ಆಸ್ಟ್ರೇಲಿಯಾ 'ಎ' ವಿರುದ್ಧ ಅಭ್ಯಾಸ ಪಂದ್ಯ: ಹನುಮ ವಿಹಾರಿ, ರಿಷಭ್ ಪಂತ್ ಶತಕ

ಸಿಡ್ನಿ: ಹನುಮ ವಿಹಾರಿ(104*) ಹಾಗೂ ರಿಷಭ್‌ ಪಂತ್‌(103*) ಅವರ ಶತಕಗಳ ನೆರವಿನಿಂದ ಭಾರತ ತಂಡ ಮೂರು ದಿನಗಳ ಫಿಂಕ್‌ ಬಾಲ್‌ ಅಭ್ಯಾಸ ಪಂದ್ಯದಲ್ಲಿ ಆಸ್ಟ್ರೇಲಿಯಾ ಬೃಹತ್‌ ಮುನ್ನಡೆ ಸಾಧಿಸಿದೆ. 

ಇಲ್ಲಿನ ಸಿಡ್ನಿ ಕ್ರಿಕೆಟ್‌ ಕ್ರೀಡಾಂಗಣದಲ್ಲಿ ಆಸ್ಟ್ರೇಲಿಯಾ ತಂಡವನ್ನು 32.2 ಓವರ್‌ಗಳಿಗೆ 108 ರನ್‌ಗಳಿಗೆ ಆಲೌಟ್‌ ಮಾಡಿದ ಬಳಿಕ ದ್ವಿತೀಯ ಇನಿಂಗ್ಸ್ ಆರಂಭಿಸಿದ ಭಾರತ ತಂಡ 90 ಓವರ್‌ಗಳಿಗೆ 4 ವಿಕೆಟ್‌ ನಷ್ಟಕ್ಕೆ 386 ರನ್‌ ಗಳಿಸಿದೆ ಹಾಗೂ 472 ರನ್‌ ಮುನ್ನಡೆ ಸಾಧಿಸಿದೆ. 

ಭಾರತದ ಪರ ಆರಂಭಿಕರಾಗಿ ಕಣಕ್ಕೆ ಇಳಿದ ಪೃಥ್ವಿ ಶಾ ಹಾಗೂ ಮಯಾಂಕ್ ಅಗರ್ವಾಲ್‌ ಜೋಡಿ ಹೆಚ್ಚಿ ಹೊತ್ತು ಕ್ರೀಸ್‌ನಲ್ಲಿ ಉಳಿಯಲಿಲ್ಲ. ತಂಡದ ಮೊತ್ತ 4 ರನ್‌ ಇರುವಾಗಲೇ ಪೃಥ್ವಿ ಶಾ(3) ಅವರನ್ನು ಮಾರ್ಕ್‌ ಸ್ಟಿಕೆಟಿ ಔಟ್‌ ಮಾಡಿದರು. ನಂತರ ಜತೆಯಾದ ಅಗರ್ವಾಲ್‌ ಹಾಗೂ ಶುಭಮನ್‌ ಗಿಲ್‌ ಅದ್ಭುತ ಬ್ಯಾಟಿಂಗ್‌ ಪ್ರದರ್ಶನ ತೋರಿತು. ಈ ಜೋಡಿ ಮುರಿಯದ ಎರಡನೇ ವಿಕೆಟ್‌ಗೆ 106 ರನ್‌ ಕಲೆ ಹಾಕಿ ತಂಡವನ್ನು ಆರಂಭಿಕ ಆಘಾತದಿಂದ ಪಾರು ಮಾಡಿತು. 

