ಇಂಟರ್‌ನೆಟ್ ಮತದಾನದಿಂದ ಭದ್ರತೆಗೆ ಅಪಾಯ: ಡಾ.ಖುರೇಷಿ

ಮಂಗಳೂರು: ದೇಶದಲ್ಲಿ ಇಂಟರ್‌ನೆಟ್ ಮತದಾನ ಪದ್ಧತಿ ಜಾರಿಗೆ ತಂದರೆ ಮತದಾನ ಭದ್ರತೆಗೆ ಅಪಾಯವಿದೆ ಎಂದು ಭಾರತದ ಮಾಜಿ ಚುನಾವಣಾ ಆಯುಕ್ತ ಡಾ. ವೈ.ಎಂ ಖುರೇಷಿ ಆತಂಕ ವ್ಯಕ್ತಪಡಿಸಿದ್ದಾರೆ.

ದ.ಕ.ಜಿಲ್ಲಾಡಳಿತ ನಗರದ ರವೀಂದ್ರ ಕಲಾಭವನದಲ್ಲಿ ಭಾನುವಾರ ಆಯೋಜಿಸಿದ ರಾಷ್ಟ್ರೀಯ ಮತದಾರರ ದಿನಾಚರಣೆಯಲ್ಲಿ ಉಪನ್ಯಾಸ ನೀಡಿದ ಅವರು, ಇಂಟರ್‌ನೆಟ್ ಮತದಾನ ಜಾರಿಗೆ ಬಂದರೆ ಮತದಾನನ್ನು ಗೌಪ್ಯವಾಗಿ ನಡೆಸಲು ಕಷ್ಟವಾದೀತು.

ಹಣದ ಪ್ರಭಾವ ನಡೆಯುತ್ತಿರುವ ಇಂದಿನ ದಿನಗಳಲ್ಲಿ ಹಣ ಕೊಟ್ಟು ಮತ ಚಲಾವಣೆಗೆ ಒತ್ತಾಯಿಸಬಹುದು, ಇಲ್ಲವೇ ಬಂದೂಕು ತೋರಿಸಿ ಬಲಾತ್ಕಾರ ಮತ ಹಾಕುವಂತೆ ಬೆದರಿಸಬಹುದು ಅಥವಾ ಮತಗಳನ್ನು ಹ್ಯಾಕ್ ಮಾಡುವ ಅಪಾಯವಿದೆ ಎಂದು ಎಚ್ಚರಿಸಿದರು.

ಆಸ್ಟ್ರೇಲಿಯಾ ಮುಂತಾದ ದೇಶಗಳಲ್ಲಿ ಕಡ್ಡಾಯ ಮತದಾನ ಜಾರಿಯಲ್ಲಿದ್ದರೂ ಶೇ.90 ಮತದಾನವೂ ಆಗುವುದಿಲ್ಲ. ಭಾರತದಲ್ಲಿ ಕಡ್ಡಾಯ ಮತದಾನ ಸುಲಭವಲ್ಲ. ಅದರ ಬದಲು ಮತದಾರರ ಮನವೊಲಿಸಿ ಮತ ಚಲಾಯಿಸುವಂತೆ ಮಾಡಬೇಕು ಎಂದು ಅಭಿಪ್ರಾಯಪಟ್ಟರು.