ಎನ್‌ಜೆಎಸಿ ರದ್ದು ಬಳಿಕ ಕೊಲಿಜಿಯಂನಿಂದ 6 ಹೈಕೋರ್ಟ್‌ಗಳಿಗೆ ನೂತನ ಸಿಜೆ ನೇಮಕ

ನವದೆಹಲಿ:  ಸುಪ್ರೀಂ ಕೋರ್ಟ್‌ನ ಕೊಲಿಜಿಯಂ ಆರು ರಾಜ್ಯಗಳಿಗೆ ನೂತನ ಮುಖ್ಯ ನ್ಯಾಯಮೂರ್ತಿಗಳ ಹೆಸರುಗಳನ್ನು ಸರಕಾರಕ್ಕೆ ಶಿಫಾರಸು ಮಾಡಿದೆ.

ಕರ್ನಾಟಕ ಹೈಕೋರ್ಟ್‌ನ ಈಗ ಪ್ರಭಾರ ಮುಖ್ಯ ನ್ಯಾಯಮೂರ್ತಿಯಾಗಿ ಸೇವೆ ಸಲ್ಲಿಸುತ್ತಿರುವ ನ್ಯಾ.ಸುಬ್ರೊ ಕಮಲ್ ಮುಖರ್ಜಿ ಅವರ ಹೆಸರನ್ನೇ ಸಿಜೆ ಆಗಿ ಕೊಲಿಜಿಯಂ ಶಿಫಾರಸು ಮಾಡಿದೆ.ಜ.26ರಂದು ಹೈಕೋರ್ಟ್ ಸಿಜೆಗಳ ನೇಮಕ ಆದೇಶ ಪ್ರಕಟವಾಗುವ ನಿರೀಕ್ಷೆಯಿದೆ.

ರಾಜಸ್ಥಾನ, ಪಟನಾ, ಗುಜರಾತ್, ಮೇಘಾಲಯ, ಗುವಾಹಟಿ ಹಾಗೂ ಕರ್ನಾಟಕ ಹೈಕೋರ್ಟ್ ಗಳಿಗೆ ಮುಖ್ಯ ನ್ಯಾಯಮೂರ್ತಿಗಳ ನೇಮಕಕ್ಕೆ ಬೇರೆ ರಾಜ್ಯಗಳ ನ್ಯಾಯಮೂರ್ತಿಗಳ ಹೆಸರನ್ನು ಶಿಫಾರಸು ಮಾಡಿದೆ.

ಮೇಘಾಲಯ ಹೈಕೋರ್ಟ್‌ನ ಮುಖ್ಯ ನ್ಯಾಯಮೂರ್ತಿ ಜ.16ರಂದು ನಿವೃತ್ತರಾಗಿದ್ದು, ಉಳಿದ ರಾಜ್ಯಗಳ ಹೈಕೋರ್ಟ್ ಮುಖ್ಯ ನ್ಯಾಯ ಮೂರ್ತಿಗಳು ಕಳೆದ ವರ್ಷವೇ ನಿವೃತ್ತರಾಗಿದ್ದಾರೆ.

ನ್ಯಾಯಮೂರ್ತಿಗಳ ನೇಮಕ ಅಧಿಕಾರ ಹೊಂದಿರುವ 'ರಾಷ್ಟ್ರೀಯ ನ್ಯಾಯಾಂಗ ನೇಮಕ ಆಯೋಗ'ವನ್ನು ಅಸಂವಿಧಾನಿಕ ಎಂದು ಸುಪ್ರೀಂಕೋರ್ಟ್ ಘೋಷಿಸಿದ ಬಳಿಕ ಕೊಲಿಜಿಯಂನಿಂದ ನಡೆದ ಮೊದಲ ಪ್ರಮುಖ ನೇಮಕ ಪ್ರಕ್ರಿಯೆ ಇದಾಗಿದೆ.