78 ಎಸೆತಗಳಲ್ಲಿ 10 ಬೌಂಡರಿಯೊಂದಿಗೆ 65 ರನ್‌ ಗಳಿಸಿ ಉತ್ತಮ ಬ್ಯಾಟಿಂಗ್‌ ಮಾಡಿದ ಶುಭಮನ್‌ ಗಿಲ್‌ ಲೆಗ್‌ ಸ್ಪಿನ್ನರ್‌ ಮಿಚೆಲ್‌ ಸ್ವಿಪ್ಸನ್‌ಗೆ ವಿಕೆಟ್‌ ಕೊಟ್ಟರು. ಕಳೆದ ಇನಿಂಗ್ಸ್‌ನಲ್ಲಿ ವೈಫಲ್ಯ ಅನುಭವಿಸಿದ್ದ ಮಯಾಂಕ್‌ ಅಗರ್ವಾಲ್‌ ಈ ಪಂದ್ಯದಲ್ಲಿ ಜವಾಬ್ದಾರಿಯುತ ಬ್ಯಾಟಿಂಗ್‌ ಪ್ರದರ್ಶನ ತೋರಿದರು. ಅವರು 120 ಎಸೆತಗಳಲ್ಲಿ ಎರಡು ಸಿಕ್ಸರ್‌ ಹಾಗೂ 4 ಬೌಂಡರಿಗಳ ಸಹಾಯದಿಂದ 61 ರನ್‌ ಗಳಿಸಿ ಔಟ್‌ ಆದರು. 

ಮೊದಲ ಇನಿಂಗ್ಸ್‌ನಲ್ಲಿ ನಿರಾಸೆ ಮೂಡಿಸಿದ್ದ ನಾಯಕ ಅಜಿಂಕ್ಯ ರಹಾನೆ, ದ್ವಿತೀಯ ಇನಿಂಗ್ಸ್‌ನಲ್ಲಿ 71 ಎಸೆತಗಳಲ್ಲಿ 38 ರನ್‌ ಗಳಿಸಿ ವಿಕೆಟ್‌ ಒಪ್ಪಿಸಿದರು. ನಂತರ ಜತೆಯಾದಟ ಹನುಮ ವಿಹಾರಿ ಹಾಗೂ ರಿಷಭ್‌ ಪಂತ್‌ ಅತ್ಯುತ್ತಮ ಬ್ಯಾಟಿಂಗ್‌ ಮಾಡಿತ. ಪ್ರಥಮ ಇನಿಂಗ್ಸ್‌ನಲ್ಲಿ ಮಾಡಿದ್ದ ತಪ್ಪನ್ನು ತಿದ್ದಿಕೊಂಡ ಈ ಜೋಡಿ ಆಸ್ಟ್ರೇಲಿಯಾ(ಎ) ಬೌಲರ್‌ಗಳನ್ನು ಸಮರ್ಥವಾಗಿ ಎದುರಿಸಿತು. ಈ ಜೊಡಿ ದೀರ್ಘಕಾಲ ಆಸೀಸ್‌ ಬೌಲರ್‌ಗಳನ್ನು ಕಾಡಿತು. ಮುರಿಯದ ಐದನೇ ವಿಕೆಟ್‌ಗೆ ಈ ಜೋಡಿ 147 ರನ್‌ ಜತೆಯಾಟವಾಡಿತು. ಆ ಮೂಲಕ ತಂಡದ ಮೊತ್ತ 400ರ ಸಮೀಪ ತಲುಪಲು ಸಹಾಯ ಮಾಡಿತು. 

