ರೈಲ್ವೆ ಹಳಿಯಲ್ಲಿ ನಿಂತು ಸೆಲ್ಫಿ ತೆಗೆಯುತ್ತಿದ್ದ ವಿದ್ಯಾರ್ಥಿ ಜೀವಕ್ಕೆ ಕುತ್ತು

ಚೆನ್ನೈ: ರೈಲ್ವೆ ಹಳಿಯಲ್ಲಿ ನಿಂತು ಸೆಲ್ಫಿ ತೆಗೆಯುತ್ತಿದ್ದ ವಿದ್ಯಾರ್ಥಿಯ ಮೇಲೆ ರೈಲು ಹರಿದು ಸಾವನ್ನಪ್ಪಿರುವ ಘಟನೆ ಚೆನ್ನೈನ ವಂಡಲುರ್ ನಲ್ಲಿ ಭಾನುವಾರ ಸಂಜೆ ನಡೆದಿದೆ.

ದಿನಾ ಅಲಿಯಾಸ್ ದಿನೇಶ್ ಕುಮಾರ್(19) ಮೃತಪಟ್ಟ ವಿದ್ಯಾರ್ಥಿ. ಪೂನಮಲ್ಲಿ ಎಂಬಲ್ಲಿ 12ನೇ ತರಗತಿ ಓದುತ್ತಿದ್ದ ಈತ ಪ್ರವಾಸಕ್ಕಾಗಿ ಐವರು ಸ್ನೇಹಿತರೊಡನೆ ವಂಡಲುರ್ ನಲ್ಲಿರುವ ಅರಿಗ್ನರ್ ಅನ್ನಾ ಜೂಲಾಂಜಿಕಲ್ ಪಾರ್ಕ್ ಗೆ ತೆರಳುತ್ತಿದ್ದನು.

ರೈಲ್ವೆ ಟ್ರ್ಯಾಕ್ ನಲ್ಲಿ ನಿಂತು ತನ್ನ ಸೆಲ್ ಫೋನ್ ನಿಂದ ಸೆಲ್ಫಿ ತೆಗೆದುಕೊಳ್ಳುತ್ತಿರಬೇಕಾದರೆ ಎಲೆಟ್ರಿಕ್ ಮಲ್ಟಿಪಲ್ ಯುನಿಟ್(ಇಎಂಯು)ರೈಲು ಆತನ ಮೇಲೆ ಹರಿದು ಹೋಗಿದೆ. ಸ್ಥಳದಲ್ಲೇ ಆತ ಮೃತಪಟ್ಟಿದ್ದಾನೆ. ಸ್ನೇಹಿತರು ಮದ್ಯಾಪಾನ ಸೇವಿಸಿದ್ದರು, ಆದರೆ, ಮೃತಪಟ್ಟ ವಿದ್ಯಾರ್ಥಿ ಮದ್ಯಪಾನ ಮಾಡಿದ್ದನೋ ಇಲ್ಲವೋ ಎಂಬುದು ವೈದ್ಯಕೀಯ ವರದಿ ಬಂದ ಮೇಲೆ ತಿಳಿಯುತ್ತದೆ ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ.