ಮುಂಬೈ; ದುಬಾರಿ ಬೆಲೆಯ ನೋಟಿನ ಮೇಲೆ ನಿಷೇಧ ಹೇರಿದ ಬಳಿಕ ಕಾಶ್ಮೀರದಲ್ಲಿ ನಡೆಯುತ್ತಿದ್ದ ಕಲ್ಲು ತೂರಾಟ ಹಾಗೂ ಹಿಂಸಾಚಾರ ಪ್ರಕರಣಗಳು ಕಡಿಮೆಯಾಗತೊಡಗಿವೆ ಎಂದು ರಕ್ಷಣಾ ಸಚಿವ ಮನೋಹರ್ ಪರಿಕ್ಕರ್ ಅವರು ಸೋಮವಾರ ಹೇಳಿದ್ದಾರೆ.
ಈ ಕುರಿತಂತೆ ಮಾತನಾಡಿರುವ ಅವರು, ದುಬಾರಿ ನೋಟಿನ ಮೇಲೆ ನಿಷೇಧ ಹೇರುವ ಮೂಲಕ ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ದಿಟ್ಟ ಹೆಜ್ಜೆಯನ್ನು ಇಟ್ಟಿದ್ದಾರೆ. ಇದಕ್ಕೆ ಮೋದಿಯವರಿದೆ ಧನ್ಯವಾದ ಹೇಳಲೇಬೇಕಿದೆ. ನೋಟು ನಿಷೇಧದ ಪರಿಣಾಮ ಭಯೋತ್ಪಾದನೆ, ಖೋಟಾನೋಟು ಹಾಗೂ ಮಾದಕ ವ್ಯಸನಗಳ ಮೇಲೆ ಗಂಭೀರವಾದ ಪರಿಣಾಮವನ್ನು ಬೀರಿದೆ ಎಂದು ಹೇಳಿದ್ದಾರೆ.
ಈ ಹಿಂದೆ ಕಾಶ್ಮೀರದಲ್ಲಿ ಹಿಂಸಾಚಾರ ಸೃಷ್ಟಿಸುವುದಕ್ಕಾಗಿಯೇ ಕಲ್ಲುತೂರಾಟ ನಡೆಸಿದವರಿಗೆ ರು.500 ಹಾಗೂ 1,000 ಹಣವನ್ನು ನೀಡಲಾಗುತ್ತಿತ್ತು. ಇದೀಗ ಮೋದಿಯವರ ಕಠಿಣ ನಿರ್ಧಾರ ಭಯೋತ್ಪಾದನೆಗೆ ನೀಡುತ್ತಿದ್ದ ಆರ್ಥಿಕ ನೆರವಿನ ಮೇಲೆ ಪರಿಣಾಮ ಬೀರತೊಡಗಿದೆ. ಮೋದಿಯವರು ಕಠಿಣ ನಿರ್ಧಾರ ತೆಗೆದುಕೊಂಡ ಕೆಲವೇ ದಿನಗಳಲ್ಲಿ ಕಾಶ್ಮೀರದಲ್ಲಿ ಕಲ್ಲು ತೂರಾಟ ಪ್ರಕರಣಗಳು ಕಡಿಮೆಯಾಗತೊಡಗಿವೆ. ಇದಕ್ಕೆ ಮೋದಿಯವರಿಗೆ ಧನ್ಯವಾದ ಹೇಳಲು ಇಚ್ಛಿಸುತ್ತೇನೆಂದು ತಿಳಿಸಿದ್ದಾರೆ.
ರಕ್ಷಣಾ ಸಚಿವನಾಗಿ ಅಧಿಕಾರಕ್ಕೆ ಬಂದಾಗ, ಗಡಿಯಲ್ಲಿನ ಪರಿಸ್ಥಿತಿ ಕುರಿತಂತೆ ಮಾತ್ರ ನೋಡಿಕೊಳ್ಳುತ್ತೇನೆಂದು ತಿಳಿದಿದ್ದೆ. 17.38 ಲಕ್ಷ ಎಕರೆ ಪ್ರದೇಶಗಳ ರಕ್ಷಣಾ ಇಲಾಖೆಯ ಹತೋಟಿಯಲ್ಲಿದೆ ಎಂಬುದು ಹಾಗೂ ಭಾರತದಲ್ಲಿ ಅತ್ಯಂತ ದೊಡ್ಡ ಜವಾಬ್ದಾರಿಯುತ ಸ್ಥಾನವೆಂದರೆ ರಕ್ಷಣಾ ಸಚಿವ ಸ್ಥಾನ ಎಂಬುದು ನಂತರವಷ್ಟೇ ತಿಳಿದಿತ್ತು.
ಗಡಿಯೇ ಆಗಲೀ, ಆರ್ಥಿಕ ಭದ್ರತೆಯೇ ಆಗಲಿ, ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಧೈರ್ಯ ಹಾಗೂ ಶೂರತೆಯಿಂದ ನಿರ್ಧಾರವನ್ನು ತೆಗೆದುಕೊಂಡಿದ್ದಾರೆ. ಇಂದು ಏನೇ ಆಗಿದ್ದರೂ, ಅದು ನಮ್ಮ ಯೋಧರಿಂದ ಮಾತ್ರ ಸಾಧ್ಯವಾಗಿದೆ. ಗಡಿಯಲ್ಲಿ ಯೋಧರು ಮಾಡುತ್ತಿರುವ ಶ್ರಮವೇ ಇದಕ್ಕೆಲ್ಲಾ ಕಾರಣ. ನಾನು ಮತ್ತು ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಬೆಂಬಲವನ್ನಷ್ಟೇ ನೀಡುತ್ತಿದ್ದೇವೆಂದು ಹೇಳಿದ್ದಾರೆ.
