ಪಾಕಿಸ್ತಾನದಲ್ಲಿದ್ದಾನೆ ಜೂನಿಯರ್ ಬುಮ್ರಾ ವಿಡಿಯೋ ನೋಡಿ ಬೇಸ್ತು ಬಿದ್ದ ರಿಯಲ್ ಬುಮ್ರಾ!

ಇಸ್ಲಾಮಾಬಾದ್: ಗಣ್ಯರ ತದ್ರೂಪುಗಳ ಕುರಿತು ಸಾಕಷ್ಟು ಓದಿರುತ್ತೀರಿ. ಇತ್ತೀಚೆಗೆ ನಿರ್ದೇಶಕ ರಾಮ್ ಗೋಪಾಲ್ ವರ್ಮಾ ಆಂಧ್ರ ಪ್ರದೇಶ ಸಿಎಂ ಚಂದ್ರಬಾಬು ನಾಯ್ಡು ಅವರಂತೆ ಕಾಣವ ವ್ಯಕ್ತಿ ಕುರಿತು ಟ್ವೀಟ್ ಮಾಡಿ ಸುದ್ದಿಗೆ ಗ್ರಾಸವಾಗಿದ್ದರು. ಇದೀಗ ಈ ಪಟ್ಟಿಗೆ ಹೊಸ ಸೇರ್ಪಡೆ ಕ್ರಿಕೆಟಿಗೆ ಜಸ್ ಪ್ರೀತ್ ಬುಮ್ರಾ..

ಹೌದು.. ಬುಮ್ರಾ ತಮ್ಮ ತದ್ರೂಪು ವ್ಯಕ್ತಿಯ ಕುರಿತು ಟ್ವೀಟ್ ಮಾಡಿಲ್ಲ. ಆದರೆ ತಮ್ಮದೇ ಬೌಲಿಂಗ್ ಶೈಲಿಯನ್ನು ಯಥಾವತ್ತಾಗಿ ಅನುಕರಿಸುವ 5 ವರ್ಷದ ಬಾಲಕ ವಿಡಿಯೋ ನೋಡಿ ಪುಳಕಗೊಂಡಿದ್ದಾರೆ. ಮಾಜಿ ಕ್ರಿಕೆಟಿಗ ವಿರೇಂದ್ರ ಸೆಹ್ವಾಗ್ ಅವರ ಜನ್ಮದಿನದ ಅಂಗವಾಗಿ ಟ್ವೀಟ್ ಮಾಡಿರುವ ಬುಮ್ರಾ, ನಾವು ಸಾಕಷ್ಟು ಬಾರಿ ನಿಮ್ಮಂತಹ ಲೆಜೆಂಡ್ ಆಟಗಾರರ ಆಟದ ಶೈಲಿಯನ್ನು ಅನುಕರಿಸುತ್ತೇವೆ. ಆದರೆ ನಮ್ಮದೇ ಶೈಲಿಯನ್ನು ಮತ್ತಿನ್ಯಾರೋ ಅನುಕರಿಸಿದಾಗ ಅದರ ಖುಷಿಯೇ ಬೇರೆ.. ನೋಡಲು ಸಂತೋಷವಾಗುತ್ತದೆ ಎಂದು ಬುಮ್ರಾ ಹೇಳಿದ್ದಾರೆ.

ಇನ್ನು ಬುಮ್ರಾ ಶೈಲಿಯನ್ನು ಅನುಕರಿಸಿರುವುದು ಪಾಕಿಸ್ತಾನದ 5 ವರ್ಷದ ಪುಟ್ಟಪೋರ.. ಪಾಕಿಸ್ತಾನದ ಗಲ್ಲಿ ಕ್ರಿಕೆಟ್ ನಲ್ಲಿ ಈತ ಯಥಾವತ್ತಾಗಿ ಜಸ್ ಪ್ರೀತ್ ಬುಮ್ರಾ ಅವರನ್ನು ಅನುಕರಣೆ ಮಾಡಿ ಇದೀಗ ದೇಶಾದ್ಯಂತ ವ್ಯಾಪಕ ಸುದ್ದಿಗೆ ಗ್ರಾಸವಾಗಿದ್ದಾನೆ.