ಮುಂಬೈ: ಟಿಕ್‍ಟಾಕ್ ವಿಡಿಯೋಗಳ ಮೂಲಕ ಮತ್ತೊಬ್ಬರನ್ನು ನಗಿಸಲು ಹೋಗಿ ಕೊನೆಗೆ ತಮ್ಮ ಜೀವಕ್ಕೆ ಕುತ್ತು ತಂದುಕೊಳ್ಳುತ್ತಿರುವ ಸನ್ನಿವೇಶಗಳು ಜಾಸ್ತಿಯಾಗುತ್ತಿರುವುದು ದುರಂತವೇ ಸರಿ. ವ್ಯಕ್ತಿಯೋರ್ವ ಟಿಕ್‍ಟಾಕ್ ಮಾಡುವಾಗ ಆಕಸ್ಮಿಕವಾಗಿ ಗುಂಡು ತಗುಲಿ ಮೃತಪಟ್ಟಿದ್ದಾನೆ.
ಮಹಾರಾಷ್ಟ್ರದ ಶಿರಡಿಯಲ್ಲಿ 19 ವರ್ಷ ಪ್ರತೀಕ್ ಸಂತೋಷ್ ವಾಡೆಕರ್ ಎಂಬಾತ ಟಿಕ್‍ಟಾಕ್ ವಿಡಿಯೋ ಮಾಡುವಾಗ ಆತನ ಕೈಯಲ್ಲಿದ್ದ ಪಿಸ್ತೂಲ್ ನಿಂದ ಗುಂಡು ಎದೆಗೆ ಹಾರಿ ಆತನ ಜೀವವನ್ನೇ ತೆಗೆದಿದೆ.
ಕಾರ್ಯಕ್ರಮ ನಿಮಿತ್ತ ಪ್ರತೀಕ್ ಮತ್ತು ಆತನ ಸ್ನೇಹಿತರಾದ ನಿತಿನ್ ಅಶೋಕ್ ಮತ್ತು ಸನ್ನಿ ಪವಾರ್ ಶಿರಡಿಗೆ ಬಂದಿದ್ದರು. ಈ ವೇಳೆ ಹೋಟೆಲ್ ಬುಕ್ ಮಾಡಿದ್ದ ಮೂವರು ಟಿಕ್‍ಟಾಕ್ ವಿಡಿಯೋ ಮಾಡಲು ಮುಂದಾಗಿದ್ದರು. ಈ ವೇಳೆ ಅನಾಹುತ ಸಂಭವಿಸಿದೆ.
