ಶ್ರೀನಗರ; ಎಕೆ 47 ಬಂದೂಕು ಸಮೇತ ನಾಪತ್ತೆಯಾಗಿದ್ದ ಜಮ್ಮು ಮತ್ತು ಕಾಶ್ಮೀರದ ವಿಶೇಷ ಪೊಲೀಸ್ ಅಧಿಕಾರಿ ಪಾಕಿಸ್ತಾನ ಬೆಂಬಲಿತ ಹಿಜ್ಬುಲ್ ಮುಜಾಹಿದ್ದೀನ್ ಸಂಘಟನೆಗೆ ಸೇರ್ಪಡೆಗೊಂಡಿದ್ದಾನೆಂದು ಉಗ್ರ ಸಂಘಟನೆಗಳು ಬುಧವಾರ ಹೇಳಿಕೊಂಡಿವೆ.
ಹಿಜ್ಬುಲ್ ಮುಜಾಹಿದ್ದೀನ್ ಉಗ್ರ ಸಂಘಟನೆ ವಕ್ತಾರ ಬುರ್ಹಾನ್-ಉ-ದಿನ್ ಈ ಕುರಿತು ಸ್ಥಳೀಯ ಸುದ್ದಿ ಸಂಸ್ಥೆಯೊಂದಕ್ಕೆ ಹೇಳಿಕೆ ನೀಡಿದ್ದು, ನಾಪತ್ತೆಯಾಗಿರುವ ಪೊಲೀಸ್ ಅಧಿಕಾರಿ ಇರ್ಫಾನ್ ಅಹಮದ್ ದಾರ್ ಅವರು ಉಗ್ರ ಸಂಘಟನೆಗೆ ಸೇರ್ಪಡೆಗೊಂಡಿದ್ದಾನೆಂದು ಹೇಳಿದ್ದಾನೆ.
ವಿಶೇಷ ಪೊಲೀಸ್ ಅಧಿಕಾರಿಯಾಗಿದ್ದ ಇರ್ಫಾನ್ ಅಹಮದ್ ದಾರ್ ಪುಲ್ವಾಮ ಜಿಲ್ಲೆಯ ನೆಹಾಮಾ ಕಕಪೊರ ನಿವಾಸಿಯಾಗಿದ್ದರು. ಪುಲ್ವಾಮ ಪಾಂಪೋರಾದಲ್ಲಿ ಮಂಗಳವಾರ ಎಕೆ 47 ಜೊತೆಗೆ ಇದ್ದಕ್ಕಿದ್ದಂತೆ ನಾಪತ್ತೆಯಾಗಿದ್ದರು.
ಉಗ್ರರ ವಿರುದ್ಧದ ಹೋರಾಟಕ್ಕೆ ಅಹಮದ್ ದಾರ್ ಅವರನ್ನು ತಿಂಗಳುಗಳ ಪ್ಯಾಕೇಜ್ ಆಧಾರದ ಮೇಲೆ ವಿಶೇಷ ಪೊಲೀಸ್ ಅಧಿಕಾರಿಯಾಗಿ ನೇಮಕ ಮಾಡಲಾಗಿತ್ತು ಎಂದು ತಿಳಿದುಬಂದಿದೆ.