'ರಾಜಕೀಯ ವೇದಿಕೆಯಲ್ಲಿ ಕುರುಬ ಸಮಾಜದ ವಿಚಾರ ಪ್ರಸ್ತಾಪ ಸಲ್ಲದು'

ಕ.ಪ್ರ.ವಾರ್ತೆ ಕೋಲಾರ ಮಾ.30
ಕುರುಬ ಸಮುದಾಯಕ್ಕೆ ಸಂಬಂಧಪಟ್ಟ ವಿಚಾರಗಳನ್ನು ರಾಜಕೀಯ ವೇದಿಕೆಗಳಲ್ಲಿ ಸಮಾಜದ ಮುಖಂಡರುಗಳು ಮಾತನಾಡುವುದು ಸರಿಯಲ್ಲ ಎಂದು ಜಿಲ್ಲಾ ಕುರುಬರ ಸಂಘದ ಅಧ್ಯಕ್ಷ ಕೆ.ಎನ್. ಮಧುಸೂದನ್ ತಾಕೀತು ಮಾಡಿದ್ದಾರೆ. ಈ ಕುರಿತು ಹೇಳಿಕೆ ನೀಡಿರುವ ಅವರು, ಸಮುದಾಯದವರು ಯಾವುದೇ ಪಕ್ಷದಲ್ಲಿರಲಿ ಸಮಾಜದ ಬಗ್ಗೆ ಮಾತ್ರ ಕಿಂಚಿತ್ತೂ ಮಾತನಾಡಬಾರದು. ಸಮುದಾಯದ ವಿಚಾರಗಳನ್ನು ಸಮಾಜದ ಹಿರಿಯರ ಸಲಹೆ ಸೂಚನೆ ಮೇರೆಗೆ ನಾಲ್ಕು ಗೋಡೆಗಳ ಮಧ್ಯೆ ಬಗೆಹರಿಸಿಕೊಳ್ಳಬೇಕು. ಅದು ಬಿಟ್ಟು ರಾಜಕೀಯ ತೆವಲಿಗೆ ಸಮಾಜದ ಆಂತರಿಕ ವಿಚಾರಗಳನ್ನು ಬೀದಿಯಲ್ಲಿ ಹರಾಜು ಹಾಕದಂತೆ ಮನವಿ ಮಾಡಿದ್ದಾರೆ. ಕುರುಬ ಸಮುದಾಯದ ಮುಖಂಡರು ಸ್ವ ಸಾಮರ್ಥ್ಯದ ಮೇಲೆ ತಮ್ಮ ತಮ್ಮ ಮುಖಂಡನನ್ನು ಗೆಲ್ಲಿಸಿಕೊಳ್ಳಬೇಕೆ ಹೊರತು ಸಮಾಜದಲ್ಲಿನ ಒಡಕು ತೊಡಕುಗಳನ್ನು ಇನ್ನೊಬ್ಬರ ಮುಂದೆ ಮಾತನಾಡಿದರೆ ಸಂಘದಿಂದ ಕ್ರಮ ಜರುಗಿಸಬೇಕಾಗುತ್ತದೆ ಎಂದು ಎಚ್ಚರಿಸಿದ್ದಾರಲ್ಲದೆ ಒಗ್ಗಟ್ಟಿಲ್ಲದೆ ಕೆಲ ದಿನಗಳ ಹಿಂದೆ ಎದುರಿಸಿದ ಪರಿಣಾಮಗಳೇನು ಎಂಬುದರ ಬಗ್ಗೆ ಸಮುದಾಯದ ಮುಖಂಡರು ಆತ್ಮಾವಲೋಕನ ಮಾಡಿಕೊಂಡು ಹೆಜ್ಜೆಗಳನ್ನಿಡಬೇಕು ಎಂದು ತಿಳಿಸಿದ್ದಾರೆ. ಸಮುದಾಯದಲ್ಲಿ ಇತ್ತೀಚೆಗೆ ನಡೆದ ಬೆಳವಣಿಗೆಗಳಿಂದ ಇತರರಲ್ಲಿ ನಗೆಪಾಟಲಿಗೆ ಈಡಾಗಬೇಕಾಯಿತು. ಬೇರೆ ಸಮುದಾಯದಲ್ಲಿನ ಒಗ್ಗಟ್ಟನ್ನು ನೋಡಿ ನಮ್ಮ ಸಮಾಜದ ಯುವ ಮುಖಂಡರುಗಳು ಪಾಠ ಕಲಿಯಲಿ ಎಂದು ಸಲಹೆ ಮಾಡಿದ್ದಾರೆ.