ಬಿಡದಿ: ಸೆಲ್ಫಿ ತೆಗೆಯುವಲ್ಲಿ ಮಗ್ನರಾಗಿದ್ದವರ ಮೇಲೆ ರೈಲು ಹರಿದು ಮೂವರ ಸಾವು

ಬಿಡದಿ: ರೈಲು ಹಳಿಗಳ ಮೇಲೆ ಸೆಲ್ಫಿ ತೆಗೆದುಕೊಳ್ಳಲು ಹೋಗಿ ಮೂವರು ಮೃತಪಟ್ಟ ಘಟನೆ ಬಿಡದಿ ವಂಡರ್ ಲಾ ಗೇಟ್ ಸಮೀಪ ನಡೆದಿದೆ.

ಸೆಲ್ಫಿ ಕ್ರೇಜ್​ನಿಂದಾಗಿ ಸಂಭವಿಸಿರುವ ದುರ್ಘಟನೆ ಇದಾಗಿದ್ದು ಇಂದು ಬೆಳಗ್ಗೆ 9 ಗಂಟೆಗೆ ಬಿಡದಿ ಬಳಿಯ ವಂಡರ್ ​ಲಾ ಸಮೀಪ ಮಂಚನಾಯಕನ ಹಳ್ಳಿ ಬಳಿಯ ಹಳಿಗಳ ಮೇಲೆ ನಿಂತು ಮೂವರು ವಿದ್ಯಾರ್ಥಿಗಳು ಸೆಲ್ಫಿ ತೆಗೆದುಕೊಳ್ಳುತ್ತಿದ್ದರು. ಹೀಗೆ ರೈಲ್ವೆ ಹಳಿಗಳ ಮೇಲೆ ನಿಂತು ಫೋಟೋ ಕ್ಲಿಕ್ಕಿಸಿಕೊಳ್ಳುತ್ತಿದ್ದಾಗ ವೇಗವಾಗಿ ಬಂದ ರೈಲು ಆ ಮೂವರೂ ವಿದ್ಯಾರ್ಥಿಗಳ ಮೇಲೆ ಹರಿದು ಅವರ ದೇಹಗಳು ಛಿದ್ರಗೊಂಡಿವೆ.

ಶೋಲಾಪುರ -ಮೈಸುರು ಗೋಲ್ ಗುಂಬಜ್ ಎಕ್ಸ್ ಪ್ರೆಸ್ ರೈಲಿನಡಿ ಸಿಲುಕಿ ಈ ವಿದ್ಯಾರ್ಥಿಗಳು ಮೃತಪಟ್ಟಿದ್ದಾರೆ.

ಮೃತದೇಹಗಳ ಗುರುತು ಸಿಗದಷ್ಟು ಛಿದ್ರವಾಗಿದ್ದು ಬಿಡದಿ, ಚೆನ್ನಪಟ್ಟಣ ಠಾಣೆ ಪೋಲೀಸರು ಸ್ಥಳಕ್ಕೆ ಆಗಮಿಸಿ ಪರಿಶೀಲನೆ ನಡೆಸಿದ್ದಾರೆ. ಬಿಡದಿ ಪೋಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.