ವಾಣಿಜ್ಯ ವಾಹನಗಳ ನೋಂದಣಿ ಶುಲ್ಕ ಮೇ 1 ರಿಂದ ಏರಿಕೆ

ಬೆಂಗಳೂರು: ನಿರ್ಮಾಣ ವಲಯದಲ್ಲಿ ಬಳಸುವ ಮತ್ತು 10 ಲಕ್ಷ ರೂ. ಒಳಗಿನ ವಾಣಿಜ್ಯ ವಾಹನಗಳ ನೋಂದಣಿ ಶುಲ್ಕ ಮೇ 1 ರಿಂದ ಏರಿಕೆಯಾಗಲಿದೆ.

ವಾಣಿಜ್ಯ ವಾಹನ ನಿರ್ವಾಹಕರ ವಿರೋಧದ ಹೊರತಾಗಿಯೂ, ರಾಜ್ಯ ಸರ್ಕಾರವು ಮೇ 1 ರಂದು ಕರ್ನಾಟಕ ಮೋಟಾರು ವಾಹನ ತೆರಿಗೆ (ತಿದ್ದುಪಡಿ) ಕಾಯ್ದೆಯನ್ನು ಜಾರಿಗೆ ತರುತ್ತಿದೆ.

ಕಳೆದ ವಿಧಾನ ಮಂಡಲ ಅಧಿವೇಶನದಲ್ಲಿ ಅನು ಮೋದನೆ ನೀಡಲಾಗಿದ್ದ ಕರ್ನಾಟಕ ಮೋಟಾರು ವಾಹನಗಳ ತೆರಿಗೆ ನಿರ್ಧರಣೆ (ತಿದ್ದುಪಡಿ) ವಿಧೇಯಕಕ್ಕೆ ರಾಜ್ಯಪಾಲರು ಅನುಮೋದನೆ ನೀಡಿದ್ದು, ಅದರಂತೆ ರಾಜ್ಯ ಸರ್ಕಾರ ಆದೇಶ ಹೊರಡಿಸಿದೆ.

10 ಲಕ್ಷ ರೂ.ಗಿಂತ ಕಡಿಮೆ ಬೆಲೆಯ ಕ್ಯಾಬ್‌ಗಳಿಗೆ ಜೀವಿತಾವಧಿ ತೆರಿಗೆಯು ವಾಹನದ ವೆಚ್ಚದ ಶೇ.5 ಆಗಿರುತ್ತದೆ. ಇಲ್ಲಿಯವರೆಗೆ, ಏಕಕಾಲದಲ್ಲಿ 10 ಲಕ್ಷ ರೂ.ಗಿಂತ ಕಡಿಮೆ ಬೆಲೆಯ ವಾಣಿಜ್ಯ ವಾಹನಗಳಿಗೆ (ಟ್ಯಾಕ್ಸಿಗಳು) ಜೀವಿತಾವಧಿ ತೆರಿಗೆಗಳನ್ನು ವಿಧಿಸಲಾಗುತ್ತಿರಲಿಲ್ಲ, ಬದಲಿಗೆ ನಾಲ್ಕು ಆಸನಗಳ ವಾಹನಕ್ಕೆ ಪ್ರತಿ ಸೀಟಿಗೆ 100 ರೂ. ದರದಲ್ಲಿ ತ್ರೈಮಾಸಿಕವಾಗಿ ತೆರಿಗೆಗಳನ್ನು ಸಂಗ್ರಹಿಸಲಾಗುತ್ತಿತ್ತು.

ಹೀಗಾಗಿ ವಾರ್ಷಿಕವಾಗಿ 10 ಲಕ್ಷ ರೂ. ಒಳಗೆ ಬೆಲೆಯ ಪ್ರತಿಯೊಂದು ವಾಣಿಜ್ಯ ವಾಹನವು ಸೆಸ್ ಸೇರಿದಂತೆ ಸುಮಾರು 1,800 ರೂ. ತೆರಿಗೆಯನ್ನು ಪಾವತಿಸುತ್ತಿತ್ತು. ಆದರೆ, ಈಗ ಸ್ಲ್ಯಾಬ್‌ಗಳನ್ನು ಪರಿಷ್ಕರಿಸಲಾಗಿದೆ. ಏಕಕಾಲದಲ್ಲಿ ಜೀವಿತಾವಧಿ ತೆರಿಗೆಯನ್ನು ಪಾವತಿಸಬೇಕಾಗಿದೆ ಎಂದು ಕರ್ನಾಟಕ ರಾಜ್ಯ ಪ್ರಯಾಣ ನಿರ್ವಾಹಕರ ಸಂಘದ ಅಧ್ಯಕ್ಷ ಕೆ. ರಾಧಾಕೃಷ್ಣ ಹೊಳ್ಳ ಅವರು ಹೇಳಿದ್ದಾರೆ.

