2019ರ ಐಪಿಎಲ್ ಆವೃತ್ತಿಯಿಂದಲೂ ರುತುರಾಜ್ ಗಾಯಕ್ವಾಡ್ ಚೆನ್ನೈ ಸೂಪರ್ ಕಿಂಗ್ಸ್ನ (CSK) ಭಾಗವಾಗಿದ್ದಾರೆ. ಮೊದಲ ಐದು ವರ್ಷಗಳಲ್ಲಿ ಗಾಯಕ್ವಾಡ್ ಅಗ್ರ ಕ್ರಮಾಂಕದ ಬ್ಯಾಟರ್ ಆಗಿ ಗುರುತಿಸಿಕೊಂಡರು. 2021ರಲ್ಲಿ, ಗಾಯಕ್ವಾಡ್ 635 ರನ್ ಗಳಿಸುವ ಮೂಲಕ ಆರೆಂಜ್ ಕ್ಯಾಪ್ ಗೆದ್ದಿದ್ದರು ಮತ್ತು ವರ್ಷದ ಉದಯೋನ್ಮುಖ ಆಟಗಾರ ಪ್ರಶಸ್ತಿಯನ್ನು ಸಹ ಪಡೆದರು. 2024ರಲ್ಲಿ ಗಾಯಕ್ವಾಡ್ ಅವರನ್ನು CSK ನಾಯಕನಾಗಿ ನೇಮಿಸಿತು. ನಾಯಕನಾಗಿ ಮೊದಲ ವರ್ಷದಲ್ಲಿ, ಗಾಯಕ್ವಾಡ್ 583 ರನ್ ಗಳಿಸಿದರು. ಆದರೆ, ಎರಡನೇ ಆವೃತ್ತಿಯಲ್ಲಿ ಮೊಣಕೈ ಗಾಯದಿಂದ ಹೊರಗುಳಿಯುವ ಮೊದಲು ಕೇವಲ ಐದು ಪಂದ್ಯಗಳನ್ನು ಆಡಿದ್ದರು. CSK ಆ ಸೀಸನ್ನಲ್ಲಿ ನಿರಾಶಾದಾಯಕ ಪ್ರದರ್ಶನ ನೀಡಿ ಮುಗಿಸಿತು. ಇದೀಗ ಮೂರನೇ ಆವೃತ್ತಿಯೂ ಗಾಯಕ್ವಾಡ್ ಅವರಿಗೆ ಇದುವರೆಗಿನ ಅತ್ಯಂತ ಕೆಟ್ಟ ಸೀಸನ್ ಆಗಿ ಪರಿಣಮಿಸಿದೆ. ಈವರೆಗೆ ಆಡಿರುವ ಪಂದ್ಯಗಳಲ್ಲಿ ಅವರು 6, 28, 7, 15, 7 ಮತ್ತು 19 ರನ್ ಗಳಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಸಂಜು ಸ್ಯಾಮ್ಸನ್ ಇದೀಗ ಸಿಎಸ್ಕೆ ಸೇರಿದ್ದು, ಸಹ ಆರಂಭಿಕ ಆಟಗಾರನಾಗಿ, ಗಾಯಕ್ವಾಡ್ ಮೇಲೆ ಒತ್ತಡ ಹೆಚ್ಚಾಗಿದೆ ಎಂದು ಮಾಜಿ CSK ಆಟಗಾರ ಸುಬ್ರಮಣ್ಯಂ ಬದರಿನಾಥ್ ಹೇಳಿದ್ದಾರೆ.
