ಬೆಂಗಳೂರು: ಚುನಾವಣೆಗೆ ಸ್ಪರ್ಧಿಸಿರುವ ಬಿಜೆಪಿ ಉಮೇದುವಾರರು ಗುರುವಾರ ಪಾಲಿಕೆ ಎದುರಿನ ನಾಡಪ್ರಭು ಕೆಂಪೇಗೌಡ ಪ್ರತಿಮೆ ಮುಂದೆ ಸಾರ್ವಜನಿಕರ ಹಣ ಯಾವುದೇ ರೀತಿಯಲ್ಲಿ ದುರುಪಯೋಗ ಆಗದಂತೆ ಎಚ್ಚರಿಕೆ ವಹಿಸುವುದಾಗಿ ಪ್ರತಿಜ್ಞಾವಿಧಿ ಸ್ವೀಕರಿಸಿದರು.
ಮಧ್ಯಾಹ್ನ 1 ಗಂಟೆ ಸುಮಾರಿಗೆ ನಡೆದ ಕಾರ್ಯಕ್ರಮದಲ್ಲಿ ಬಿಜೆಪಿ ಚುನಾವಣಾ ಉಸ್ತುವಾರಿ ಆರ್.ಅಶೋಕ್ ಪ್ರತಿಜ್ಞಾವಿಧಿ ಬೋಧಿಸಿದರು. ಬೆಂಗಳೂರು ಹಾಗೂ ನನ್ನ ವಾರ್ಡಿನ ಸರ್ವಾಂಗೀಣ ಅಭಿವೃದ್ಧಿಯಾಗಿ ಸಂಪೂರ್ಣ ಶಕ್ತಿ, ಎಲ್ಲಾ ಅವಕಾಶವನ್ನು ಮುಡಿಪಾಗಿಡುತ್ತೇನೆ. ಸಾರ್ವಜನಿಕರ ಹಣ ದುರುಪಯೋಗ ಆಗದಂತೆ ಎಚ್ಚರ ವಹಿಸುತ್ತೇನೆ. ನೈಜ ಜನ ಸೇವಕನಾಗಿ ಕಾರ್ಯನಿರ್ವಹಿಸುತ್ತೇನೆ. ಗುಣಮಟ್ಟದಲ್ಲಿ ಲೋಪದೋಷ ಇಲ್ಲದಂತೆ ಎಚ್ಚರವಹಿಸುತ್ತೇನೆ. ಬೆಂಗಳೂರು ಅತ್ಯುತ್ತಮ ನಗರವನ್ನಾಗಿ ಮಾಡುವಲ್ಲಿ ಪ್ರಾಮಾಣಿಕ ಪ್ರಯತ್ನ ಮಾಡುತ್ತೇನೆ. ಭಾರತೀಯ ಜನತಾಪಾರ್ಟಿ ಇಟ್ಟಿರುವ ನಂಬಿಕೆ ಉಳಿಸಿ ಪಕ್ಷಕ್ಕೆ ಗೌರವ ತರುವಲ್ಲಿ ಸೇವೆ ಸಲ್ಲಿಸುತ್ತೇನೆ. ನಾಡಪ್ರಭು ಕೆಂಪೇಗೌಡರ ಹೆಸರಲ್ಲಿ ಪ್ರಮಾಣ ಮಾಡುತ್ತೇನೆ ಎಂದು ಅಭ್ಯರ್ಥಿಗಳು ಪ್ರತಿಜ್ಞೆ ಸ್ವೀಕರಿಸಿದರು.
ಈ ಮುನ್ನ ಮಾತನಾಡಿದ ರಾಜಾಜಿನಗರ ಶಾಸಕ ಸುರೇಶ್ ಕುಮಾರ್, ಬೆಂಗಳೂರಿನ ನಾಗರಿಕರಿಗೆ ನಾವು ಯಾವ ರೀತಿ ಇರುತ್ತೇವೆ, ನಡವಳಿಕೆ ಯಾವ ರೀತಿ ಇರುತ್ತದೆ
ಎಂಬುದನ್ನು ಪ್ರತಿಜ್ಞೆ ಮೂಲಕ ವಾಗ್ದಾನ ಮಾಡುವವರಿದ್ದೇವೆ ಎಂದರು. ಕೇಂದ್ರ ಸಚಿವ ಅನಂತ ಕುಮಾರ್ ಮಾತನಾಡಿ, ಬೆಂಗಳೂರು ಮಹಾನಗರ ಸೇವೆಗಾಗಿ ಸಿದ್ಧರಾಗಿರುವ ಎಲ್ಲಾ ಉಮೇದುವಾರರು ಪ್ರತಿಜ್ಞೆ ಮಾಡುತ್ತಿರುವುದು ಬೆಂಗಳೂರನ್ನು ಗೆಲ್ಲಿಸಿ ಎಂಬ ಒಂದೇ ಒಂದು ಸಂದೇಶ ನೀಡಲು ಎಂದರು. ಮಾಜಿ ಸಚಿವ ಗೋವಿಂದ ಕಾರಜೋಳ, ಸಂಸದ ಪಿ.ಸಿ.ಮೋಹನ್, ಶಾಸಕ ವಿಜಯಕುಮಾರ್, ಪಕ್ಷದ ವಕ್ತಾರೆ ತೇಜಸ್ವಿನಿ ರಮೇಶ್ ಇದ್ದರು.
