ಕಂಭತ್(ಗುಜರಾತ್): ಇಸ್ಲಾಮಿಕ್ ಸ್ಟೇಟ್ ಆಫ್ ಇರಾಕ್ ಅಂಡ್ ಸಿರಿಯಾ(ಇಸಿಸ್) ಹಾಗೂ ಅಲ್ ಖೈದಾ ಉಗ್ರ ಸಂಘಟನೆಗಳಿಗೆ ಯಾವುದೇ ಧರ್ಮವಿಲ್ಲ. ತಮ್ಮ ಅನುಕೂಲಕ್ಕೆ ತಕ್ಕಂತೆ ಉಗ್ರ ಸಂಘಟನೆಗಳು ಧರ್ಮವನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿದೆ ಎಂದು ಕೇಂದ್ರ ಸಚಿವ ಮುಖ್ತಾರ್ ಅಬ್ಬಾಸ್ ನಖ್ವಿ ತಿಳಿಸಿದ್ದಾರೆ.
ಇಸಿಸ್, ಅಲ್ ಖೈದಾ ಮತ್ತು ಇತರೆ ಉಗ್ರ ಸಂಘಟನೆಗಳು ಮಾನವತೆ ಮತ್ತು ಜಗತ್ತಿನ ಏಳಿಗೆಯ ವಿರೋಧಿಗಳು. ಇಂತಹ ಉಗ್ರವಾದವನ್ನು ತಡೆಯಲು ಸರ್ಕಾರಕ್ಕಿಂತಲೂ ಸಮಾಜ ಹೆಚ್ಚಿನ ಪಾತ್ರ ವಹಿಸಬೇಕಿದೆ. ಕೆಲವೊಂದು ಧಾರ್ಮಿಕ ಸಂಸ್ಥೆಗಳು ತಮ್ಮ ದುಬೋಧನೆಯಿಂದ ಯುವಜನತೆಯನ್ನು ಉಗ್ರವಾದದೆಡೆಗೆ ಸೆಳೆಯುತ್ತಿವೆ. ನಾವು ಒಟ್ಟಿಗೆ ಸೇರಿ ಸಮಾಜ ವಿರೋಧಿ ಶಕ್ತಿಗಳ ವಿರುದ್ಧ ಹೋರಾಡಬೇಕಿದೆ ಎಂದು ನಖ್ವಿ ಅಭಿಪ್ರಾಯ ಪಟ್ಟಿದ್ದಾರೆ.
ಧಾರ್ಮಿಕ ಸಂಸ್ಥೆಗಳು ಮತ್ತು ಅದರ ಮುಖಂಡರು ಉಗ್ರವಾದವನ್ನು ಒಟ್ಟಾಗಿ ವಿರೋಧಿಸಬೇಕು. ದೇಶದ ಶಾಂತಿ ಕದಡಲು ಹೊರಟಿರುವವರಿಗೆ ಸಮಾಜ ಬೆಂಬಲ ನೀಡಬಾರದು, ಅವರನ್ನು ಒಂಟಿ ಮಾಡುವ ಮೂಲಕ ದೇಶದಲ್ಲಿ ಉಗ್ರವಾದಕ್ಕೆ ಸ್ಥಳವಿಲ್ಲ ಎಂಬುದನ್ನು ಅವರಿಗೆ ಮನದಟ್ಟು ಮಾಡಿಕೊಡಬೇಕು ಎಂದು ನಖ್ವಿ ತಿಳಿಸಿದ್ದಾರೆ.
