ಮುಂಬೈ: ಏಪ್ರಿಲ್ 1 ಮೂರ್ಖರ ದಿನ ಇದು ಎಲ್ಲರಿಗೂ ತಿಳಿದ ವಿಚಾರ. ಆದರೆ ಟೀಂ ಇಂಡಿಯಾ ನಾಯಕ ಮಹೇಂದ್ರ ಸಿಂಗ್ ಧೋನಿ ಅವರನ್ನು ವೆಸ್ಟ್ ಇಂಡೀಸ್ ನಾಯಕ ಡರೆನ್ ಸಾಮಿ ಒಂದು ದಿನ ಮುಂಚಿತವಾಗಿಯೇ ಮೂರ್ಖರನ್ನಾಗಿಸಿದ್ದಾರೆ.
ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ಗುರುವಾರ ನಡೆದ ಪಂದ್ಯದ ವೇಳೆ ಧೋನಿ ಅಧಿಕಾರಿಗಳೊಂದಿಗೆ ಚರ್ಚಿಸುತ್ತಿದ್ದಾಗ ಅಲ್ಲಿಗೆ ಅಗಮಿಸಿದ ಸಾಮಿ, ಧೋನಿ ಅವರನ್ನು ಮೂರ್ಖರನ್ನಾಗಿಸಿದ್ದಾರೆ. ಪಂದ್ಯಕ್ಕೆ ಸಂಬಂಧಿಸಿದಂತೆ ನಾಯಕ ಧೋನಿ ಅಧಿಕಾರಿಗಳೊಂದಿಗೆ ಗಾಢವಾದ ಚರ್ಚೆಯಲ್ಲಿದ್ದರೆ, ಇದರ ಅನುಕೂಲ ಪಡೆದ ಸಾಮಿ ಸುಲಭವಾಗಿ ಧೋನಿಯನ್ನು ಮೂರ್ಖರನ್ನಾಗಿಸಿದ್ದಾರೆ.
ಧೋನಿ ಹೆಗಲ ಮೇಲೆ ಕೈಹಾಕಿ ಕೂಗುವಂತೆ ಮಾಡಿದ ಸಾಮಿ ಅವರು ತಿರುಗಿ ನೋಡುವಷ್ಟರಲ್ಲಿ ಅತ್ತ ಬಾಗಿದ್ದರು. ಆ ಬಳಿಕವೂ ಧೋನಿಯನ್ನು ಕಾಡಿದ ಸಾಮಿ ಅಧಿಕಾರಿಯೊಬ್ಬರಿಗೆ ಧೋನಿ ನೀಡಬೇಕಾದ ಕಾಗದಪತ್ರವನ್ನು ತಾವೇ ತೆಗೆದುಕೊಂಡು ಅಧಿಕಾರಿಯಂತೆ ಹಸ್ತ ಲಾಘವ ಮಾಡಿದ್ದಾರೆ. ಆದರೆ ಇಷ್ಟೆಲ್ಲಾ ನಡೆದರು ಕ್ಯಾಪ್ ಧರಿಸಿದ್ದ ಧೋನಿ ತಲೆ ಎತ್ತಿ ಅವರು ಯಾರು ಎಂದು ಕೂಡ ನೋಡದೆ ಸಾಮಿಯನ್ನು ಐಸಿಸಿ ಅಧಿಕಾರಿಯೆಂದು ತಿಳಿದು ಪತ್ರವನ್ನು ಸಾಮಿ ಕೈಗೆ ನೀಡಿದ್ದಾರೆ.
ಆ ಬಳಿಕ ವಿಂಡೀಸ್ ನಾಯಕ ಸಾಮಿಯೇ ಧೋನಿಯನ್ನು ಎಚ್ಚರಿಸಿದ್ದು, ಧೋನಿಗೂ ಗೂಡ ಆ ಬಳಿಕವೇ ತಾವು ಮೂರ್ಖರಾದ ವಿಚಾರ ತಿಳಿದಿದೆ. ಬಳಿಕ ಇಬ್ಬರೂ ನಾಯಕರು ಹಸನ್ಮುಖರಾಗಿ ತಮ್ಮ-ತಮ್ಮ ಡ್ರೆಸಿಂಗ್ ರೂಂಗೆ ತೆರಳಿದ್ದಾರೆ.
ಒಟ್ಟಾರೆ ಸಾಮಿ-ಧೋನಿ ಅವರ ಈ ಪ್ರಸಂಗ ನಿಜಕ್ಕೂ ಕ್ರೀಡಾ ಪ್ರೇಮಿಗಳನ್ನು ನಗೆಗಡಲಲ್ಲಿ ತೇಲಿಸಿದ್ದು, ಈ ಅಪೂರ್ವ ವಿಡಿಯೋವನ್ನು ಐಸಿಸಿ ಶೇರ್ ಮಾಡಿದೆ. ಇದೀಗ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಿದಾಡುತ್ತಿದ್ದು, ಸಾಮಿ ಕೀಟಲೆ ಇದೀಗ ಅಭಿಮಾನಿಗಳಲ್ಲಿ ನಗೆಯ ಅಲೆ ಉಕ್ಕಿಸುತ್ತಿದೆ.
ಈ ಅಪರೂಪದ ವಿಡಿಯೋ ಇಲ್ಲಿದೆ.
Advertisement