ಪ್ರೀತಿ ಮಾಡಿ ಕೊಲೆಯಾದರು

ಧಾರವಾಡ: ತಾಲೂಕಿನ ಶಿವಳ್ಳಿಯಲ್ಲಿ 16 ವರ್ಷದ ಬಾಲಕಿ ಹಾಗೂ 19 ವರ್ಷದ ಯುವಕನನ್ನು ಹಾಡು ಹಗಲೇ ಬರ್ಬರವಾಗಿ ಕೊಲೆ ಮಾಡಿದ ಘಟನೆ ಭಾನುವಾರ ನಡೆದಿದೆ.

ಮನೆಯವರ ವಿರೋಧದ ಮಧ್ಯೆಯೂ ಪ್ರೀತಿ ಮಾಡಿದ ಕಾರಣದಿಂದ ಗ್ರಾಮದ ನೀಲವ್ವ ಲಕ್ಕಮನವರ (16) ಹಾಗೂ ಮಹೇಶ ನಾಯ್ಕರ್ (19) ಎಂಬುವರು ಕೊಲೆಯಾದವರು. ತೀವ್ರ ಮದ್ಯ ಸೇವಿಸಿದ್ದ ಬಾಲಕಿ ಚಿಕ್ಕಪ್ಪ ರಂಗಪ್ಪ ಲಕ್ಕಮ್ಮನವರ್(48) ಬಡಿಗೆ, ಕುಡುಗೋಲಿನಿಂದ ಕೊಲೆ ಮಾಡಿ ಸದ್ಯ ಗ್ರಾಮೀಣ ಪೊಲೀಸರ ವಶದಲ್ಲಿದ್ದಾನೆ.

ಹೇಗಾಯ್ತು ಕೊಲೆ: ಎಸ್ಸೆಸ್ಸೆಲ್ಲಿ ಓದುತ್ತಿದ್ದ ನೀಲವ್ವ ಹಾಗೂ ಓದು ನಿಲ್ಲಿಸಿದ್ದ ಅದೇ ಗ್ರಾಮದ ಮಹೇಶ ಹಲವು ದಿನಗಳಿಂದ ಪ್ರೀತಿಸುತ್ತಿದ್ದರು. ನೀಲವ್ವ ಕುರುಬ ಸಮಾಜಕ್ಕೆ ಸೇರಿದ್ದರೆ ಮಹೇಶ ಎಸ್ಸಿ ಸಮುದಾಯಕ್ಕೆ ಸೇರಿದ್ದು ನೀಲವ್ವನ ಮನೆಯಿಂದ ಇವರಿಬ್ಬರ ಪ್ರೀತಿಗೆ ಅಡ್ಡಿ ಇತ್ತು. ಹಲವು ಬಾರಿ ಇಬ್ಬರಿಗೂ ಎಚ್ಚರಿಕೆ ನೀಡಲಾಗಿತ್ತು.

ಭಾನುವಾರ ಶಾಲೆಗೂ ರಜೆ ಇದ್ದ ಕಾರಣ ಗ್ರಾಮದ ಹೊರ ವಲಯದಲ್ಲಿನ ಮನೆಯಲ್ಲಿ ಇಬ್ಬರೂ ಭೇಟಿಯಾಗಿ ಮಾತನಾಡುತ್ತ ಕುಳಿತಿದ್ದಾರೆ. ಈ ವಿಷಯ ತಿಳಿದ ರಂಗಪ್ಪ ಮನೆ ಬಾಗಿಲು ಮುರಿದು ಬಡಿಗೆ ಹಾಗೂ ಕುಡಗೋಲಿನಿಂದ ಇಬ್ಬರು ಕತ್ತು ಹಾಗೂ ತಲೆಗೆ ಹೊಡೆದು ಕೊಲೆ ಮಾಡಿದ್ದಾನೆ ಎನ್ನಲಾಗಿದೆ.