ಬೆಂಗಳೂರು: ರಫೇಲ್ ಯುದ್ಧ ವಿಮಾನ ಖರೀದಿಯಲ್ಲಿ ಭ್ರಷ್ಟಾಚಾರ ನಡೆದಿದೆ ಎಂಬು ಆರೋಪಿಸಿ ಎಐಸಿಸಿ ಅಧ್ಯಕ್ಷ ರಾಹುಲ್ ಗಾಂಧಿ ನೇತೃತ್ವದಲ್ಲಿ ಅ.13ರಂದು ಬೆಂಗಳೂರಿನಲ್ಲಿ ನಡೆಸಲು ಉದ್ದೇಶಿಸಿದ್ದ ಪ್ರತಿಭಟನಾ ಸಮಾವೇಶ ಮುಂದೂಡಲಾಗಿದೆ. ಆದರೆ, ದೇಶಕ್ಕೆ ಹೆಚ್ಎಎಲ್ ಕೊಡುಗೆ ಬಗ್ಗೆ ಸಂಸ್ಥೆಯ ನಿವೃತ್ತ ನೌಕರರು, ಅಧಿಕಾರಿಗಳು ಹಾಗೂ ಗಣ್ಯರೊಂದಿಗೆ ರಾಹುಲ್ ಗಾಂಧಿ ನಡೆಸಲಿರುವ ಸಂವಾದ ನಿಗದಿಯಂತೆ ನಡೆಯುತ್ತದೆ ಎಂದು ಕೆಪಿಸಿಸಿ ಅಧ್ಯಕ್ಷ ದಿನೇಶ್ ಗುಂಡೂರಾವ್ ಅವರು ಗುರುವಾರ ಹೇಳಿದ್ದಾರೆ.
ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, 1 ಲಕ್ಷ ಜನರನ್ನು ಸೇರಿಸಿ ರಾಹುಲ್ ನೇತೃತ್ವದಲ್ಲಿ ಬೃಹತ್ ಸಮಾವೇಶವನ್ನು ಆಯೋಜಿಸಲು ಉದ್ದೇಶಿಸಿತ್ತು. ಆದರೆ, ರಾಹುಲ್ ಗಾಂಧಿ ಅವರು ಬೇರೆ ಕಾರ್ಯಕ್ರಮಗಳಲ್ಲಿ ಪಾಲ್ಗೊಳ್ಳುತ್ತಿರುವುದರಿಂದ ಈ ಸಮಾವೇಶವನ್ನು ಮುಂದೂಡಲಾಗಿದೆ. ಶೀಘ್ರದಲ್ಲಿಯೇ ಮತ್ತೊಂದು ದಿನ ನಿಗದಿಪಡಿಸಿ ಸಮವೇಶ ನಡೆಸಲಾಗುವುದು ಎಂದು ತಿಳಿಸಿದರು.
ಹೆಚ್ಎಎಲ್ ಕೊಡುಗೆ ಬಗ್ಗೆ ರಾಹುಲ್ ಗಾಂಧಿಯವರು ಸಂಸ್ಥೆಯ ನಿವೃತ್ತ ನೌಕರರು, ಅಧಿಕಾರಿಗಳು ಹಾಗೂ ಗಣ್ಯರೊಂದಿಗಿನ ಸಂವಾದ ನಿಗದಿಯಂತೆಯೇ ಅ.13ರಂದೇ ನಡೆಯಲಿದೆ. ಸಂವಾದ ರದ್ದಾಗಿಲ್ಲ, ಈ ಸಂವಾದವನ್ನು ಕಾಂಗ್ರೆಸ್ ಆಯೋಜಿಸಿಲ್, ಬದಲಾಗಿ ಖಾಸಗಿ ಸಂಘಟನೆಗಳು ಆಯೋಜಿಸಿವೆ ಎಂದಿದ್ದಾರೆ.
ರಾಹುಲ್ ಸಂವಾದಕ್ಕೆ ಹೆಚ್ಎಎಲ್ ಅವಕಾಶ ನಿರಾಕರಿಸಿದೆಯಲ್ಲ ಎಂಬ ಪ್ರಶ್ನೆಗೆ ಇದೇ ವೇಳೆ ಉತ್ತರಿಸಿರುವ ಅವರು, ಸಂವಾದವನ್ನು ಕೆಪಿಸಿಸಿ ಆಯೋಜಿಸಿಲ್ಲ. ಖಾಸಗಿ ಸಂಘಟನೆಗಳು ಆಯೋಜಿಸಿರುವುದು. ಅನುಮತಿ ಕೇಳಿದ್ದರೆ ತಾನೆ ಅವಕಾಶ ನಿರಾಕರಿಸುವ ಪ್ರಶ್ನೆ ಬರುತ್ತದೆ. ಕೆಪಿಸಿಸಿ ಇಂತಹ ಯಾವುದೇ ಅನುಮತಿ ನೀಡುವಂತೆ ಹೆಚ್ಎಎಲ್ ಅನ್ನು ಕೋರಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.
