ಕೊಲಂಬೋ: ಭಾರತ ವಿರುದ್ಧದ ಎರಡನೇ ಟೆಸ್ಟ್ ಕ್ರಿಕೆಟ್‌ ಪಂದ್ಯದ ಎರಡನೇ ದಿನದಾಟದ ಅಂತ್ಯಕ್ಕೆ ಆತಿಥೇಯ ಲಂಕಾ ಮೂರು ವಿಕೆಟ್ ನಷ್ಟಕ್ಕೆ 140 ರನ್ ಗಳಿಸಿದ್ದು 253 ರನ್ ಗಳ ಹಿನ್ನಡೆ ಅನುಭವಿಸಿದೆ.
ಭಾರತ ಮೊದಲನೇ ಇನ್ನಿಂಗ್ಸ್‌ನಲ್ಲಿ 393 ರನ್‌ಗಳಿಗೆ ಆಲೌಟ್ ಆಯಿತು. ನಂತರ ಬ್ಯಾಟ್ ಮಾಡಿದ ಲಂಕಾ ಮೂರು ವಿಕೆಟ್ ನಷ್ಟಕ್ಕೆ 140 ರನ್ ಪೇರಿಸಿದೆ.
ಲಂಕಾ ಪರ ಕೌಶಲ್‌ ಸಿಲ್ಲಾ 51 ರನ್, ಕರುಣರತ್ನೆ 1 ರನ್ ಹಾಗೂ ಕುಮಾರ ಸಂಗಕ್ಕಾರ 32 ರನ್ ಗಳಿಗೆ ಔಟಾದರು. ದಿನದಾಟದ ಅಂತ್ಯದಲ್ಲಿ ಲಹಿರು ತಿರಿಮನ್ನೆ 28 ರನ್ ಹಾಗೂ ಎಂಜಲೋ ಮ್ಯಾಥ್ಯೂಸ್ 19 ರನ್ ಗಳಿಸಿ ಕಣದಲ್ಲಿದ್ದಾರೆ.
ಭಾರತ ಪರ ಉಮೇಶ್‌ ಯಾದವ್‌, ಅಮಿತ್‌ ಮಿಶ್ರಾ ಮತ್ತು ಅಶ್ವಿ‌ನ್‌ ತಲಾ ಒಂದು ವಿಕೆಟ್ ಪಡೆದಿದ್ದಾರೆ.
ಭಾರತದ ಮೊದಲ ಇನ್ನಿಂಗ್ಸ್‌ನಲ್ಲಿ ಲೋಕೇಶ್‌ ರಾಹುಲ್‌ 108, ವಿರಾಟ್‌ ಕೊಹ್ಲಿ 78, ರೋಹಿತ್‌ ಶರ್ಮಾ 79, ವೃದ್ಧಿಮಾನ್‌ ಸಹಾ 56 ಮತ್ತು ಅಮಿತ್‌ ಮಿಶ್ರಾ 24 ಪೇರಿಸಿದ ರನ್ ತಂಡ 393 ರನ್ ಗಳಿಸಲು ಸಾಧ್ಯವಾಯಿತು.
ಶ್ರೀಲಂಕಾ ವಿರುದ್ಧ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಭಾರತದ ಮೊದಲ ಇನ್ನಿಂಗ್ಸ್ 393 ರನ್‌ಗಳಿಗೆ ಮುಕ್ತಾಯವಾಗಿದೆ. ಇಂದು ಪಂದ್ಯ ಪುನರಾರಂಭವಾದಾಗ ಭಾರತ6 ವಿಕೆಟ್ ಕಳೆದು ಕೊಂಡು 319 ರನ್ ಗಳಿಸಿತ್ತು.
ಶ್ರೀಲಂಕಾದ ರಂಗಣ ಹೆರಾತ್ ನಾಲ್ಕು ವಿಕೆಟ್ ಪಡೆದುಕೊಂಡಿದ್ದಾರೆ. ಧಮ್ಮಿಕ ಪ್ರಸಾದ್, ಏಂಜಲೋ ಮ್ಯಾಥ್ಯೂಸ್, ಚಮೀರ ಮೊದಲಾದವರು ತಲಾ ಎರಡು ವಿಕೆಟ್ ಪಡೆದುಕೊಂಡಿದ್ದಾರೆ.
ಪ್ರಥಮ ಟೆಸ್ಟ್ ಪರಾಭವಗೊಂಡಿರುವ ಟೀಂ ಇಂಡಿಯಾಗೆ ಈ ಪಂದ್ಯ ನಿರ್ಣಾಯಕವಾಗಲಿದೆ.
