ತಮಿಳು ನಾಡು: ಚಲಿಸುತ್ತಿದ್ದ ರೈಲಿನಲ್ಲಿ ಗರ್ಭಿಣಿ ಮೇಲೆ ಅತ್ಯಾಚಾರವೆಸಗಿ ಹೊರದಬ್ಬಿದ ಯುವಕನ ಬಂಧನ

ತಿರುಪತ್ತೂರು: ತಿರುಪತಿ ಇಂಟರ್‌ಸಿಟಿ ಎಕ್ಸ್‌ಪ್ರೆಸ್‌ನಲ್ಲಿ ನಾಲ್ಕು ತಿಂಗಳ ಗರ್ಭಿಣಿಯಾಗಿದ್ದ 36 ವರ್ಷದ ಮಹಿಳೆಯ ಮೇಲೆ ಅತ್ಯಾಚಾರವೆಸಗಿ ಕೊಲೆಗೆ ಯತ್ನಿಸಿದ ಆರೋಪದ ಮೇಲೆ ವೆಲ್ಲೂರಿನ 30 ವರ್ಷದ ಯುವಕನನ್ನು ಬಂಧಿಸಲಾಗಿದೆ.

ವೆಲ್ಲೂರಿನ ಕೆವಿ ಕುಪ್ಪಂನ ಕೆ. ಹೇಮರಾಜ್ ಆರೋಪಿಯಾಗಿದ್ದು, ಜೋಲಾರ್‌ಪೇಟೆಯಿಂದ ಲಾಥೇರಿಗೆ ಹೋಗುತ್ತಿದ್ದ ರೈಲಿನ ಮಹಿಳಾ ಬೋಗಿಯಲ್ಲಿದ್ದ ಮಹಿಳೆಯನ್ನು ಗುರಿಯಾಗಿಸಿಕೊಂಡು ಕೃಕೃತ್ಯ ಎಸಗಿದ್ದಾನೆ ಎಂದು ತಿಳಿದುಬಂದಿದೆ.

ರೈಲ್ವೆ ಪೊಲೀಸ್ ಮೂಲಗಳ ಪ್ರಕಾರ, ಉಡುಪು ತಯಾರಿಕಾ ಕಂಪನಿಯಲ್ಲಿ ಕೆಲಸ ಮಾಡುವ ತಿರುಪ್ಪೂರಿನ ನಿವಾಸಿ ಮಹಿಳೆ ತನ್ನ ತಾಯಿಯನ್ನು ಭೇಟಿಯಾಗಲು ಚಿತ್ತೂರಿಗೆ ಪ್ರಯಾಣಿಸುತ್ತಿದ್ದರು. ಇಂದು ಗುರುವಾರ ಬೆಳಗ್ಗೆ ಸಾಮಾನ್ಯ ಮಹಿಳಾ ಬೋಗಿಯಲ್ಲಿ ತಿರುಪತಿ ಇಂಟರ್‌ಸಿಟಿ ಎಕ್ಸ್‌ಪ್ರೆಸ್ ಹತ್ತಿದರು. ಆರಂಭದಲ್ಲಿ, ಬೋಗಿಯಲ್ಲಿ ಇತರ ಏಳು ಮಹಿಳಾ ಪ್ರಯಾಣಿಕರಿದ್ದರು, ಆದರೆ ಅವರೆಲ್ಲರೂ ಜೋಲಾರ್‌ಪೇಟೆಯಲ್ಲಿ ಇಳಿದರು.

2022 ರಲ್ಲಿ ಮಹಿಳೆಯರಿಂದ ದರೋಡೆ ಮತ್ತು ಕಿರುಕುಳ ನೀಡಿದ ಆರೋಪ ಹೊಂದಿರುವ ಆರೋಪಿ ಹೇಮರಾಜ್, ಇತರ ಪ್ರಯಾಣಿಕರು ಹೋದ ನಂತರ ಮಹಿಳಾ ಬೋಗಿಗೆ ಪ್ರವೇಶಿಸಿದ್ದಾನೆ. ಮಹಿಳಾ ವಿಭಾಗಕ್ಕೆ ಹತ್ತಿದ್ದೇಕೆ ಎಂದು ಮಹಿಳೆ ಪ್ರಶ್ನಿಸಿದಾಗ ಮುಂದಿನ ನಿಲ್ದಾಣದಲ್ಲಿ ಇಳಿಯುವುದಾಗಿ ಹೇಳಿಕೊಂಡಿದ್ದಾನೆ. ಆದರೆ, ಶೀಘ್ರದಲ್ಲೇ ಆಕೆಯೊಂದಿಗೆ ಅನುಚಿತವಾಗಿ ವರ್ತಿಸಲು ಪ್ರಾರಂಭಿಸಿದನು.

ನಂತರ ಆರೋಪಿಯು ವೆಲ್ಲೂರಿನ ಲಾಥೇರಿ ಬಳಿ ಚಲಿಸುವ ರೈಲಿನಿಂದ ಗರ್ಭಿಣಿಯನ್ನು ತಳ್ಳಿ ಸ್ಥಳದಿಂದ ಪರಾರಿಯಾಗಿದ್ದ. ರೈಲ್ವೆ ಗ್ಯಾಂಗ್‌ಮ್ಯಾನ್ ಗಾಯಗೊಂಡ ಮಹಿಳೆಯನ್ನು ಗಮನಿಸಿ ವೆಲ್ಲೂರಿನ ಸರ್ಕಾರಿ ವೈದ್ಯಕೀಯ ಕಾಲೇಜು ಮತ್ತು ಆಸ್ಪತ್ರೆಗೆ ಕರೆದೊಯ್ದು ಅಲ್ಲಿ ಚಿಕಿತ್ಸೆ ಕೊಡಿಸಿದರು.

ನಿನ್ನೆ ರಾತ್ರಿ ರೈಲ್ವೆ ಪೊಲೀಸ್ ಸಿಬ್ಬಂದಿ ಹೇಮರಾಜ್ ನನ್ನು ಬಂಧಿಸಿದ್ದಾರೆ. ಭಾರತೀಯ ನ್ಯಾಯ ಸಂಹಿತಾ (ಬಿಎನ್‌ಎಸ್) ನ ಸೆಕ್ಷನ್ 115(2), 64 ಆರ್/ಡಬ್ಲ್ಯೂ 62, 74, ಮತ್ತು 109(1) ಮತ್ತು ತಮಿಳುನಾಡು ಮಹಿಳೆಯರ ಮೇಲಿನ ಕಿರುಕುಳ ನಿಷೇಧ (ಟಿಎನ್‌ಪಿಎಚ್‌ಡಬ್ಲ್ಯೂ) ಕಾಯ್ದೆ, 2002 ರ ಸೆಕ್ಷನ್ 4 ರ ಅಡಿಯಲ್ಲಿ ಆತನ ವಿರುದ್ಧ ಎಫ್‌ಐಆರ್ ದಾಖಲಿಸಲಾಗಿದೆ. ಹೆಚ್ಚಿನ ತನಿಖೆಗಳು ನಡೆಯುತ್ತಿವೆ.