ಚಂಡಿಗಢ: ಅತ್ಯಾಚಾರ ಪ್ರಕರಣದಲ್ಲಿ ರೋಹ್ಟಕ್ ಕಾರಾಗೃಹದಲ್ಲಿ ಜೈಲು ಶಿಕ್ಷೆ ಅನುಭವಿಸುತ್ತಿರುವ ಗುರ್ಮೀತ್ ರಹೀಂ ಸಿಂಗ್ ತಾನು ಭೇಟಿ ಮಾಡಲು ಬಯಸಿರುವ 10 ಮಂದಿಯ ಹೆಸರುಗಳ ಪಟ್ಟಿಯನ್ನು ಅಧಿಕಾರಿಗಳಿಗೆ ನೀಡಿದ್ದಾನೆ.
ಅದರಲ್ಲಿ ತನ್ನ ಆಪ್ತೆ ಹಾಗೂ ದತ್ತು ಪುತ್ರಿ ಹನಿಪ್ರೀತ್ ಹೆಸರು ಕೂಡ ಸೇರಿದೆ. ಆದರೆ ಬಂಧನ ಭೀತಿಯಿಂದ ಹನಿಪ್ರೀತ್ ತಲೆ ಮರೆಸಿಕೊಂಡಿದ್ದಾಳೆ.
ಇನ್ನೂ ಪಟ್ಟಿಯಲ್ಲಿ ರಾಮ್ ರಹೀಂ ತಾಯಿ ನಸೀಬ್ ಕೌರ್, ಕುಟುಂಬದ ಸದಸ್ಯರು. ಡೇರಾ ಸಚ್ಚಾ ಸೌಧದ ಸಿಇಓ ಹೆಸರಿದೆ. ರಾಮ್ ರಹೀಮ್ ಕುಟುಂಬ ರಾಜಸ್ತಾನದ ಶ್ರೀಗಂಗಾ ನಗರದ ಗುರುಸರ್ ಮೋಡಿಯಾ ಗ್ರಾಮದಲ್ಲಿ ವಾಸವಿದೆ.
ಡೇರಾ ಸಚ್ಚಾ ಸೌಧ ಹಿಂಬಾಲಕರಿಂದ ಹರ್ಯಾಣ ಪೊಲೀಸರು ಸೋಮವಾರ 33 ಪರವಾನಗಿ ಇರುವ ಶಸ್ತ್ರಾಸ್ತ್ರಗಳನ್ನು ವಶ ಪಡಿಸಿಕೊಂಡಿದ್ದಾರೆ, ಇದರ ಜೊತೆಗೆ ಕಳೆದ ಕೆಲವು ದಿನಗಳಲ್ಲಿ 27 ಶಸ್ತ್ರಗಳನ್ನು ವಶಕ್ಕೆ ತೆಗೆದುಕೊಂಡಿದ್ದಾರೆ.
ರಾಮ್ ರಹೀಮ್ ಬಂಧನದ ಬಳಿಕ ಆಗಸ್ಟ್ 25 ರಿಂದಲೂ ಸುಧೀರ್ಘವಾಗಿ ಆಶ್ರಮದ ಮೇಲೆ ದಾಳಿ ನಡೆಸಿರುವ ಹರಿಯಾಣ ಪೊಲೀಸರು ಭಾರೀ ಪ್ರಮಾಣದ ಶಸ್ತ್ರಾಸ್ತ್ರಗಳು ಹಾಗೂ ಸ್ಫೋಟಕ ವಸ್ತುಗಳನ್ನು ವಶಕ್ಕೆ ಪಡೆದುಕೊಂಡಿದ್ದಾರೆಂದು ತಿಳಿದುಬಂದಿದೆ.
