾಜಕೀಯದಲ್ಲಿ ದೀರ್ಘ ಭವಿಷ್ಯವಿದೆ ಎಂದು ಹಲವರು ನಂಬಿದರು.
ಆದಾಗ್ಯೂ, 2009ರ ಚುನಾವಣಾ ಪ್ರಚಾರದ ನಂತರ, ಜೂನಿಯರ್ ಎನ್ಟಿಆರ್ ಕ್ರಮೇಣ ತಮ್ಮ ಗಮನವನ್ನು ಸಿನಿಮಾದತ್ತ ತಿರುಗಿಸಿದರು. ಆಗಲೂ ಅವರ ರಾಜಕೀಯ ಪುನರಾಗಮನದ ಬಗ್ಗೆ ಊಹಾಪೋಹಗಳು ಮುಂದುವರೆದಿವೆ. ವಿಶೇಷವಾಗಿ ಯುವಕರಲ್ಲಿ ಅವರ ಜನಪ್ರಿಯತೆ ಮತ್ತು ನಂದಮೂರಿ ಕುಟುಂಬದ ಪರಂಪರೆಯೊಂದಿಗಿನ ಅವರ ಸಂಪರ್ಕದಿಂದಾಗಿ ಇವುಗಳಿಗೆ ರೆಕ್ಕೆ ಪುಕ್ಕ ಸಿಕ್ಕಂತಾಗಿದೆ.
ಆದಾಗ್ಯೂ, ನಟ ಸಕ್ರಿಯ ರಾಜಕೀಯದಿಂದ ಹೆಚ್ಚಾಗಿ ದೂರ ಉಳಿದಿದ್ದಾರೆ ಮತ್ತು ತಮ್ಮ ಚಲನಚಿತ್ರ ವೃತ್ತಿಜೀವನದತ್ತ ಗಮನಹರಿಸಿದ್ದಾರೆ.
ಸದ್ಯಕ್ಕೆ, ಜೂನಿಯರ್ ಎನ್ಟಿಆರ್ ರಾಜಕೀಯ ಪ್ರವೇಶಿಸುವ ಪ್ರಶ್ನೆಗೆ ಉತ್ತರ ಸಿಕ್ಕಿಲ್ಲ, ಆದರೆ ನಟನ ಪ್ರತಿಯೊಂದು ಸಾರ್ವಜನಿಕ ನಡೆಯು ಸಿನಿಮಾ ಅಭಿಮಾನಿಗಳು ಮತ್ತು ರಾಜಕೀಯ ವಲಯಗಳಿಂದ ಗಮನ ಸೆಳೆಯುತ್ತಲೇ ಇದೆ.
