ಸೆಲ್ಫೀಗಾಗಿ ಧೋನಿ ಕಾರನ್ನು ಹಿಂಬಾಲಿಸಿದ ಯುವತಿ

ನವದೆಹಲಿ: ತಮ್ಮ ನೆಚ್ಚಿನ ನಟರು ಹಾಗೂ ಆಟಗಾರರಿಗಾಗಿ ಅಭಿಮಾನಿಗಳು ಯಾವ ಮಟ್ಟಕ್ಕಾದರೂ ಹೋಗುತ್ತಾರೆ ಎಂಬುದಕ್ಕೆ ಈ ಯುವತಿ ಸಾಕ್ಷಿಯಾಗಿದ್ದಾಳೆ.

ರಸ್ತೆಯಲ್ಲಿ ಕಾರಿನಲ್ಲಿ ತೆರಳುತ್ತಿದ್ದ ಧೋನಿಯನ್ನು ಕಂಡ ಯುವತಿಯೊಬ್ಬಳು ಹಿಂದೂ ಮುಂದೂ ಯೋಚನೆ ಮಾಡದೆ ಧೋನಿಯವರ ಕಾರನ್ನು ಹಿಂಬಾಲಿಸಿ ಕೊನೆಗೂ ಸೆಲ್ಫೀಯೊಂದನ್ನು ಕ್ಲಿಕ್ಕಿಸಿಕೊಂಡಿದ್ದಾಳೆ.

ಭಾರತ ಕ್ರಿಕೆಟ್ ತಂಡದ ನಾಯಕ ಎಂಎಸ್ ಧೋನಿಯವರು ರಾಂಚಿಯಿಂದ ಮುಂಬೈ ಗೆ ತೆರಳುವ ಸಲುವಾಗಿ ವಿಮಾನ ನಿಲ್ದಾಣಕ್ಕೆ ತಮ್ಮ ಕಾರಿನಲ್ಲಿ ಹೋಗುತ್ತಿದ್ದರು. ಈ ವೇಳೆ ರಸ್ತೆಯಲ್ಲಿ ಧೋನಿಯನ್ನು ಕಂಡ ಆರಾಧ್ಯ ಎಂಬ ಯುವತಿ ಸಂತೋಷಗೊಂಡು ಹೇಗಾದರೂ ಧೋನಿ ಜೊತೆ ಸೆಲ್ಫೀ ತೆಗೆದುಕೊಳ್ಳಲೇಬೇಕೆಂದು ನಿರ್ಧರಿಸಿದ್ದಾಳೆ.

ಇದರಂತೆ ತನ್ನ ದ್ವಿಚಕ್ರ ವಾಹನದ ಮೂಲಕ ಧೋನಿಯವರ ಕಾರನ್ನು ಹಿಂಬಾಲಿಸಿದ್ದಾಳೆ. ಕಾರು ವಿಮಾನ ನಿಲ್ದಾಣ ತಲುಪಿ, ಧೋನಿ ಕಾರು ಇಳಿಯುತ್ತಿದ್ದಂತೆಯೇ ಆರಾಧ್ಯ ಧೋನಿಯವರ ಹೆಸರನ್ನು ಜೋರಾಗಿ ಕೂಗಿದ್ದಾಳೆ. ಈ ವೇಳೆ ಯುವತಿಯನ್ನು ನೋಡಿದ ಧೋನಿಯವರು ಆಕೆಯ ಅಭಿಮಾನಕ್ಕೆ ಸಂತಸ ವ್ಯಕ್ತಪಡಿಸಿ, ಸೆಲ್ಫೀ ತೆಗೆದುಕೊಳ್ಳಲು ಒಪ್ಪಿಗೆ ಸೂಚಿಸಿದ್ದಾರೆ.