ರಾಜಕೀಯ ಸನ್ಯಾಸ ಸ್ವೀಕರಿಸುವವರಿಗೆ ಧೀಕ್ಷೆ ನೀಡುವವರಾರು?

ಪಿ.ಜೆ. ರಾಘವೇಂದ್ರ, ಮೈಸೂರು
ರಾಜಕೀಯ ಸನ್ಯಾಸ ಸ್ವೀಕರಿಸುವವರಿಗೆ ಧೀಕ್ಷೆ ನೀಡುವವರಾರು?
-ಈಗಾಗಲೇ ರಾಜಕೀಯ ಮಾಡುತ್ತಿರುವ ಸನ್ಯಾಸಿಗಳು!

ವಿ. ಹೇಮಂತ್‌ಕುಮಾರ್, ಬೆಂಗಳೂರು
ಸನ್ಯಾಸಿಗಳ ಹತ್ತಿರ ಮೊಬೈಲ್ ಇರಲು ಕಾರಣ?
ದೇವರು ಮಿಸ್ಡ್ ಕಾಲ್ ಕೊಡಬಹುದು ಎಂಬ ಭ್ರಮೆ!

ಹರಳಹಳ್ಳಿ ಪುಟ್ಟರಾಜು, ಪಾಂಡವಪುರ
ನಮ್ಮ ದೇಶದಲ್ಲಿ ಬೇರೆ ಕ್ರೀಡೆಗಳಿಗಿಂತ ಕ್ರಿಕೆಟ್ಟನ್ನು ಹೆಚ್ಚು ಇಷ್ಟಪಡುವುದೇಕೆ?
-ಅದರಲ್ಲಿ ಚಿಯರ್ ಗರ್ಲ್ಸ್ ಇರುತ್ತಾರಲ್ಲ!

ಎಂ.ಬಿ. ಕೃಷ್ಣಮೂರ್ತಿ, ಚಾಮರಾಜನಗರ
ಇತ್ತೀಚಿನ ದಿನಗಳಲ್ಲಿ ನನ್ನ ಬಾಲ್ಯದ ನೆನಪು ಮರುಕಳಿಸುತ್ತಿದೆಯಲ್ಲ?
-ಯೌವ್ವನದ್ದು ಸರಿಯಾಗಿ 'ಸೇವ್‌' ಆಗಿಲ್ಲಾನ್ಸುತ್ತೆ!

ನೇರಲಗುಡ್ಡ ಶಿವಕುಮಾರ್, ಶಿರಾ
ವಿಚ್ಛೇದನಗಳೂ ಸ್ವರ್ಗದಲ್ಲೇ ನಿಶ್ಚಯವಾಗುತ್ತವೆಯಂತೆ?
-ಆದರೂ ಇಲ್ಲಿ ನೀವು ಕೋರ್ಟ್‌ಗೆ ಅಲೆಯಲೇಬೇಕು!

ಮೊಳಕಾಲ್ಮೂರು ಸುರೇಶ್, ಬಳ್ಳಾರಿ
ವಿದ್ಯಾದಾನ, ಅನ್ನದಾನ, ಕನ್ಯಾದಾನಕ್ಕಿಂತ ಮಿಗಿಲಾದ ದಾನ ಯಾವುದಣ್ಣ?
-'ಮತದಾನ' ಅಂತ ಎಷ್ಟು ಹೇಳಿದ್ರೂ ಬೆಂಗಳೂರಿನ ಬುದ್ಧಿವಂತರಿಗೆ ಅರ್ಥವೇ ಆಗಿಲ್ಲ!

ನೇತ್ರಾ ಆನೆಕೆರೆ, ಮಂಡ್ಯ
ಜೀವನವೆಂಬ ಈರುಳ್ಳಿಯನ್ನು ಬಿಚ್ಚುತ್ತಾ ಹೋದರೆ ಸಿಗುವುದೇನು?
-ಅದನ್ನು ಬಿಚ್ಚುತ್ತಾ ಕುಳಿತರೆ ಕಣ್ಣೀರು ಬರುತ್ತೆ, ಸುಮ್ಮನೆ ಹೋಳುಮಾಡಿ ಸಾಂಬಾರ್ ಮಾಡಿಬಿಡಬೇಕು!

ಲಕ್ಷ್ಮೀ ಬರ್ಕ್‌ಲಿ ರಮೇಶ್, ಮಂಡ್ಯ
ಈ ದೇಶ ಚೆಂದ, ಈ ಮಣ್ಣು ಚೆಂದ, ಆದರೆ ಈ ಜನರು?
-ಕೆಲವರು ಚೆಂದ, ಹಲವರು ಮಂದ!



-  ಎಸ್.ವಿ. ಪದ್ಮನಾಭ