ರಾಜ್ಯದ 16 ಕಾಲೇಜುಗಳಿಗೆ ಯುಜಿಸಿಯ ಪೊಟೆನ್ಷಿಯಲ್ ಫಾರ್ ಎಕ್ಸಲೆನ್ಸ್ ಮಾನ್ಯತೆ

ಬೆಂಗಳೂರು: ರಾಜ್ಯದ ಒಟ್ಟು 16 ಕಾಲೇಜುಗಳಿಗೆ ಈ ಬಾರಿ ಯುಜಿಸಿಯ ಪೊಟೆನ್ಷಿಯಲ್ ಫಾರ್ ಎಕ್ಸಲೆನ್ಸ್(ಸಂಭಾವ್ಯ ಶ್ರೇಷ್ಠ ಕಾಲೇಜು) ಮಾನ್ಯತೆ ದೊರೆತಿದೆ. 

ಮಹಾರಾಣಿ ವಿಜ್ಞಾನ ಕಾಲೇಜು, ಎಸ್ ಜೆಆರ್ ಪದವಿ ಕಾಲೇಜು, ವಿಜಯಾ ಕಾಲೇಜು, ಮಲ್ಲೇಶ್ವರ ಪ್ರಥಮ ದರ್ಜೆ ಮಹಿಳಾ ಕಾಲೇಜು, ಮೈಸೂರಿನಲ್ಲಿರುವ ಜೆಎಸ್ ಎಸ್ ಕಾನೂನು ಕಾಲೇಜು, ಪುತ್ತೂರಿನಲ್ಲಿರುವ ವಿವೇಕಾನಂದ ಕಾಲೇಜು ಸೇರಿದಂತೆ ಒಟ್ಟು 16 ಕಾಲೇಜುಗಳಿಗೆ ಮಾನ್ಯತೆ ದೊರೆತಿದೆ. ಈ ಮೂಲಕ ಈ ಕಾಲೇಜುಗಳು ವಿಶ್ವವಿದ್ಯಾಲಯ ವ್ಯಾಪ್ತಿಯಿಂದ ಹೊರಬಂದು ಶೈಕ್ಷಣಿಕವಾಗಿ ಸ್ವಾಯತ್ತತೆ ಪಡೆಯಲು ಮೊದಲ ಹೆಜ್ಜೆ ಇಟ್ಟಂತಾಗಿದೆ. 

ಕಾಲೇಜುಗಳು ಅಟಾನಮಿ ಪಡೆಯುವ ವಿಚಾರದಲ್ಲಿ ಪೊಟೆನ್ಷಿಯಲ್ ಫಾರ್ ಎಕ್ಸಲೆನ್ಸ್ ಮಾನ್ಯತೆ ಮೊದಲ ಹೆಜ್ಜೆಯಾಗಿರುತ್ತದೆ. ಇದರ ಬಳಿಕ ಕಾಲೇಜ್ ವಿತ್ ಎಕ್ಸಲೆನ್ಸ್ ಮಾನ್ಯತೆ ಪಡೆದು ಮೂರನೇ ಹಂತವಾಗಿ ಅಟಾನಮಿ ಅರ್ಹತೆ ಪಡೆಯಬಹುದಾಗಿರುತ್ತದೆ. ಪ್ರಸಕ್ತ ವರ್ಷ ದೇಶದ 124 ಕಾಲೇಜುಗಳಿಗೆ ಈ ಮಾನ್ಯತೆ ನೀಡಲಾಗಿದೆ. ಗುಣಮಟ್ಟದ ಶಿಕ್ಷಣ, ಅಗತ್ಯ ಬೋಧಕ ಸಿಬ್ಬಂದಿ ಹಾಗೂ ಮೂಲಸೌಕರ್ಯ, ಸಂಶೋಧನೆಗೆ ಒತ್ತು ನೀಡುತ್ತಿರುವುದನ್ನು ಪರಿಗಣಿಸಿ ಯುಜಿಸಿ ಮಾನ್ಯತೆ ನೀಡುತ್ತದೆ. ಪೊಟೆನ್ಷಿಯಲ್ ಫಾರ್ ಎಕ್ಸಲೆನ್ಸ್ ಮಾನ್ಯತೆಗೆ ಪಾತ್ರವಾಗುವ ಕಾಲೇಜುಗಳಿಗೆ ವಾರ್ಷಿಕ ರು.1.50 ಕೋಟಿ ಅನುದಾನ ಯುಜಿಸಿಯಿಂದ ದೊರೆಯುತ್ತದೆ.