ನಾಲ್ಕನೇ ಕ್ರಮಾಂಕದಲ್ಲಿ ಕ್ರೀಸ್‌ಗೆ ಬಂದ ಹನುಮ ವಿಹಾರಿ ಅದ್ಭುತ ಬ್ಯಾಟಿಂಗ್‌ ಮಾಡಿದರು. ಎದುರಿಸಿದ 194 ಎಸೆತಗಳಲ್ಲಿ 13 ಬೌಂಡರಿಯೊಂದಿಗೆ ಅಜೇಯ 104 ರನ್‌ ಗಳಿಸಿದರು. ಮತ್ತೊಂದು ತುದಿಯಲ್ಲಿ ಇವರಿಗೆ ಸಾಥ್‌ ನೀಡುತ್ತಿದ್ದ ರಿಷಭ್‌ ಪಂತ್‌ ಟಿ20 ಕ್ರಿಕೆಟ್‌ ರೀತಿ ಬ್ಯಾಟ್‌ ಬೀಡಿಸಿದರು. ಆಡಿದ ಕೇವಲ 73 ಎಸೆತಗಳಲ್ಲಿ ಆರು ಸಿಕ್ಸರ್‌ ಹಾಗೂ 9 ಬೌಂಡರಿಗಳ ನೆರವಿನಿಂದ ಅಜೇಯ 103 ರನ್‌ ಗಳಿಸಿದ್ದಾರೆ. 90 ನೇ ಓವರ್‌ಗೂ ಮುನ್ನ ಪಂತ್‌ಗೆ ಶತಕ ಗಳಿಸಲು 19 ರನ್‌ ಅಗತ್ಯವಿತ್ತು. ಈ ವೇಳೆ ಅವರು ನಾಲ್ಕು ಬೌಂಡರಿ ಹಾಗೂ ಒಂದು ಸಿಕ್ಸ್‌ ಸಿಡಿಸಿ, ಒಟ್ಟು 22 ರನ್ ಕಲೆ ಹಾಕಿ, ಶತಕ ಗಡಿ ದಾಟಿದರು. 

ಆಸ್ಟ್ರೇಲಿಯಾ ಪರ ಮಾರ್ಕ್‌ ಸ್ಟಿಕೆಟಿ ಎರಡು ವಿಕೆಟ್‌ ಪಡೆದರೆ, ಜ್ಯಾಕ್‌ ವಿಲ್ಡರ್‌ಮಥ್‌ ಹಾಗೂ ಮಿಚೆಲ್‌ ಸ್ವಿಪ್ಸನ್‌ ತಲಾ ಒಂದೊಂದು ವಿಕೆಟ್‌ ಪಡೆದರು. ಒಟ್ಟಾರೆ ಭಾರತ 472 ರನ್‌ ಮುನ್ನಡೆ ಸಾಧಿಸಿದ್ದು, ಕೊನೆಯ ದಿನವಾದ ಭಾನುವಾರ ಮೊದಲ ಸೆಷನ್‌ ಆಡಿ, ನಂತರ ಅವರಿಗೆ ದ್ವಿತೀಯ ಇನಿಂಗ್ಸ್ ಬಿಟ್ಟುಕೊಡಬಹುದು.

ಸಂಕ್ಷಿಪ್ತ ಸ್ಕೋರ್‌

ಭಾರತ
ಪ್ರಥಮ ಇನಿಂಗ್ಸ್: 194
ದ್ವಿತೀಯ ಇನಿಂಗ್ಸ್: 386/4 (90)
ಹನುಮ ವಿಹಾರಿ-104*
ರಿಷಭ್‌ ಪಂತ್‌-103*
ಶುಭಮನ್‌ ಗಿಲ್‌-65
ಮಯಾಂಕ್‌ ಅಗರ್ವಾಲ್‌-61
ಅಜಿಂಕ್ಯ ರಹಾನೆ-38
ಬೌಲಿಂಗ್‌: ಮಾರ್ಕ್‌ ಸ್ಟಿಕೆಟ್‌ 54 ಕ್ಕೆ 2, ಜ್ಯಾಕ್‌ ವಿಲ್ಡರ್ಮಥ್‌ 79ಕ್ಕೆ 1, ಮಿಚೆಲ್‌ ಸ್ವಿಪ್ಸನ್‌ 148ಕ್ಕೆ 1

ಆಸ್ಟ್ರೇಲಿಯಾ(ಎ)
ಪ್ರಥಮ ಇನಿಂಗ್ಸ್: 108/10 (32.2)
ಅಲೆಕ್ಸ್ ಕೇರಿ-32
ಮಾರ್ಕಸ್‌ ಹ್ಯಾರಿಸ್‌- 26
ಬೌಲಿಂಗ್: ಮೊಹಮ್ಮದ್‌ ಶಮಿ 29ಕ್ಕೆ 3, ಜಸ್‌ಪ್ರಿತ್‌ ಬುಮ್ರಾ 33 ಕ್ಕೆ 2, ನವದೀಪ್‌ ಸೈನಿ 19 ಕ್ಕೆ 3