ಪಾಟ್ನಾ: ಭಷ್ಟಾಚಾರವನ್ನು ಸಮರ್ಥಿಸಿಕೊಳ್ಳಲು ಜಾತ್ಯಾತೀತತೆಯನ್ನು ಎಂದಿಗೂ ಬಳಕೆ ಮಾಡಬಾರದು ಎಂದು ಬಿಹಾರ ಸಿಎಂ ನಿತೀಶ್ ಕುಮಾರ್ ಶುಕ್ರವಾರ ಹೇಳಿದ್ದಾರೆ.
ಶುಕ್ರವಾರ ವಿಶ್ವಾಸ ಮತ ಯಾಚನೆಗೂ ಮುನ್ನ ಬಿಹಾರ ವಿಧಾನಸಭೆಯಲ್ಲಿ ಮಾತನಾಡಿದ ಸಿಎಂ ನಿತೀಶ್ ಕುಮಾರ್ ಅವರು ಆರ್ ಜೆಡಿ ಸಖ್ಯ ತೊರೆದ ತಮ್ಮ ನಿರ್ಧಾರವನ್ನು ಸಮರ್ಥಿಸಿಕೊಂಡರು. ಈ ವೇಳೆ ಮಾತನಾಡಿದ ಅವರು, ಅಧಿಕಾರ ಎನ್ನುವುದು ರಾಜಭೋಗಕ್ಕಾಗಿ ಅಲ್ಲ. ನಮ್ಮ ಮೇಲೆ ಭರವಸೆ ಇಟ್ಟು ಆರಿಸಿರುವ ಜನರ ಸೇವೆ ಮಾಡುವುದಕ್ಕಾಗಿ. ನಮ್ಮ ಸರ್ಕಾರ ಎಂದಿಗೂ ಭ್ರಷ್ಟಾಚಾರವನ್ನು ಮತ್ತು ದುರಾಡಳಿತವನ್ನು ಸಹಿಸುವುದಿಲ್ಲ. ಜನಪರ ಸರ್ಕಾರ ಮುಂದುವರೆಯುತ್ತದೆ ಮತ್ತು ಬಿಹಾರದ ಅಭಿವೃದ್ಧಿಯತ್ತ ಚಿತ್ತ ಹರಿಸುತ್ತದೆ ಎಂದು ಹೇಳಿದರು.
ಅಂತೆಯೇ ಆರ್ ಜೆಡಿ ಪಕ್ಷದ ವಿರುದ್ಧ ಕಿಡಿಕಾರಿದ ಅವರು, ಭಷ್ಟಾಚಾರವನ್ನು ಸಮರ್ಥಿಸಿಕೊಳ್ಳಲು ಜ್ಯಾತ್ಯಾತೀತತೆಯನ್ನು ಎಂದಿಗೂ, ಯಾರೂ ಬಳಕೆ ಮಾಡಿಕೊಳ್ಳಬಾರದು. ತಪ್ಪು ಹಾದಿಯಲ್ಲಿ ಹಣ ಗಳಿಸುವವರನ್ನು ಜನತೆ ಎಂದೂ ಕ್ಷಮಿಸುವುದಿಲ್ಲ ಎಂದು ನಿತೀಶ್ ಹೇಳಿದರು.
