ತಾಜ್ ಮಹಲ್ ನ್ನು ನಿರ್ನಾಮ ಮಾಡಬೇಕೆಂದಿದ್ದೀರಾ?: ಸರ್ಕಾರಕ್ಕೆ ಸುಪ್ರೀಂ ಪ್ರಶ್ನೆ

ನವದೆಹಲಿ: ತಾಜ್ ಮಹಲ್ ನ್ನು ನಾಶ ಮಾಡಬೇಕು ಎಂದುಕೊಂಡಿದ್ದೀರಾ? ಹೀಗೆಂದು ಸರ್ಕಾರವನ್ನು ಸುಪ್ರೀಂ ಕೋರ್ಟ್ ತರಾಟೆಗೆ ತೆಗೆದುಕೊಂಡಿದೆ. 

ಉತ್ತರ ಪ್ರದೇಶ ಹಾಗೂ ನವದೆಹಲಿ ನಡುವೆ ಹೆಚ್ಚುವರಿ ರೈಲ್ವೆ ಹಳಿಗಳನ್ನು ಹಾಕಲು 400 ಮರಗಳನ್ನು ಕಡಿಯಲು ಅನುಮತಿ ಕೇಳಿದ್ದ ಅರ್ಜಿಯನ್ನು ವಿಚಾರಣೆ ನಡೆಸಿರುವ ಸುಪ್ರೀಂ ಕೋರ್ಟ್ ಸರ್ಕಾರವನ್ನು ಪ್ರಶ್ನಿಸಿದ್ದು, ತಾಜ್ ಮಹಲ್ ವಿಶ್ವವಿಖ್ಯಾತ ಸ್ಮಾರಕವಾಗಿದ್ದು, ಸರ್ಕಾರ ಅದನ್ನು ನಾಶ ಮಾಡಬೇಕು ಎಂದುಕೊಂಡಿದೆಯಾ? ನೀವು ತಾಜ್ ಮಹಲ್ ನ ಇತ್ತೀಚಿನ ಚಿತ್ರ ಗಮನಿಸಿದ್ದೀರಾ? ಹೋಗಿ ಇಂಟರ್ ನೆಟ್ ನಲ್ಲಿ ಹುಡುಕಿ ಎಂದು ನ್ಯಾ. ಮದನ್ ಬಿ ಲೋಕುರ್, ದೀಪಕ್ ಗುಪ್ತಾ ನೇತೃತ್ವದ ಪೀಠ ಕೋರ್ಟ್ ಸರ್ಕಾರಕ್ಕೆ ಹೇಳಿದೆ. 

ಎಂಸಿ ಮೆಹ್ತಾ ಎಂಬುವವರು ತಾಜ್ ಮಹಲ್ ನ್ನು ರಕ್ಷಿಸುವಂತೆ ಸಲ್ಲಿಸಿದ್ದ ಅರ್ಜಿಯನ್ನೂ ಸಹ ಸುಪ್ರೀಂ ಕೋರ್ಟ್ ವಿಚಾರಣೆ ನಡೆಸುತ್ತಿದೆ. ಇದೇ ವೇಳೆ ರೈಲ್ವೆ ಹಳಿ ನಿರ್ಮಾಣಕ್ಕಾಗಿ 450 ಮರಗಳನ್ನು ಕಡಿಯಲು ಅನುಮತಿ ನೀಡುವಂತೆ ಅನುಮತಿ ಕೇಳಿ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ವೇಳೆ ಸುಪ್ರೀಂ ಕೋರ್ಟ್ ಸರ್ಕಾರದ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದೆ.