ಬೆಂಗಳೂರು: ಕನ್ನಡ ಚಿತ್ರರಂಗದಲ್ಲಿ ಹೊಸ ಸಂಚಲನ ಸೃಷ್ಟಿಸಿರುವ 'ಪ್ರೇಮದ ಊರಲಿ' ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ವಿಶ್ವಾದ್ಯಂತ ಬರೋಬ್ಬರಿ ₹100 ಕೋಟಿ ರೂಪಾಯಿ ಗಳಿಕೆಯ ಮೂಲಕ ಇತಿಹಾಸ ಸೃಷ್ಟಿಸಿದೆ. ಕೇವಲ 2 ಕೋಟಿ ರೂಪಾಯಿಗಳ ಸಣ್ಣ ಬಜೆಟ್‌ನಲ್ಲಿ ನಿರ್ಮಾಣವಾದ ಈ ಚಿತ್ರ, ಬಿಡುಗಡೆಯಾದ 26 ದಿನಗಳಲ್ಲೇ ಈ ಸಾಧನೆ ಮಾಡಿದೆ. ಅದರಲ್ಲೂ, ಯಾವುದೇ ದೊಡ್ಡ ಸ್ಟಾರ್ ನಟರ ಹವಾ ಇಲ್ಲದೆ, ಕೇವಲ ಕಥೆಯ ಬಲದಿಂದ ಸ್ಯಾಂಡಲ್‌ವುಡ್‌ನಲ್ಲಿ ಈ ಮಟ್ಟದ ದಾಖಲೆ ಬರೆದಿರುವುದು ಇಡೀ ಚಿತ್ರರಂಗವೇ ಹೆಮ್ಮೆ ಪಡುವಂತೆ ಮಾಡಿದೆ. ಆ ಕುರಿತ ವರದಿ ಇಲ್ಲಿದೆ:
60 ಶೋಗಳಿಂದ 1,200 ಶೋಗಳಿಗೆ
ಬಿಡುಗಡೆಯಾದ ಮೊದಲ ದಿನ ಕೇವಲ 60 ಶೋಗಳು ಮತ್ತು ₹10 ಲಕ್ಷದ ಆರಂಭಿಕ ಕಲೆಕ್ಷನ್ನೊಂದಿಗೆ ತನ್ನ ಪಯಣ ಆರಂಭಿಸಿತ್ತು. ಆದರೆ ಪ್ರೇಕ್ಷಕರ ಅದ್ಭುತ ಮೌಖಿಕ ಪ್ರಚಾರದಿಂದಾಗಿ ಎರಡೇ ವಾರಗಳಲ್ಲಿ ಚಿತ್ರದ ಶೋಗಳ ಸಂಖ್ಯೆ 1,200ಕ್ಕೂ ಅಧಿಕಕ್ಕೆ ಹೆಚ್ಚಳವಾಗಿತ್ತು. ಈ ಮೂಲಕ, ಕೇವಲ 26 ದಿನಗಳಲ್ಲಿ ವಿಶ್ವದಾದ್ಯಂತ ₹100 ಕೋಟಿಗೂ ಅಧಿಕ (ಸದ್ಯ ₹107.67 ಕೋಟಿ) ಗಳಿಕೆ ಮಾಡುವದರೊಂದಿಗೆ ಸಾಧನೆ ಮಾಡಿದೆ.
ಮುಂದುವರೆದು, ಕೇವಲ ₹2 ಕೋಟಿಯಿಂದ ₹2.5 ಕೋಟಿ ಬಜೆಟ್‌ನಲ್ಲಿ ತಯಾರಾದ ಈ ಸಿನಿಮಾ, ಬಂಡವಾಳಕ್ಕೆ ಹೋಲಿಸಿದರೆ ಸ್ಯಾಂಡಲ್‌ವುಡ್‌ನ ಅತ್ಯಂತ ಗರಿಷ್ಠ ಲಾಭ ತಂದುಕೊಟ್ಟ ಚಿತ್ರಗಳ ಸಾಲಿಗೆ ಸೇರಿದೆ. ಚಿತ್ರದ ಮೇಕಿಂಗ್ ವೇಳೆ ನಿರ್ದೇಶಕ ಮನೋಜ್ ಕುಮಾರ್ ತಮ್ಮ ತಾಯಿಯ ಮಾಂಗಲ್ಯ ಸರವನ್ನು ಕೂಡ ಅಡಮಾನ ಇಟ್ಟಿದ್ದರು ಎನ್ನಲಾಗಿದ್ದು, ಈಗ ಸಿಕ್ಕಿರುವ ಯಶಸ್ಸು ಚಿತ್ರತಂಡದ ಶ್ರಮಕ್ಕೆ ಸಂದ ಜಯವಾಗಿದೆ. ಅದರಲ್ಲೂ, ಈ ವರ್ಷದ ಕನ್ನಡದ ನೆಟ್ ಕಲೆಕ್ಷನ್ ವಿಚಾರದಲ್ಲಿ ನಟ ಯಶ್ ಅವರ 'ಟಾಕ್ಸಿಕ್' ಸಿನಿಮಾವನ್ನು ಹಿಂದಿಕ್ಕಿ, 2026ರ ಅತಿ ಹೆಚ್ಚು ನೆಟ್ ಗಳಿಕೆ ಮಾಡಿದ ಕನ್ನಡ ಸಿನಿಮಾ ಎಂಬ ಹೆಗ್ಗಳಿಕೆಗೆ ಇದು ಪಾತ್ರವಾಗಿದೆ.
ಇದರ ನಡುವೆಯೇ, ಕನ್ನಡದಲ್ಲಿ ಸಿಕ್ಕ ಬೃಹತ್ ಯಶಸ್ಸಿನ ಬೆನ್ನಲ್ಲೇ ಚಿತ್ರತಂಡ ಇದನ್ನು ತೆಲುಗಿನಲ್ಲಿ 'ಪ್ರೇಮನೆ ಊರಿಲೋ' ಹೆಸರಿನಲ್ಲಿ ಬಿಡುಗಡೆ ಮಾಡಲು ಸಜ್ಜಾಗುತ್ತಿದ್ದು, ತಮಿಳು, ಮಲಯಾಳಂ ಹಾಗೂ ಹಿಂದಿ ಆವೃತ್ತಿಗಳ ಡಬ್ಬಿಂಗ್ ಬಗ್ಗೆಯೂ ಚರ್ಚೆ ನಡೆಸುತ್ತಿದೆ.
ಏತನ್ಮಧ್ಯೆ, ಈ ಯಶಸ್ಸಿನ ಮೂಲಕ ಕೆಜಿಎಫ್, ಕಾಂತಾರ, 777 ಚಾರ್ಲಿ, ವಿಕ್ರಾಂತ್ ರೋಣ ಚಿತ್ರಗಳ ತರುವಾಯ ₹100 ಕೋಟಿ ಮೈಲಿಗಲ್ಲು ದಾಟಿದ ಹೆಮ್ಮೆಯ ಕನ್ನಡ ಸಿನಿಮಾವಾಗಿ ಪ್ರೇಮದ ಊರಲಿ ಹೊರಹೊಮ್ಮಿದೆ.
