ಭಯೋತ್ಪಾದನೆಗೆ 'ನಿರ್ಮೂಲನೆ'ಯೇ ಸೂಕ್ತ ಉತ್ತರ: ಮೆಹಬೂಬಾ ಮುಫ್ತಿ ಹೇಳಿಕೆ ಖಂಡಿಸಿದ ಸ್ವಾಮಿ

ನವದೆಹಲಿ: ಉಗ್ರರ ಕುಟುಂಬಸ್ಥರ ಮೇಲೆ ಭದ್ರತಾ ಪಡೆಗಳು, ಪೊಲೀಸರು ದಾಳಿ ಮಾಡಬಾರದು ಎಂಬ ಜಮ್ಮು ಮತ್ತು ಕಾಶ್ಮೀರ ಮುಖ್ಯಮಂತ್ರಿ ಮೆಹಬೂಬಾ ಮುಫ್ತಿಯವರ ಹೇಳಿಕೆಯನ್ನು ಬಿಜೆಪಿ ಹಿರಿಯ ನಾಯಕ ಸುಬ್ರಮಣಿಯನ್ ಸ್ವಾಮಿಯವರು ಗುರುವಾರ ತೀವ್ರವಾಗಿ ಖಂಡಿಸಿದ್ದಾರೆ. 

ಈ ಕುರಿತಂತೆ ಮಾತನಾಡಿರುವ ಅವರು, ಮೆಹಬೂಬಾ ಮುಫ್ತಿಯವರು ಫತ್ವಾ ಹೊರಡಿಸುವ ಹಾಕಿಲ್ಲ. ಅವರು ಅವರ ಅಭಿಪ್ರಾಯವನ್ನಷ್ಟೇ ನೀಡಬಹುದು. ಇಂತಹ ಅಭಿಪ್ರಾಯಗಳನ್ನು ತಿರಸ್ಕರಿಸಬೇಕು. ಉಗ್ರರು ಒಂದು ಸ್ಥಳದಲ್ಲಿ ಅವಿತುಕೊಂಡಿದ್ದಾರೆ ಎಂದರೆ, ಅಲ್ಲಿ ಭದ್ರತಾ ಪಡೆಗಳು ದಾಳಿ ನಡೆಸಬೇಕಾಗುತ್ತದೆ. ಭಯೋತ್ಪಾದನೆಗೆ 'ನಿರ್ಮೂಲನೆಯೇ' ಸೂಕ್ತ ಉತ್ತರ ಎಂದು ಹೇಳಿದ್ದಾರೆ. 

ನಿನ್ನೆಯಷ್ಟೇ ಗಂದೇರ್ಬಲ್ ಜಿಲ್ಲೆಯಲ್ಲಿ ಆಯೋಜಿಸಲಾಗಿದ್ದ ಕಾರ್ಯಕ್ರಮದಲ್ಲಿ ಮಾತನಾಡಿದ್ದ ಮೆಹಬೂಬಾ ಮುಫ್ತಿಯವರು, ಉಗ್ರರು ಜನರನ್ನು ಹತ್ಯೆ ಮಾಡುತ್ತಾರೆ. ಪೊಲೀಸರು ಅವರ ಮನೆಗಳನ್ನು ನಾಶಪಡಿಸುತ್ತಾರೆ. ಆದರೆ, ಭದ್ರತಾ ಪಡೆಗಳಾಗಲೀ ಅಥವಾ ಪೊಲೀಸರಾಗಲೀ ಉಗ್ರರ ಕುಟುಂಬಸ್ಥರ ಮೇಲೆ ದಾಳಿ ಮಾಡಬಾರದು. ಉಗ್ರರು ಹಾಗೂ ಪೊಲೀಸರಿಗಿರುವ ವ್ಯತ್ಯಾಸಗಳನ್ನು ಪೊಲೀಸರು ಕಾಪಾಡಿಕೊಳ್ಳಬೇಕು ಎಂದು ತಿಳಿಸಿದ್ದಾರೆ.