ಬೆಂಗಳೂರು: ಫ್ಯಾನ್ಸಿ ನಂಬರ್‌ಗಾಗಿ ಪಾವತಿಸಿದ ಹಣ ವಾಪಾಸ್ ನೀಡುವಂತೆ ಓಲಾಗೆ ಆದೇಶ

ಬೆಂಗಳೂರು: ಗ್ರಾಹಕರೊಬ್ಬರು ತಮ್ಮ ವಾಹನಕ್ಕೆ ಫ್ಯಾನ್ಸಿ ನಂಬರ್‌ಗಾಗಿ ಹಣ ಪಾವತಿಸಿದ್ದರೂ ಕಾಯದೆ ವಾಹನ ನೋಂದಾಯಿಸಿದ ಕಾರಣ ಓಲಾ ಎಲೆಕ್ಟ್ರಿಕ್ ಟೆಕ್ನಾಲಜೀಸ್ ಪ್ರೈವೇಟ್ ಲಿಮಿಟೆಡ್ ಈಗ ಆ ಹಣವನ್ನು ವಾಪಸ್ ನೀಡಬೇಕಾಗಿದೆ.

ಬೆಂಗಳೂರಿನ ಮಾರತ್ತಹಳ್ಳಿ ನಿವಾಸಿ ವಿವೇಕ್ ಅಲಹರಿ ಅವರು ಫ್ಯಾನ್ಸಿ ನಂಬರ್‌ಗಾಗಿ ಪ್ರಾದೇಶಿಕ ಸಾರಿಗೆ ಕಚೇರಿಗೆ(ಆರ್‌ಟಿಒ) 25,000 ರೂ.ಪಾವತಿಸಿದ್ದರು. ಆದರೆ ಓಲಾ ಫ್ಯಾನ್ಸಿ ನಂಬರ್ ಗಾಗಿ ಕಾಯದೆ ಅವರ ವಾಹನವನ್ನು ಸಾಮಾನ್ಯ ನೋಂದಣಿ ಸಂಖ್ಯೆಗೆ ನೋಂದಾಯಿಸಿದೆ.

ಈ ಸಂಬಂಧ ವಿವೇಕ್ ಅಲಹರಿ ಅವರು ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗಕ್ಕೆ ದೂರು ನೀಡಿದ್ದರು. ಅರ್ಜಿ ವಿಚಾರಣೆ ನಡೆಸಿದ ಬೆಂಗಳೂರು ನಗರ ಎರಡನೇ ಹೆಚ್ಚುವರಿ ಜಿಲ್ಲಾ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗದ ಅಧ್ಯಕ್ಷ ಎಂ.ಎಸ್.ರಾಮಚಂದ್ರ, ಸದಸ್ಯರಾದ ಚಂದ್ರಶೇಖರ ಎಸ್.ನೂಲ ಮತ್ತು ನಂದಿನಿ ಎಚ್.ಕುಂಬಾರ್ ಅವರನ್ನೊಳಗೊಂಡ ಪೀಠ, ಅರ್ಜಿದಾರರಿಗೆ 25,000 ರೂ. ಜೊತೆಗೆ, ಶೇ. 8 ರಷ್ಟು ಬಡ್ಡಿಯೊಂದಿಗೆ, 10,000 ರೂ ಪರಿಹಾರ ಮತ್ತು 5,000 ರೂ ವ್ಯಾಜ್ಯ ವೆಚ್ಚವನ್ನು ಪಾವತಿಸುವಂತೆ ಓಲಾಗೆ ಆದೇಶಿಸಿದೆ.

ಇದನ್ನು ಓದಿ: ದೋಷಪೂರಿತ ನಂಬರ್ ಪ್ಲೇಟ್‍: 1.12 ಕೋಟಿ ರೂ. ದಂಡ ಸಂಗ್ರಹಿಸಿದ ಪೊಲೀಸರು

ವಿವೇಕ್ ಅವರು ಡಿಸೆಂಬರ್ 18, 2022 ರಂದು, ಓಲಾದಿಂದ 1.65 ಲಕ್ಷ ರೂ.ಗೆ ಖರೀದಿಸಿದ ವಾಹನದ ನೋಂದಣಿಗಾಗಿ ಕರೆ ಬಂದಿದೆ, ನೋಂದಣಿ ಸಂಖ್ಯೆ. ಕೆಎ-03 ಕೆಜೆ-9636 ಇದೆ. ಆದರೆ ಅವರು ಕೆಎ-03-ಕೆಕೆ-0003 ಎಂಬ ಫ್ಯಾನ್ಸಿ ನಂಬರ್‌ಗೆ ಹಣ ಪಾವತಿಸಿದ್ದು, ಸಾರಿಗೆ ಇಲಾಖೆಗೆ 25 ಸಾವಿರ ರೂ. ಪಾವತಿಸಿದ ರಸೀದಿಯನ್ನು ನೀಡಿದ್ದರು. 

ಅದರ ಹೊರತಾಗಿಯೂ, ಓಲಾ ವಾಹನವನ್ನು ನೋಂದಣಿ ಸಂಖ್ಯೆ. KA-03 KJ-9636ಕ್ಕೆ ನೋಂದಣಿ ಮಾಡಿದೆ. ಇದರ ನಂತರ ವಿವೇಕ್ ಅವರು ತಮ್ಮ ಕೋರಿಕೆಯನ್ನು ಪರಿಗಣಿಸಿ ಸೂಕ್ತ ಸೇವೆ ಸಲ್ಲಿಸಲು ಓಲಾ ವಿಫಲವಾಗಿದೆ ಎಂದು ಆರೋಪಿಸಿ ಆಯೋಗಕ್ಕೆ ದೂರು ನೀಡಿದ್ದರು.