ನವದೆಹಲಿ: ನೇತಾಜಿ ಸುಭಾಷ್ ಚಂದ್ರಬೋಸ್ ನ ಕುಟುಂಬ ಮೇಲೆ ನಡೆದಿದ್ದ ಬೇಹುಗಾರಿಕೆ ಬಗ್ಗೆ ಚರ್ಚಿಸಲು ಪ್ರಧಾನಮಂತ್ರಿ ನರೇಂದ್ರ ಮೋದಿ ಬೋಸ್ ಅವರ ಕುಟುಂಬದ ಸದಸ್ಯರಿಗೆ ಆಹ್ವಾನ ನೀಡಿದ್ದಾರೆ.
ಮೇ. 17ಕ್ಕೆ ಮಾತುಕತೆಗೆ ಕರೆದಿರುವ ಮೋದಿ ಅವರು ನೇತಾಜಿ ಅವರಿಗೆ ಸಂಬಂಧಿಸಿದ ರಹಸ್ಯ ಕಡತಗಳನ್ನು ಬಹಿರಂಗಪಡಿಸುವ ಬಗ್ಗೆ ಬೋಸ್ ಕುಟುಂಬದೊಂದಿಗೆ ಮಾತುಕತೆ ನಡೆಸುವ ಸಾಧ್ಯತೆಯಿದೆ.
ಬರ್ಲಿನ್ ನಲ್ಲಿ ಮೋದಿ ಅವರನ್ನು ಭೇಟಿಯಾಗಿದ್ದ ಸೂರ್ಯ ಬೋಸ್ ಈ ಪ್ರಕರಣದ ಬಗ್ಗೆ ತನಿಖೆ ನಡೆಸುವಂತೆ ಒತ್ತಾಯಿಸಿದ್ದರು. ಮೋದಿ ಅವರು ಈ ಪ್ರಕರಣದ ತನಿಖೆಯನ್ನು ಖುದ್ದು ತಾವೇ ಮಾಡುವುದಾಗಿ ಸೂರ್ಯ ಬೋಸ್ ಅವರಿಗೆ ಭರವಸೆ ನೀಡಿದ್ದರು. ನೆಹರೂ ಸರ್ಕಾರ 20 ವರ್ಷಗಳ ಕಾಲ ಬೋಸ್ ಕುಟುಂಬದ ಮೇಲೆ ಬೇಹುಗಾರಿಕೆ ನಡೆಸಿರುವ ವಿಷಯವನ್ನು ಕೇಂದ್ರ ಸರ್ಕಾರವು ಬಹಿರಂಗಪಡಿಸಿತ್ತು. ರಹಸ್ಯ ಫೈಲುಗಳಲ್ಲಿ ಕೇಂದ್ರವು ಕೇವಲ 2 ಫೈಲುಗಳನ್ನು ಬಹಿರಂಗಪಡಿಸಿದ್ದು ದೇಶಾದ್ಯಂತ ವ್ಯಾಪಕ ಚರ್ಚೆಗೆ ಎಡೆಮಾಡಿತ್ತು. ಉಳಿದ ಕಡತಗಳನ್ನು ಕೂಡ ಬಹಿರಂಗ ಪಡಿಸುವಂತೆ ತೀವ್ರ ಒತ್ತಾಯ ಕೇಳಿ ಬಂದಿತ್ತು.
