ವಯಸ್ಸಾದರೆ ಸಾಲದು, ದೊಡ್ಡತನ ನಾವೇ ಬೆಳೆಸಿಕೊಳ್ಳಬೇಕು; ರಜಾಕ್‌ಗೆ ಭಾರತೀಯ ಕ್ರಿಕೆಟಿಗರಿಂದ ತರಾಟೆ!

ನವದೆಹಲಿ: ಟೀಂ ಇಂಡಿಯಾದ ಯುವ ವೇಗಿ ಜಸ್ ಪ್ರೀತ್ ಬುಮ್ರಾರನ್ನು ಬೇಬಿ ಬೌಲರ್ ಎಂದು ಕರೆದಿರುವ ಪಾಕ್ ಮಾಜಿ ಕ್ರಿಕೆಟಿಗ ಅಬ್ದುಲ್ ರಜಾಕ್‌ಗೆ ಟೀಂ ಇಂಡಿಯಾ ಹಿರಿಯ ಆಟಗಾರರು ತೀವ್ರ ತರಾಟೆಗೆ ತೆಗೆದುಕೊಂಡಿದ್ದಾರೆ. 

ಎಲ್ಲರಿಗೂ ವಯಸ್ಸಾಗುತ್ತದೆ. ಆದರೆ ನಮ್ಮ ದೊಡ್ಡತನದ ವ್ಯಕ್ತಿತ್ವವನ್ನು ನಾವೇ ಬೆಳೆಸಿಕೊಳ್ಳಬೇಕು ಎಂದು ಟೀಂ ಇಂಡಿಯಾ ಮಾಜಿ ಕ್ರಿಕೆಟಿಗ ಆಕಾಶ್ ಚೋಪ್ರಾ ರಜಾಕ್ ವಿರುದ್ಧ ಕಿಡಿಕಾರಿದ್ದಾರೆ. 

ಇರ್ಫಾನ್ ಪಠಾಣ್ ಸಹ ಟ್ವೀಟ್ ವೊಂದನ್ನು ಮಾಡಿ ಬುಮ್ರಾಗೆ ಧೈರ್ಯ ತುಂಬಿದ್ದಾರೆ. ಇರ್ಫಾನ್ ಪಠಾಣ್ ನಂತಹ ಬೌಲರ್ ನಮ್ಮ ಗಲ್ಲಿ-ಗಲ್ಲಿಗಳಲ್ಲಿ ಸಿಗುತ್ತಾರೆ ಎಂದು ಪಾಕ್ ಮಾಜಿ ಕ್ರಿಕೆಟಿಗನೊಬ್ಬ ಈ ಹಿಂದೆ ಹೇಳಿದ್ದ. ಅವರ ವಿರುದ್ಧ ಪ್ರತಿ ಬಾರಿ ಆಡಿದಾಗಲು ಅವರ ಕಿವಿರುಗಳನ್ನು ಗಲ್ಲಿ ಬೌಲರ್ ಕತ್ತರಿಸಿದ್ದ. ಇದನ್ನು ಮರೆಯದಿರಿ. ಇಂತಹ ಕೆಲಸಕ್ಕೆ ಬಾರದ ಹೇಳಿಕೆಗಳ ಬಗ್ಗೆ ತಲೆ ಕೆಡಿಸಿಕೊಳ್ಳಬೇಡಿ ಎಂದು ಅಭಿಮಾನಿಗಳಲ್ಲಿ ಪಠಾಣ್ ಮನವಿ ಮಾಡಿದ್ದಾರೆ. 

2004ರಲ್ಲಿ ಜಾವೇದ್ ಮಿಯಾಂದಾದ್ ಇರ್ಫಾನ್ ಪಠಾಣ್ ಬಗ್ಗೆ ಹಗುರವಾಗಿ ಮಾತನಾಡಿದ್ದರು. ಈ ಹೇಳಿಕೆ ನಂತರ ಪಠಾಣ್ ಕರಾಚಿಯಲ್ಲಿ ನಡೆದಿದ್ದ ಟೆಸ್ಟ್ ಪಂದ್ಯದಲ್ಲಿ ಪಾಕಿಸ್ತಾನದ ವಿರುದ್ಧ ಹ್ಯಾಟ್ರಿಕ್ ವಿಕೆಟ್ ಪಡೆದು ತಿರುಗೇಟು ನೀಡಿದ್ದರು.