ಹನಿಗವನ, ಮಿನಿಗವನ
ಮಿಡಿಕವನ ಮ್ಯಾಕ್ಸಿ ಕವನ
ಭೋರ್ಗರೆದು ಸುರಿದು
ಜಲಪಾತದಂದದಿ ಬರುವ
ಛಂದಸ್ಸು ಅಲಂಕಾರದಿಂದ
ಸಜ್ಜಿತ ಮಹಾಕವನ ಇತ್ಯಾದಿ
ಕವನಗಳು ಮಾರಾಟಕ್ಕಿವೆ...
ಹರೆಯದ ಹುಡುಗ
ಚಿತ್ತ ಚಾಂಚಲ್ಯದಿಂದ
ಕಲಿತ ಕನ್ನಡವನ್ನೆಲ್ಲ ವ್ಯಯಿಸಿ
ಹುಡುಗಿಯ ಕಣ್ಣು ಮೂಗು
ನಡು ನಿತಂಬಗಳ ವರ್ಣಿಸಲು
ಸೃಷ್ಟಿಸಿದ ಚಂದದ ಚಿತ್ತಾರದ
ಕವನಗಳು ಮಾರಾಟಕ್ಕಿವೆ...
ಸಂತೋಷ ಕೂಟಕೂ ಕವನ
ಸಂತಾಪ ಸೂಚನೆಗೂ ಕವನ
ಕವಿಗೋಷ್ಠಿಗಾಗಿಯೇ ತಿಣುಕಿ ತೆಗೆದ
ಸಂತೆಗೆ ಮೂರು ಮೊಳದ
ಸಮಯ ಸಾಧಕ ಕವನ, ಇತ್ಯಾದಿ
ಕವನಗಳು ಮಾರಾಟಕ್ಕಿವೆ...
ಮಂತ್ರಿಯ ಹೊಗಳಲು ಕವನ
ಮಹೋದಯನ ತೆಗಳಲು ಕವನ
ಹೆಸರು ಮಾಡಲು ಕವನ
ಪ್ರಸಿಧ್ಧಿಗಾಗಿಯೂ ಕವನ
ಪ್ರಶಸ್ತಿಯಿದೆಯೋ ಇದೋ
ಸಿದ್ಧವಾಯಿತು ಇನ್‌ಸ್ಟಂಟ್ ಕವನ
ಅದಕೋ ಇದಕೋ ಎದಕೋ ಅಂತೂ
ಕವನಗಳು ಮಾರಾಟಕ್ಕಿವೆ...
ಕವನ ಕೊಳ್ಳಲು ನಿಮ್ಮಲ್ಲಿಲ್ಲವೋ ಧನ, ಮನ
ಚಿಂತೆ ಬೇಡ ಇಲ್ಲಿದೆ ಉತ್ತಮ ವಿಧಾನ
ಕೈಗೆತ್ತಿರಿ ಲೇಖನಿಯ ಈಗಲೇ ನೀವೂ
ಗೀಚಿಬಿಡಿ ಹತ್ತಿಪ್ಪತ್ತು ಹಸಿಬಿಸಿ ಕವನ
ಅರ್ಥವಾಗಲಿ ಬಿಡಲಿ ಓದುಗರ ಕರ್ಮ
ಹೊತ್ತು ಹೊರಡಿರಿ ನೀವೂ ಕೂಗುತಾ
'ಕವನಗಳು ಮಾರಾಟಕ್ಕಿವೆ'
- ಡಾ. ಶಿವಾನಂದ ಕುಬಸದ
smkubsad@gmail.com
