ಯುರೋಪ್‌ನಲ್ಲೂ ಉಗ್ರ ದಾಳಿ ಭೀತಿ!

ಲಂಡನ್: ಫ್ರಾನ್ಸ್ ಬಳಿಕ ಈಗ ಯುರೋಪ್‌ನ ಇತರೆ ದೇಶಗಳಲ್ಲೂ ಉಗ್ರ ದಾಳಿ ಭೀತಿ ಆರಂಭವಾಗಿದೆ.

ಪ್ಯಾರಿಸ್ ಮಾದರಿಯಲ್ಲೇ ಬ್ರಿಟನ್ ಮೇಲೂ ದಾಳಿ ನಡೆಸಲು ಅಲ್‌ಖೈದಾ ಉಗ್ರರು ಸಂಚು ರೂಪಿಸಿರುವ ವಿಚಾರ ಇದೀಗ ಬಹಿರಂಗವಾಗಿದೆ. ಸಿರಿಯಾದಲ್ಲಿರುವ ಅಲ್ ಖೈದಾ ಉಗ್ರರು ಬ್ರಿಟನ್ ಸೇರಿದಂತೆ ಪಾಶ್ಚಿಮಾತ್ಯ ರಾಷ್ಟ್ರಗಳ ಮೇಲೆ ದಾಳಿ ನಡೆಸಲು ಯೋಜನೆ ರೂಪಿಸುತ್ತಿದ್ದಾರೆ.

ಅದರಲ್ಲೂ ಮುಖ್ಯವಾಗಿ ಈ ದೇಶಗಳ ಪ್ರಮುಖ ಹಾಗೂ ಐತಿಹಾಸಿಕ ಸಾರಿಗೆ ಸಂಪರ್ಕ ಕೇಂದ್ರಗಳೇ ಉಗ್ರರ ಗುರಿ. ಈ ಮೂಲಕ ದೊಡ್ಡ ಮಟ್ಟದ ಜೀವಹಾನಿ ಮಾಡುವುದು ಅವರ ಉದ್ದೇಶ ಎಂದು ಬ್ರಿಟನ್ ಗುಪ್ತಚರ ಸಂಸ್ಥೆ ಎಂಐ5ನ ಮುಖ್ಯಸ್ಥ ಆ್ಯಂಡ್ಯೂ ಪಾರ್ಕರ್ ಎಚ್ಚರಿಸಿದ್ದಾರೆ.

ಬ್ರಿಟನ್ ಪೊಲೀಸರು ಮತ್ತು ಎಂಐ ಗುಪ್ತಚರ ಸಂಸ್ಥೆ ಈಗಾಗಲೇ ಉಗ್ರರ ಮೂರು ದಾಳಿಗಳನ್ನು ವಿಫಲಗೊಳಿಸಿದೆ. ಬ್ರಿಟನ್ ಮೇಲೆ ಉಗ್ರರ ದಾಳಿ ಆತಂಕ ಹೆಚ್ಚಾಗುತ್ತಿದ್ದು, ಭದ್ರತಾ ಸಂಸ್ಥೆಗಳು ಎಲ್ಲ ದಾಳಿಗಳನ್ನು ವಿಫಲಗೊಳಿಸಲು ಸಾಧ್ಯವಿಲ್ಲ ಎಂದು ಹೇಳಿದ್ದಾರೆ.

ಉಗ್ರರ ದಾಳಿ ಹಿನ್ನಲೆಯಲ್ಲಿ ಮುನ್ನೆಚ್ಚರಿಕೆ ಕ್ರಮವಾಗಿ ಬ್ರಿಟನ್‌ನ ಸೂಕ್ಷ್ಮಪ್ರದೇಶಗಳಲ್ಲಿ ಅದರಲ್ಲೂ ಮುಖ್ಯವಾಗಿ ಬಂದರು, ಏರ್‌ಪೋರ್ಟ್, ರೇಲ್ವೇ ನಿಲ್ದಾಣಗಳಲ್ಲಿ ಭದ್ರತೆ ಬಿಗಿಗೊಳಿಸಲಾಗಿದೆ.