ಅತಿಥಿಗೃಹದ ಮೇಲೆ ದಾಳಿ: 4 ಉಗ್ರರನ್ನು ಹೊಡೆದುರುಳಿಸಿದ ಸೇನೆ

ಕಾಬುಲ್: ಎರಡು ದಿನಗಳಿಂದ ಆಫ್ಘಾನಿಸ್ತಾನ ರಾಜಧಾನಿ ಕಾಬೂಲ್ ನ ರಾಜತಾಂತ್ರಿಕ ವಸತಿ ಗೃಹವನ್ನು ಸುತ್ತವರೆದಿದ್ದ ಉಗ್ರರನ್ನು ಭದ್ರತಾ ಪಡೆಗಳು ಬುಧವಾರ ತೆರವುಗೊಳಿಸಿದ್ದು, ನಾಲ್ವರು ಉಗ್ರರನ್ನು ಹತ್ಯೆ ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ.

ನಿನ್ನೆ ಇದ್ದಕ್ಕಿದ್ದಂತೆ ಮುಸುಕು ಧರಿಸಿದ್ದ ಉಗ್ರರು ಪೊಲೀಸ್ ಹಾಗೂ ಸೇನಾ ಪಡೆಯ ಅತಿಥಿಗೃಹದ ಒಳ ನುಗ್ಗಿ, ಅತಿಥಿ ಗೃಹವನ್ನು ಸುತ್ತುವರೆದಿದ್ದರು. ಕಾಂಪೌಂಡ್ ಸುತ್ತುವರೆದಿದ್ದ ಉಗ್ರರ ಬಳಿ ರಾಕೆಟ್ ಲಾಂಚರ್ ಮತ್ತು ಗ್ರೆನೇಡ್ ಗಳು ಸೇರಿದಂತೆ ಭಾರಿ ಪ್ರಮಾಣದ ಅತ್ಯಾಧುನಿಕ ಶಸ್ತ್ರಾಸ್ತ್ರಗಳಿದ್ದವು ಎಂದು ಹೇಳಲಾಗುತ್ತಿತ್ತು.

ಉಗ್ರರ ದಾಳಿ ವಿರುದ್ಧ ಕಾರ್ಯಾಚರಣೆಗೆ ಮುಂದಾಗಿದ್ದ ಸೇನಾ ಪಡೆಗಳು ನಿರಂತರ ಎರಡುದಿನಗಳ ಕಾಲ ಕಾರ್ಯಾಚರಣೆ ನಡೆಸಿದ್ದು, ಇಂದು ಬೆಳಿಗ್ಗೆ ಎಲ್ಲಾ ಉಗ್ರರನ್ನು ಹತ್ಯೆ ಮಾಡುವ ಮೂಲಕ ಉಗ್ರರಿಂದ ಸುತ್ತುವರೆದಿದ್ದ ಕಾಂಪೌಂಡನ್ನು ತೆರವುಗೊಳಿಸಿದ್ದಾರೆ. ದಾಳಿಯಲ್ಲಿ ಭದ್ರತಾ ಪಡೆಗಳಾಗಲಿ ಅಥವಾ ಸಾರ್ವಜನಿಕರಾಗಲಿ ಯಾರೂ ಹತರಾಗಿಲ್ಲ ಎಂದು ಮೂಲಗಳು ಸ್ಪಷ್ಪಪಡಿಸಿವೆ.