ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್ ಗೂ ಬರಲಿದೆ ಡಿಆರ್ಎಸ್!

ಲಂಡನ್: ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ(ಬಿಸಿಸಿಐ) ಪ್ರಬಲ ವಿರೋಧ ಹೊಂದಿರುವ ಅಂಪೈರ್ ನಿರ್ಧಾರ ಪರಾಮರ್ಶೆ ವ್ಯವಸ್ಥೆ(ಡಿಆರ್ಎಸ್) ಟೆಸ್ಟ್ ಮತ್ತು ಏಕದಿನ ಕ್ರಿಕೆಟ್ ಬಳಿಕ ಇದೀಗ ಟಿ20ಗೂ ತರಲು ವೇದಿಕೆ ಸಿದ್ಧಗೊಂಡಿದೆ. 

ಅಂತಾರಾಷ್ಟ್ರೀಯ ಟಿ20 ಪಂದ್ಯಗಳಿಗೂ ಡಿಆರ್ಎಸ್ ಬಳಸಬೇಕು ಎಂದು ಟೀಂ ಇಂಡಿಯಾ ಕೋಚ್ ಅನಿಲ್ ಕುಂಬ್ಳೆ ನೇತೃತ್ವದ ಐಸಿಸಿ ಕ್ರಿಕೆಟ್ ಸಮಿತಿ ಶಿಫಾರಸು ಮಾಡಿದೆ. ಇದರ ಜತೆಗೆ ಮೈದಾನದಲ್ಲಿ ದುರ್ನಡತೆ ತೋರಿದ ಆಟಗಾರರನ್ನು ಮೈದಾನದಿಂದ ಹೊರಕಳಿಸುವ ಅಧಿಕಾರವನ್ನು ಮೈದಾನದ ಅಂಪೈರ್ ಗೆ ನೀಡಬೇಕು ಎಂದು ಹೇಳಲಾಗಿದೆ. 

ಡಿಆರ್ಎಸ್ ನ ಎಲ್ ಬಿಡಬ್ಲ್ಯು ರಿವ್ಯೂ, ಮೈದಾನದ ಅಂಪೈರ್ ಕಾಲ್ ಎಂದು ಪ್ರಕಟವಾದಲ್ಲಿ ತಂಡ ಡಿಆರ್ಎಸ್ ರಿವ್ಯೂ ಕಳೆದುಕೊಳ್ಳುವ ಹಾಲಿ ವ್ಯವಸ್ಥೆಯನ್ನು ಬದಲಾಯಿಸಲು ಶಿಫಾರಸು ಮಾಡಲಾಗಿದೆ. ಇದಕ್ಕೆ ಒಪ್ಪಿಗೆ ಸಿಕ್ಕಲ್ಲಿ ಟೆಸ್ಟ್ ಕ್ರಿಕೆಟ್ ನಲ್ಲಿ 80 ಓವರ್ ಗಳ ಬಳಿಕ ಸಿಗಲಿರುವ ಮತ್ತೆರಡು ರಿವ್ಯೂಗಳಿಗೆ ಕತ್ತರಿ ಬೀಳಲಿದೆ.