ವಾಷಿಂಗ್ಟನ್: ``ಹಿಲರಿಯು ನಾನು ಹಿಂದೆಂದೂ ಭೇಟಿಯಾಗಿರದಂತಹ ಅಮೂಲ್ಯ ಕೊಡುಗೆ. ಸಂಕಷ್ಟದ ಸಂದರ್ಭದಲ್ಲೂ ಆಕೆ ನನ್ನೊಂದಿಗೆ ಕಲ್ಲಿನಂತೆ ನಿಂತಿದ್ದಳು''. ಅಮೆರಿಕದ 2016ರ ಅಧ್ಯಕ್ಷೀಯ ಚುನಾವಣೆಯ ರೇಸ್ ನಲ್ಲಿರುವ ಹಿಲರಿ ಕ್ಲಿಂಟನ್ ಅವರ ಬಗ್ಗೆ ಪತಿ ಬಿಲ್ ಕ್ಲಿಂಟನ್ ಹೇಳಿದ ಮಾತಿದು.
ಸಿಎನ್‍ಎನ್‍ಗೆ ಸಂದರ್ಶನ ನೀಡಿ ಮಾತನಾಡಿದ ಬಿಲ್ ಕ್ಲಿಂಟನ್, ``ಆಕೆ ಏನಾಗಬೇಕೆಂದು ನಾನು ಬಯಸಿದ್ದೆನೋ, ಆ ಕನಸು ನನಸಾಗುವ ಅವಕಾಶವನ್ನು ಕಸಿಯಲು ನನಗೆ ಇಷ್ಟವಿಲ್ಲ. ಆಕೆ ತನ್ನ ರಾಜಕೀಯ ಗುರಿಯನ್ನು ತಲುಪಲು ನಾನು ಬೆಂಬಲ ನೀಡುತ್ತೇನೆ. ನೀನು ನನಗೆ 26 ವರ್ಷಗಳನ್ನು ನೀಡಿದ್ದಿ, ನಾನೂ ನಿನಗೆ 26 ವರ್ಷಗಳನ್ನು ನೀಡುತ್ತೇನೆ.
ಆ ಅವಧಿಯಲ್ಲಿ ಏನೇನು ಮಾಡಬೇಕೆಂದೆನಿಸುತ್ತದೋ ಅದೆಲ್ಲವನ್ನೂ ಸಾಧಿಸು ಎಂದು ಹಿಲರಿ ನ್ಯೂಯಾರ್ಕ್‍ನಿಂದ ಸೆನೇಟ್‍ಗೆ ಆಯ್ಕೆಯಾದಾಗಲೇ ನಾನು ಹೇಳಿದ್ದೆ'' ಎಂದಿದ್ದಾರೆ ಕ್ಲಿಂಟನ್. ಕ್ಲಿಂಟನ್‍ರ ಈ ಸಂದರ್ಶನವು ಭಾನುವಾರ ಪ್ರಸಾರವಾಗಲಿದೆ. ಇದೇ ವೇಳೆ, ಹಿಲರಿ ಅವರ ಪ್ರಚಾರ ರ್ಯಾಲಿಗೆ ನ್ಯೂಯಾರ್ಕ್‍ನಲ್ಲಿ ಶನಿವಾರ ಚಾಲನೆ ನೀಡಲಾಗಿದೆ.
Advertisement