ಟೆಸ್ಟ್ ಪಂದ್ಯಗಳ ನಡುವಿನ ಅಂತರ ನಮಗೆ ಪ್ರಯೋಜನವಾಗಲಿದೆ: ವಿರಾಟ್ ಕೊಹ್ಲಿ

ಮುಂಬೈ: ಟೆಸ್ಟ್ ಪಂದ್ಯಗಳ ನಡುವೆ ಹೆಚ್ಚು ಅಂತರವಿದ್ದರೆ ನಮಗೆ ಪ್ರಯೋಜನವಾಗಲಿದೆ ಎಂದು ಟೀಂ ಇಂಡಿಯಾದ ಟೆಸ್ಟ್ ತಂಡದ ನಾಯಕ ವಿರಾಟ್ ಕೊಹ್ಲಿ ಹೇಳಿದ್ದಾರೆ. 

ಟೆಸ್ಟ್ ಪಂದ್ಯಗಳ ನಡುವೆ ಅಂತರವಿಡುವಂತೆ ನಾವು ಕೇಳಿರಲಿಲ್ಲ. ಇದು ವೇಳಾಪಟ್ಟಿಯ ಒಂದು ಭಾಗವಾಗಿದೆ. ಮೂರನೇ ಟೆಸ್ಟ್ ಪಂದ್ಯದ ನಂತರ ನಾಲ್ಕನೇ ಟೆಸ್ಟ್ ಪಂದ್ಯಕ್ಕೆ ಎಂಟು ದಿನಗಳ ಅಂತರವಿದ್ದು ಇದು ನಮಗೆ ಅನುಕೂಲವಾಗಲಿದೆ ಎಂದರು. 

ಪಂದ್ಯಗಳು ನಿರಂತರವಾಗಿದ್ದರೆ ನಾವು ಹೆಚ್ಚು ಬಳಲುತ್ತೇವೆ. ಇದರಿಂದ ಪಂದ್ಯಗಳ ನಡುವೆ ಹೆಚ್ಚು ಅಂತರವಿದ್ದಾಗ ನಮಗೂ ಸ್ವಲ್ಪ ವಿರಾಮ ತೆಗೆದುಕೊಳ್ಳಲು ಅನುಕೂಲವಾಗುತ್ತದೆ. ಸದ್ಯ ಇಂಗ್ಲೆಂಡ್ ವಿರುದ್ಧದ ಸರಣಿಯಲ್ಲಿ ಎರಡು ಪಂದ್ಯಗಳನ್ನು ಗೆದ್ದು ಬಹುತೇಕ ಸರಣಿಯನ್ನು ಗೆದ್ದಿದ್ದೇವೆ. ಇನ್ನಿರುವ ಎರಡು ಟೆಸ್ಟ್ ಪಂದ್ಯಗಳು ಡ್ರಾ ಆದರೆ ಸರಣಿ ಟೀಂ ಇಂಡಿಯಾಗೆ ಒಲಿಯಲಿದೆ ಎಂದರು. 

ಇಂಗ್ಲೆಂಡ್ ವಿರುದ್ಧದ ನಾಲ್ಕನೇ ಟೆಸ್ಟ್ ಪಂದ್ಯ ನಾಳೆ ಮುಂಬೈನ ವಾಖೆಂಡೆ ಮೈದಾನದಲ್ಲಿ ನಡೆಯಲಿದೆ. ಸದ್ಯ 5 ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಟೀಂ ಇಂಡಿಯಾ 2 ಪಂದ್ಯಗಳನ್ನು ಗೆದ್ದಿದ್ದು 1 ಪಂದ್ಯವನ್ನು ಡ್ರಾ ಮಾಡಿಕೊಂಡಿದೆ.