ನವದೆಹಲಿ: ವೈದ್ಯಕೀಯ ಪ್ರವೇಶ ಪರೀಕ್ಷೆ NEET-UG ಅನ್ನು ಈ ಬಾರಿ 14 ವಿದೇಶಿ ನಗರಗಳಲ್ಲಿ ಪರೀಕ್ಷಾ ಕೇಂದ್ರಗಳನ್ನು ಸ್ಥಾಪಿಸಲಾಗಿದ್ದು, ಮೇ 5 ರಂದು ಪರೀಕ್ಷೆ ನಡೆಸಲಾಗುವುದು ಎಂದು ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ ಬುಧವಾರ ಪ್ರಕಟಿಸಿದೆ.
ನೀಟ್-ಯುಜಿ ಕುರಿತು ಈ ತಿಂಗಳ ಆರಂಭದಲ್ಲಿ ನೀಡಲಾದ ಬುಲೆಟಿನ್‌ನಲ್ಲಿ ಅಭ್ಯರ್ಥಿಗಳು ಭಾರತದ ಹೊರಗಿನ ಕೇಂದ್ರಗಳಲ್ಲೂ ಪರೀಕ್ಷೆ ಬರೆಯುವ ಬಗ್ಗೆ ಯಾವುದೇ ಉಲ್ಲೇಖ ಇರಲಿಲ್ಲ. ಈ ಸಂಬಂಧ ಅಭ್ಯರ್ಥಿಗಳಿಂದ ಮನವಿ ಸ್ವೀಕರಿಸಿದ ನಂತರ ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ(NTA) ಈ ಕ್ರಮ ಕೈಗೊಂಡಿದೆ.
"12 ದೇಶಗಳ 14 ವಿದೇಶಿ ನಗರಗಳಲ್ಲಿ ಪರೀಕ್ಷೆ ನಡೆಸಲು ನಿರ್ಧರಿಸಲಾಗಿದೆ" ಎಂದು ಎನ್‌ಟಿಎ ಹಿರಿಯ ನಿರ್ದೇಶಕಿ(ಪರೀಕ್ಷೆಗಳು) ಸಾಧನಾ ಪರಾಶರ್ ಅವರು ತಿಳಿಸಿದ್ದಾರೆ.
ಪರೀಕ್ಷೆ ನಡೆಸುವ 14 ವಿದೇಶಿ ನಗರಗಳೆಂದರೆ ದುಬೈ, ಅಬುಧಾಬಿ ಮತ್ತು ಶಾರ್ಜಾ(ಯುಎಇ); ಕುವೈತ್‌ನಲ್ಲಿ ಕುವೈತ್ ನಗರ; ಥೈಲ್ಯಾಂಡ್ನಲ್ಲಿ ಬ್ಯಾಂಕಾಕ್; ಶ್ರೀಲಂಕಾದಲ್ಲಿ ಕೊಲಂಬೊ; ಕತಾರ್‌ನಲ್ಲಿ ದೋಹಾ; ನೇಪಾಳದ ಕಠ್ಮಂಡು; ಮಲೇಷಿಯಾದ ಕೌಲಾಲಂಪುರ್; ನೈಜೀರಿಯಾದಲ್ಲಿ ಲಾಗೋಸ್; ಬಹ್ರೇನ್‌ನಲ್ಲಿ ಮನಮಾ; ಓಮನ್‌ನಲ್ಲಿ ಮಸ್ಕತ್; ಸೌದಿ ಅರೇಬಿಯಾದಲ್ಲಿ ರಿಯಾದ್; ಮತ್ತು ಸಿಂಗಾಪುರ.
ಭಾರತದಾದ್ಯಂತ 554 ಕೇಂದ್ರಗಳಲ್ಲಿ ನೀಟ್-ಯುಜಿ ಪರೀಕ್ಷೆ ನಡೆಯಲಿದೆ.
Advertisement
