ಡ್ರಾದತ್ತ ಮುಖ ಮಾಡಿದ ಭಾರತ-ಬಾಂಗ್ಲಾದೇಶ ಟೆಸ್ಟ್ ಪಂದ್ಯ

ಫಾತುಲ್ಲಾ: ಭಾರತ ಮತ್ತು ಬಾಂಗ್ಲಾದೇಶಗಳ ನಡುವಿನ ಟೆಸ್ಟ್ ಪಂದ್ಯದ 4ನೇ ದಿನವೂ ವರುಣನ ಆರ್ಭಟ ಮುಂದುವರೆದಿದ್ದು, ಪಂದ್ಯ ಡ್ರಾದತ್ತ ಸಾಗಿದೆ.

ನಾಲ್ಕನೇ ದಿನದ 2 ಹಾಗೂ ಮೂರನೇ ಅವಧಿಯಲ್ಲಿ ಮಳೆರಾಯ ಆಗಮಿಸಿದ್ದರಿಂದ ಭಾರತ ಹಾಗೂ ಬಾಂಗ್ಲಾದೇಶ ನಡುವಿನ ಏಕೈಕ ಟೆಸ್ಟ್ ಪಂದ್ಯ ನೀರಸ ಡ್ರಾದತ್ತ ಮುಖಮಾಡಿದೆ. ಮಳೆ ಬಿಡುವು ನೀಡಿದ ಸಮಯದಲ್ಲಿ ಮೊದಲ ಇನಿಂಗ್ಸ್ ಡಿಕ್ಲೇರ್ ಘೊಷಿಸಿ ಆತಿಥೇಯರಿಗೆ ಬ್ಯಾಟಿಂಗ್ ಅವಕಾಶ ನೀಡಿದ ಭಾರತ ತಂಡ ಪ್ರಮುಖ 3 ವಿಕೆಟ್ ಪಡೆಯುವಲ್ಲಿ ಯಶಸ್ವಿಯಾಗಿದೆ.

ಮೂರನೇ ದಿನದಾಟ ಮೊತ್ತ 6 ವಿಕೆಟ್​ಗೆ 462 ರನ್​ಗೆ ಶನಿವಾರ ಡಿಕ್ಲೇರ್ ಘೊಷಿಸಿದ ಭಾರತ ತಂಡದ ನಾಯಕ ವಿರಾಟ್ ಕೊಹ್ಲಿ ಬಾಂಗ್ಲಾ ತಂಡಕ್ಕೆ ಬ್ಯಾಟಿಂಗ್ ನೀಡಿದರು. ನಾಲ್ಕನೇ ದಿನ ಬಾಂಗ್ಲಾ ದಾಂಡಿಗರ ಕಂಗೆಡಿಸಿದ ಭಾರತದ ಸ್ಪಿನ್ನರ್ ಗಳಾದ ಆರ್ ಅಶ್ವಿನ್ ಮತ್ತು ಹರ್ಭಜನ್ ಸಿಂಗ್ ಪ್ರಮುಖ 3 ವಿಕೆಟ್ ಗಳನ್ನು ಕಬಳಿಸಿದ್ದಾರೆ. ಉತ್ತಮವಾಗಿ ಬೌಲಿಂಗ್ ಮಾಡಿದ ಆರ್.ಅಶ್ವಿನ್ 11.1 ಓವರ್ ಗಳಲ್ಲಿ ಕೇವಲ 30 ರನ್ ತಮೀಮ್ ಇಕ್ಬಾಲ್ ಮತ್ತು ಮುಶ್ಫಿಕರ್ ರೆಹಮಾನ್ ಅವರ ವಿಕೆಟ್ ಪಡೆದಿದ್ದಾರೆ. ಇನ್ನು 7 ಓವರ್ ಗಳನ್ನು ಎಸೆದಿರುವ ಹರ್ಭಜನ್ ಸಿಂಗ್ ಮಾಮಿನುಲ್ ಹಕ್ ಅವರ ವಿಕೆಟ್ ಪಡೆದಿದ್ದಾರೆ.

ಕೇವಲ 30.1 ಓವರ್ ಎದುರಿಸಿದ ಬಾಂಗ್ಲಾ ಪ್ರಮುಖ 3 ವಿಕೆಟ್​ ಕಳೆದುಕೊಂಡು 111 ರನ್ ಪೇರಿಸಿದೆ. ಅಲ್ಲದೆ ಇನ್ನೂ 351 ರನ್ ಗಳ ಹಿನ್ನಡೆಯಲ್ಲಿದೆ. ಆಕರ್ಷಕ ಅರ್ಧಶತಕ ಬಾರಿಸಿರುವ ಇಮ್ರುಲ್ ಕಯೇಸ್ ