ಮೈಸೂರು-ಚೆನ್ನೈ ಎಕ್ಸ್'ಪ್ರೆಸ್'ನಲ್ಲಿ ಪ್ರಯಾಣಿಕರೊಂದಿಗೆ 'ರೈಲ್ ಪೆ ಚರ್ಚಾ' ನಡೆಸಿದ ರೈಲ್ವೇ ಸಚಿವ

ಮೈಸೂರು: ಮೈಸೂರು-ಚೆನ್ನೈ ರೈಲಿನಲ್ಲಿ ಸಂಚರಿಸದ ಕೇಂದ್ರ ರೈಲ್ವೇ ಸಚಿವ ಪಿಯೂಷ್ ಗೋಯಲ್ ಅವರು, ಪ್ರಯಾಣಿಕರೊಂದಿಗೆ 'ರೈಲ್ ಪೇ ಚರ್ಚಾ' ಸಂವಾದ ನಡೆಸಿದರು. 

ಬೆಂಗಳೂರು ಮತ್ತು ಮೈಸೂರು ನಡುವೆ ರೈಲ್ವೆ ಮಾರ್ಗದ ವಿದ್ಯುದ್ದೀಕರಣ ಚಾಲನೆ ಸಮಾರಂಭದಲ್ಲಿ ಭಾಗವಹಿಸುವ ಸಲುವಾಗಿ ನಗರಕ್ಕೆ ಆಗಮಿಸಿರುವ ಗೋಯಲ್ ಅವರು, ಬೆಂಗಳೂರಿಗೆ ರೈಲಿನ ಮೂಲಕ ಪ್ರಯಾಣಿಸಿದರು. ಪ್ರಯಾಣದ ವೇಳೆ ಪ್ರಯಾಣಿಕರ ಜೊತೆಗೆ ಸಂವಾದ ನಡೆಸಿ ಪ್ರಯಾಣಿಕರ ಕುಂದುಕೊರತೆಗಳನ್ನು ಆಲಿಸಿದರು. 

ಗೋಯಲ್ ಅವರು ರೈಲಿನ ಸಾಮಾನ್ಯ ಬೋಗಿಯಲ್ಲಿ ಪ್ರಯಾಣ ಮಾಡುತ್ತಿರುವುದನ್ನು ನೋಡಿದ ಪ್ರಯಾಣಿಕರು ಆರಂಭದಲ್ಲಿ ಆಶ್ಚರ್ಯಗೊಂಡರು. ಬಳಿಕ ಸಚಿವರ ಸ್ಲೀಪರ್ ಕೋಚ್ ಬಳಿ ತೆರಳಿ ಪ್ರಯಾಣಿಕರೊಂದಿಗೆ ಮಾತುಕತೆ ನಡೆಸಲು ಆರಂಭಿಸಿದರು. ಈ ವೇಳೆ ಪ್ರಯಾಣದ ಅನುಭವ, ಸೇವೆಗಳು, ಸ್ವಚ್ಛತೆ ಸೇರಿದಂತೆ ವಿವಿಧ ವಿಚಾರಗಳ ಬಗ್ಗೆ ಪ್ರಯಾಣಿಕರನ್ನು ವಿಚಾರಿಸಿ ಸಲಹೆಗಳನ್ನು ಪಡೆದರು.