ಹೈದರಾಬಾದ್: ಪ್ರಧಾನಿ ನರೇಂದ್ರ ಮೋದಿ ಅವರ ಕಾರ್ಯವೈಖರಿ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿರುವ ಕೇಂದ್ರ ನಗರಾಭಿವೃದ್ಧಿ ಸಚಿವ ವೆಂಕಯ್ಯ ನಾಯ್ಡು ಅವರು, ಮೋದಿ ಅವರು ಮಲಗೋದಿಲ್ಲ, ತನ್ನ ಸಂಪುಟದ ಸಚಿವರನ್ನೂ ಮಲಗೋಕೆ ಬಿಡುವುದಿಲ್ಲ ಎಂದರು.
ಪ್ರಧಾನಿ ಮೋದಿ ಅವರ ಅಧೀನದಲ್ಲಿ ಕೆಲಸ ಮಾಡಲು ಹೆಚ್ಚು ಖುಷಿಯಾಗುತ್ತದೆ. ಏಕೆಂದರೆ ಜನರಿಗಾಗಿ ಕೆಲಸ ಮಾಡುವುದರಲ್ಲಿ ಹೆಚ್ಚು ಸಂತೋಷ ಸಿಗುತ್ತದೆ ಎಂದರು. ಹೀಗಾಗಿ ಮೋದಿ ಅಡಿಯಲ್ಲಿ ಎಲ್ಲಾ ಸಚಿವರು ಉತ್ಸಾಹದಿಂದ ಕೆಲಸ ಮಾಡುತ್ತಿದ್ದಾರೆ ಎಂದು ವೆಂಕಯ್ಯ ನಾಯ್ಡು ಅವರು ಶ್ಲಾಘಿಸಿದರು.
ದೇಶದಲ್ಲಿರುವ ಪ್ರತಿಯೊಬ್ಬರಿಗೂ ಬ್ಯಾಂಕ್ ಖಾತೆ ಇರಬೇಕೆಂಬ ಗುರಿಯನ್ನು ತಲುಪಲು 5 ವರ್ಷ ಬೇಕಾಗಬಹುದು ಎಂದು ಸಂಪುಟ ಸಚಿವರೆಲ್ಲರೂ ಹೇಳಿದರು. ಆದರೆ ಪ್ರಧಾನಿ ಒಂದೇ ವರ್ಷದಲ್ಲಿ ಇದು ಮುಗಿಯಬೇಕು ಎಂದು ಖಡಾಖಂಡಿತವಾಗಿ ತಿಳಿಸಿದ್ದರು. ಅದರಂತೆ ಜನಧನ ಯೋಜನೆ ಆರಂಭವಾಗಿ ಎರಡು ತಿಂಗಳು ಮುಗಿಯುವದರೊಳಗೆ ಹೊಸದಾಗಿ ಏಳು ಕೋಟಿ ಜನರು ಬ್ಯಾಂಕ್ ಖಾತೆಯನ್ನು ತೆರೆದಿದ್ದಾರೆ. ಮೋದಿಯ ಪ್ರೇರಣೆಯಿಂದಾಗಿಯೇ ಇಂತಹ ಕಾರ್ಯ ಯಶಸ್ವಿಯಾಗುತ್ತಿದೆ ಎಂದು ವೆಂಕಯ್ಯ ನಾಯ್ಡು ಬಣ್ಣಿಸಿದರು.
