ಬೆಂಗಳೂರು: ಸಹಪಾಠಿಯಿಂದ ಟೆಕ್ಕಿ ಮೇಲೆ ಅತ್ಯಾಚಾರ; ಆರೋಪಿ ಬಂಧನ

ಕೆಲಸ ಅರಸಿ ಬೆಂಗಳೂರಿಗೆ ಬಂದಿದ್ದ ಪಂಜಾಬ್ ಮೂಲದ ವ್ಯಕ್ತಿ ಈ ಕುಕೃತ್ಯ ಎಸಗಿದ್ದು, ಶಾಲೆಯಲ್ಲಿ ತನ್ನ ಕಿರಿಯ ಸಹಪಾಠಿಯಾಗಿದ್ದ ಯುವತಿ ಮೇಲೆ ಅತ್ಯಾಚಾರವೆಸಗಿದ್ದಾನೆ.  ಆರೋಪಿ ಪ್ರೌಢಶಾಲೆಯಲ್ಲಿ ನನ್ನ ಹಿರಿಯ ಸಹಪಾಠಿಯಾಗಿದ್ದರೂ ಹಲವು ವರ್ಷಗಳಿಂದ ಸಂಪರ್ಕದಲ್ಲಿ ಇರಲಿಲ್ಲ. ಆದರೆ ಇಬ್ಬರಿಗೂ ಸಾಮಾನ್ಯ ಸ್ನೇಹಿತರಾಗಿದ್ದವರ ವಿವಾಹದಲ್ಲಿ ಭೇಟಿ ಮಾಡಿದ್ದರು. ಈ ವೇಳೆ ಯುವತಿಯ ನಂಬರ್ ಪಡೆದಿದ್ದ ಆರೋಪಿ ದಿಲ್ದವೀಂದರ್ ಸಿಂಗ್(25) ಯುವತಿಯೊಂದಿಗೆ ವಾಟ್ಸ್ ಅಪ್ ನಲ್ಲಿ ಚಾಟ್ ಮಾಡುತ್ತಿದ್ದ. ತಾನು ಕೆಲಸ ಅರಸಿ ಬೆಂಗಳೂರಿಗೆ ಬರುವುದಾಗಿ ಯುವತಿಯ ಬಳಿ ಕೆಲವೇ ದಿನಗಳ ಹಿಂದೆ ತಿಳಿಸಿದ್ದ. ಅಂತೆಯೇ ಶುಕ್ರವಾರ (ಮೇ.25) ರಂದು ತಾನು ಬೆಂಗಳೂರಿಗೆ ಬಂದಿರುವುದಾಗಿ ದಿಲ್ದವೀಂದರ್ ಸಿಂಗ್ ಯುವತಿಯ ಬಳಿ ಹೇಳಿದ್ದಾನೆ. 

ಮೇ.25 ರಂದು ಸಂಜೆ ಇಬ್ಬರೂ ಇಂದಿರಾನಗರದಲ್ಲಿರುವ ರೆಸ್ಟೋರೆಂಟ್ ಗೆ ತೆರಳಿದ್ದೆವು. ಆದರೆ ರೆಸ್ಟೋರೆಂಟ್ ಭರ್ತಿಯಾಗಿದ್ದರಿಂದ ಕೋರಮಂಗಲಕ್ಕೆ ತೆರಳಿದೆವು. ಈ ವೇಳೆ ದಿಲ್ದವೀಂದರ್ ಸಿಂಗ್ ನ ಮತ್ತೋರ್ವ ಸ್ನೇಹಿತ ತುಷಾರ್ ಕೂಡ ಜೊತೆಯಾಗಿದ್ದ. ಮೂವರು ಅಲ್ಲಿಂದ ಹೊರಡಬೇಕಾದರೆ ಸಮಯ ಮಧ್ಯರಾತ್ರಿ 1 ಗಂಟೆಯಾಗಿತ್ತು. ಆದ್ದರಿಂದ ನಾನು ನಿನ್ನನ್ನು ಮನೆವರೆಗೂ ಬಿಡುತ್ತೇನೆ ಎಂದು ಬಂದ ದಿಲ್ದವೀಂದರ್ ಸಿಂಗ್ ನನ್ನ ಮೇಲೆ 3-4 ಬಾರಿ ಅತ್ಯಾಚಾರವೆಸಗಿದ್ದಾನೆ ಎಂದು ಸಂತ್ರಸ್ತ ಯುವತಿ ದೂರಿನಲ್ಲಿ ಹೇಳಿದ್ದಾರೆ. 

ದೂರನ್ನು ಆಧರಿಸಿ ಪೊಲೀಸರು ದಿಲ್ದವೀಂದರ್ ಸಿಂಗ್ ನ್ನು ಬಂಧಿಸಿದ್ದು, ವೈದ್ಯಕೀಯ ಪರೀಕ್ಷೆಯಲ್ಲಿಯೂ ಯುವತಿಯ ಮೇಲೆ ಅತ್ಯಾಚಾರ ನಡೆದಿರುವ ಸಾಬೀತಾಗಿದೆ.