ವಿರಾಟ್ ಕೊಹ್ಲಿ ಯಾವ ಕ್ರೀಡಾಪಟುವಿಗೆ ತಾನೆ ಮಾದರಿ, ಸ್ಪೂರ್ತಿಯಾಗಲಾರರು? ಅಂತಹ ಕ್ರಿಕೆಟ್ ಐಕಾನ್ ಗೂ ಸಹ ಓರ್ವ ವ್ಯಕ್ತಿ ಸ್ಪೂರ್ತಿಯಾಗಿದ್ದಾರಂತೆ. ಆದರೆ ಸ್ಪೂರ್ತಿದಾಯಕ ವ್ಯಕ್ತಿಗೂ ಕ್ರಿಕೆಟ್ ಗೂ ಯಾವ ಸಂಬಂಧವೂ ಇಲ್ಲ, ಅಸಲಿಗೆ ಆ ವ್ಯಕ್ತಿಗೆ ಕ್ರಿಕೆಟ್ ನ ಗಂಧಗಾಳಿಯೇ ಇಲ್ಲ!
ಅಚ್ಚರಿಯಾಗಿರಬೇಕು ಅಲ್ವಾ? ಹೌದು, ಸ್ವತಃ ವಿರಾಟ್ ಕೊಹ್ಲಿ ತಮಗಷ್ಟೇ ಅಲ್ಲದೇ ಬಹುಮಂದಿ ಕ್ರೀಡಾಪಟುಗಳಿಗೆ ಯಾರು ಸ್ಪೂರ್ತಿ ಎಂಬುದನ್ನು ಬಹಿರಂಗಪಡಿಸಿದ್ದಾರೆ.
ಆ ವ್ಯಕ್ತಿಗೂ ಕ್ರಿಕೆಟ್ ಗೂ ಸಂಬಂಧವಿಲ್ಲದೇ ಇರಬಹುದು ಆದರೆ ಕೊಹ್ಲಿ ಹೇಳಿರುವ ಆ ಸ್ಪೂರ್ತಿದಾಯಕ ವ್ಯಕ್ತಿ ಓರ್ವ ಕ್ರೀಡಾಪಟು, ಫುಟ್ ಬಾಲ್ ಜಗತ್ತಿನ ದಂತಕಥೆ ಕ್ರಿಸ್ಚಿಯಾನೋ ರೊನಾಲ್ಡೋ.
ವಿರಾಟ್ ಕೊಹ್ಲಿ ಕ್ರಿಕೆಟ್ ನ ಹೊರತಾಗಿ ತಾವು ಇಷ್ಟಪಡುವ, ಪರಿಣಿತಿ ಸಾಧಿಸಿರುವ ಕ್ಷೇತ್ರವೆಂದರೆ ಅದು ಫುಟ್ ಬಾಲ್. ಫೀಫಾ.ಕಾಮ್ ಗೆ ನೀಡಿರುವ ಸಂದರ್ಶನದಲ್ಲಿ ವಿರಾಟ್ ಕೋಹ್ಲಿ ಈ ಮಾಹಿತಿಯನ್ನು ಬಹಿರಂಗಪಡಿಸಿದ್ದು, ತಮಗಷ್ಟೇ ಅಲ್ಲದೇ ಹಲವರಿಗೆ ರೊನಾಲ್ಡೋ ಸ್ಪೂರ್ತಿಯಾಗಿದ್ದಾರೆ ಎಂದು ಹೇಳಿದ್ದಾರೆ.
ರೊನಾಲ್ಡೋ ಎಲ್ಲರಿಗಿಂತ ಎತ್ತರದ ಸ್ಥಾನದಲ್ಲಿದ್ದಾರೆ. ಅವರ ಬದ್ಧತೆ ಸಾಟಿಯಿಲ್ಲದ್ದು ಎಂದು ಕೊಹ್ಲಿ ಬಣ್ಣಿಸಿದ್ದಾರೆ. ರೊನಾಲ್ಡೋ ಹೆಚ್ಚು ಸವಾಲುಗಳನ್ನು ಸ್ವೀಕರಿಸಿದ್ದಾರೆ. ಅವರು ಪರಿಪೂರ್ಣ ಕ್ರೀಡಾಪಟು ಎಂದು ಕೊಹ್ಲಿ ಹೇಳಿದ್ದಾರೆ.