'ಸಿಎಸ್ಕೆ ಮ್ಯಾನೇಜ್ಮೆಂಟ್ ಅವರನ್ನು ನಾಯಕನ ಸ್ಥಾನದಿಂದ ತೆಗೆದು ಸಂಜು ಸ್ಯಾಮ್ಸನ್ಗೆ ವಹಿಸುವ ಬಗ್ಗೆ ಯೋಚಿಸುವುದು ಯೋಗ್ಯವಾಗಿದೆ. ಅವರು ನಾಯಕನಾಗಿ ಹೀನಾಯವಾಗಿ ವಿಫಲರಾಗಿರುವುದರಿಂದ ಅಲ್ಲ. ಆದರೆ, ಅವರ ಬ್ಯಾಟಿಂಗ್ನಲ್ಲಿ ನಾಯಕತ್ವದ ಹೊರೆ ಸ್ಪಷ್ಟವಾಗಿ ಗೋಚರಿಸುತ್ತಿದೆ. ಅವರು ಅಪಾರ ಒತ್ತಡದಲ್ಲಿದ್ದಾರೆ ಎಂಬುದನ್ನು ನೀವು ಅವರ ಮುಖದಲ್ಲಿ ನೋಡಬಹುದು. ಆ ಒತ್ತಡ ಕಡಿಮೆ ಮಾಡಲು, ಸಿಎಸ್ಕೆ ರುತುರಾಜ್ ಅವರನ್ನು ಬದಲಿಸಬಹುದೇ?' ಎಂದು ಸುಬ್ರಮಣ್ಯಂ ಬದರಿನಾಥ್ ತಮ್ಮ ಯೂಟ್ಯೂಬ್ ಚಾನೆಲ್ನಲ್ಲಿ ತಿಳಿಸಿದ್ದಾರೆ.
'ರುತುರಾಜ್ ಫೈರಿಂಗ್ ಪ್ರಾರಂಭಿಸಬೇಕಾಗಿದೆ. ನೀವು ಪವರ್ಪ್ಲೇನಲ್ಲಿ ಆರಂಭಿಕರಾಗಿ ಆರು ಪಂದ್ಯಗಳನ್ನು ಆಡಿದ್ದೀರಿ. ಅಷ್ಟು ಸಾಕು. ಅವರ ನಾಯಕತ್ವವು ಉತ್ತಮ ಎನಿಸಿದರೂ, SRH ವಿರುದ್ಧದ ಪಂದ್ಯದಲ್ಲಿ ಅವರು ರನ್ ಗಳಿಸಲಿಲ್ಲ' ಎಂದರು.
ಅಂತಿಮ ಎರಡು ಓವರ್ಗಳಲ್ಲಿ ಆಕ್ರಮಣಕಾರಿ ಬ್ಯಾಟಿಂಗ್ ಪ್ರದರ್ಶನ ನೀಡಲು ಇದೀಗ ಸಿಎಸ್ಕೆಗೆ ಎಂಎಸ್ ಧೋನಿ ಲಭ್ಯರಿಲ್ಲ ಎಂದು ಬದರಿನಾಥ್ ಹೇಳಿದರು. ಐಪಿಎಲ್ 2026ಕ್ಕಿಂತ ಸ್ವಲ್ಪ ಮುಂಚೆಯೇ ಧೋನಿ ಗಾಯಗೊಂಡಿದ್ದರು. ಇನ್ನೂ ಅವರು ಒಂದು ಪಂದ್ಯಕ್ಕೂ ಲಭ್ಯರಾಗಿಲ್ಲ.
'ಡೆತ್ ಓವರ್ಗಳಲ್ಲಿ ಅವರು ಹೆಣಗಾಡುತ್ತಿರುವ ರೀತಿ ನೋಡಿದರೆ, ಧೋನಿ ಅವರ ದೈಹಿಕ ಸಮಸ್ಯೆಗಳನ್ನು ಲೆಕ್ಕಿಸದೆ, ಅವರ ಅಗತ್ಯವಿದೆ. ಈಗಲೂ, ಎಂಎಸ್ ಧೋನಿ 18ನೇ ಓವರ್ನಲ್ಲಿ ಬ್ಯಾಟಿಂಗ್ ಮಾಡುತ್ತಿದ್ದರೆ, ಬೌಲರ್ ಒತ್ತಡದಲ್ಲಿರುತ್ತಾರೆ. ಲೆಂಗ್ತ್ ಮತ್ತು ಯಾರ್ಕರ್ಗಳು ತಪ್ಪುತ್ತವೆ ಮತ್ತು ಅವರು ಕೊನೆಯದಾಗಿ ಹೆಲಿಕಾಪ್ಟರ್ ಶಾಟ್ ಆಡುತ್ತಾರೆ. ಬೌಲರ್ ಅಗಾಧ ಒತ್ತಡಕ್ಕೆ ಒಳಗಾಗುತ್ತಾರೆ' ಎಂದು ಹೇಳಿದರು.
Advertisement