ತಿದ್ದುಪಡಿ ಕಾಯ್ದೆಯಂತೆ 10 ಲಕ್ಷ ರೂ.ಗಳ ಒಳಗಿನ ಬೆಲೆಯ ವಾಹನಗಳನ್ನು ಹೆಚ್ಚಾಗಿ ವಾಣಿಜ್ಯ ವಾಹನಗಳಾಗಿರುತ್ತವೆ. ಇವರು ನೋಂದಣಿ ಸಮಯದಲ್ಲಿ ಒಂದೇ ಬಾರಿಗೆ ಸುಮಾರು 50,000 ರೂ.ಗಳ ಜೀವಿತಾವಧಿ ತೆರಿಗೆಯನ್ನು ಪಾವತಿಸಬೇಕಾಗುತ್ತದೆ.

ನವೀಕರಿಸಿದ ಸ್ಲ್ಯಾಬ್‌ಗಳ ಪ್ರಕಾರ, 10-15 ಲಕ್ಷ ರೂ.ಗಳ ಒಳಗೆ ಬೆಲೆಯ ವಾಹನಗಳನ್ನು ಖರೀದಿಸುವವರು ವಾಹನ ವೆಚ್ಚದ ಶೇ.9 ಅನ್ನು ಜೀವಿತಾವಧಿ ತೆರಿಗೆಯಾಗಿ ಪಾವತಿಸಬೇಕಾಗುತ್ತದೆ. 15 ಲಕ್ಷ ರೂ. ಮತ್ತು ಅದಕ್ಕಿಂತ ಹೆಚ್ಚಿನ ಬೆಲೆಯ ವಾಹನಗಳನ್ನು ಖರೀದಿಸುವವರು ವಾಹನ ವೆಚ್ಚಕ್ಕೆ ಶೇ.15ರಷ್ಟು ಹಣ ಪಾವತಿಸಬೇಕಾಗುತ್ತದೆ ಎಂದು ತಿಳಿಸಿದ್ದಾರೆ.

10 ಲಕ್ಷ ರು. ಮೌಲ್ಯದ ವಾಹನಗಳ ಜೊತೆಗೆ ಇದೀಗ ಎಲೆಕ್ಟಿಕ್ ವಾಹನಗಳಿಗೆ ಹೊಸದಾಗಿ ಜೀವಿತಾವಧಿ ತೆರಿಗೆ ವಿಧಿಸಲಾಗುತ್ತಿದೆ. ನೂತನ ತಿದ್ದುಪಡಿ ಕಾಯ್ದೆ ಪ್ರಕಾರ 25 ಲಕ್ಷ ರು.ಗೂ ಹೆಚ್ಚಿನ ಮೌಲ್ಯದ ವಾಣಿಜ್ಯ ಉದ್ದೇಶಕ್ಕೆ ಬಳಸುವ ಎಲೆಕ್ನಿಕ್ ವಾಹನಗಳಿಗೆ ವಾಹನ ಮೌಲ್ಯದ ಶೇ.10ರಷ್ಟನ್ನು ತೆರಿಗೆ ರೂಪದಲ್ಲಿ ಪಾವತಿಸಬೇಕಿದೆ. ಇನ್ನು ಮುಂದೆ ವಾಣಿಜ್ಯ ವಾಹನ ಹಾಗೂ ಕಟ್ಟಡ ನಿರ್ಮಾಣ ಸಾಮಗ್ರಿ ಸಾಗಣೆ ವಾಹನಗಳ ಖರೀದಿ ವೇಳೆ ಜೀವಿತಾವಧಿ ತೆರಿಗೆ ಹೆಚ್ಚಿನಪಾವತಿಸಬೇಕಿದೆ.

25 ಲಕ್ಷ ರೂ.ಗಳಿಗಿಂತ ಹೆಚ್ಚಿನ ಬೆಲೆಯ ಎಲೆಕ್ಟ್ರಿಕ್ ವಾಹನಗಳನ್ನು ಖರೀದಿಸುವವರಿಗೆ ವಿನಾಯಿತಿ ನೀಡಲಾಗಿದೆ. ಆದರೆ. ಈದ ಅಂತಹ ವಾಹನಗಳನ್ನು ಖರೀದಿಸುವವರು ವಾಹನ ವೆಚ್ಚದ ಶೇ.10ರಷ್ಟು ಪಾವತಿಸಬೇಕಾಗುತ್ತದೆ. ಎಲೆಕ್ಟ್ರಿಕ್ ವಾಹನಗಳನ್ನು ಅಳವಡಿಸಿಕೊಳ್ಳುವಲ್ಲಿ ಕರ್ನಾಟಕ ಇನ್ನೂ ಹಿಂದುಳಿದಿದೆ. ಈ ಹಂತದಲ್ಲಿ, ಸರ್ಕಾರವು ಇ-ವಾಹನಗಳ ಮೇಲೆ ತೆರಿಗೆ ವಿಧಿಸಬಾರದು. ಇದು ಜನರನ್ನು ನಿರುತ್ಸಾಹಗೊಳಿಸುತ್ತದೆ ಎಂದು ರಾಧಾಕೃಷ್ಣ ಹೊಳ್ಳ ಅವರು ಬೇಸರ ವ್ಯಕ್ತಪಡಿಸಿದ್ದಾರೆ.