ನವದೆಹಲಿ: ಜೆಡಿಯುನ ಬಂಡಾಯ ನಾಯಕ ಶರದ್ ಯಾದವ್ ಗೆ ಬೆದರಿಕೆ ಪತ್ರ ಬಂದಿದೆ. ಬಲಪಂಥೀಯ ಗುಂಪಿನಿಂದ ಬಂದ ಪತ್ರ ಎಂದು ಆರೋಪಿಸಲಾಗಿದ್ದು ಬಿಹಾರ ರಾಜಕೀಯದಲ್ಲಿ ಮಧ್ಯಪ್ರವೇಶಿಸದಂತೆ ಮತ್ತು ದೇಶ ವಿರೋಧಿ ಬಣಗಳನ್ನು ಬೆಂಬಲಿಸದಂತೆ ಪತ್ರದಲ್ಲಿ ಶರದ್ ಯಾದವ್ ಅವರಿಗೆ ಎಚ್ಚರಿಕೆ ನೀಡಲಾಗಿದೆ.
ಪತ್ರದ ಬಗ್ಗೆ ಕೇಂದ್ರ ಗೃಹ ಸಚಿವಾಲಯಕ್ಕೆ ಮಾಹಿತಿ ನೀಡಲಾಗಿದೆ. ರಾಜ್ಯ ಸಭಾ ಸದಸ್ಯ ಶರದ್ ಯಾದವ್ ಅವರ ನಿವಾಸದ ವಿಳಾಸಕ್ಕೆ ಅಂಚೆಯಲ್ಲಿ ಪತ್ರ ಬಂದಿದೆ.
ಬಿಹಾರ ಸರ್ಕಾರದ ವಿರುದ್ಧವಾಗಿ ಮಾತನಾಡಬಾರದು ಮತ್ತು ಹಿಂದೂಗಳ ವಿರುದ್ಧವಾಗಿ ನಡೆದುಕೊಂಡರೆ ಅದರ ಪರಿಣಾಮ ಎದುರಿಸಬೇಕಾದೀತು ಎಂದು ಪತ್ರದಲ್ಲಿ ಬೆದರಿಕೆ ಹಾಕಿದ್ದಾರೆ.
ದೇಶ ವಿರೋಧಿ ಬಣಗಳ ಜೊತೆ ಗುರುತಿಸಿಕೊಂಡು ತಾವು ಬಹಳ ದೊಡ್ಡ ತಪ್ಪು ಮಾಡುತ್ತಿದ್ದೀರಿ ಎಂದು ಪತ್ರದಲ್ಲಿ ಶರದ್ ಯಾದವ್ ಅವರನ್ನು ಆರೋಪಿಸಲಾಗಿದೆ.
ಆರ್ ಜೆಡಿ ಮತ್ತು ಕಾಂಗ್ರೆಸ್ ಜೊತೆ ಮೈತ್ರಿ ಮುರಿದುಕೊಂಡು ತಮ್ಮ ಪಕ್ಷದ ನಾಯಕ ನಿತೀಶ್ ಕುಮಾರ್ ಎನ್ ಡಿಎ ಜೊತೆ ಮೈತ್ರಿ ಮಾಡಿಕೊಂಡಿರುವುದನ್ನು ಶರದ್ ಯಾದವ್ ತೀವ್ರವಾಗಿ ವಿರೋಧಿಸಿದ್ದರು.
