ಜಮ್ಮು: ಅಸಹಿಷ್ಣುತೆ ಕುರಿತಂತೆ ಹೇಳಿಕೆ ನೀಡಿ ಹಲವು ವಿರೋಧಗಳಿಗೆ ಕಾರಣರಾಗಿದ್ದ ನಟ ಅಮಿರ್ ಖಾನ್ ಅವರಿಗೆ ಇದೀಗ ನ್ಯಾಷನಲ್ ಕಾನ್ಫರೆನ್ಸ್ ಮುಖ್ಯಸ್ಥ ಫಾರೂಕ್ ಅಬ್ದುಲ್ಲಾ ಅವರು ಬೆಂಬಲಕ್ಕೆ ನಿಂತಿದ್ದು, ಅಮಿರ್ ವಿರುದ್ಧ ಅಪಪ್ರಚಾರ ಮಾಡಲಾಗಿದೆ ಎಂದು ಶುಕ್ರವಾರ ಹೇಳಿದ್ದಾರೆ.
ಅಸಹಿಷ್ಣುತೆ ಕುರಿತ ಅಮಿರ್ ಹೇಳಿಕೆ ಕುರಿತಂತೆ ಇಂದು ಪ್ರತಿಕ್ರಿಯೆ ನೀಡಿರುವ ಅವರು, ದೇಶ ಬಿಡುತ್ತೇನೆಂದು ಅಮಿರ್ ಯಾವಾಗ ಹೇಳಿದರು. ಅಮಿರ್ ಖಾನ್ ಹೇಳಿಕೆ ನೀಡುವಾಗು ನಾನು ಕೂಡ ಅಲ್ಲೇ ಕುಳಿತಿದ್ದೆ. ದೇಶ ಬಿಡುತ್ತೇನೆಂದು ಅವರು ಎಂದಿಗೂ ಹೇಳಿರಲಿಲ್ಲ. ಭಾರತ ನನ್ನ ದೇಶ. ನಾನು ಇಲ್ಲಿನ ಮಣ್ಣಿಗೆ ಹುಟ್ಟಿದವನು. ಈ ಮಣ್ಣಿಗಾಗಿಯೇ ಸಾಯುತ್ತೇನೆಂದು ಹೇಳಿದ್ದರು ಎಂದು ಹೇಳಿದ್ದಾರೆ.
ಅಮಿರ್ ಖಾನ್ ದೇಶ ಬಿಡುವ ಬಗ್ಗೆ ಮಾತನಾಡಿಯೇ ಇಲ್ಲ ಎಂದಾದ ಮೇಲೆ ಅವರು ದೇಶ ಬಿಡುವ ಪ್ರಶ್ನೆಯೇ ಇಲ್ಲ. ಮಾಧ್ಯಮಗಳು ಅಮಿರ್ ಖಾನ್ ವಿರುದ್ಧ ಅಪಪ್ರಚಾರ ಮಾಡುತ್ತಿದೆ ಎಂದು ಹೇಳಿದ್ದಾರೆ.
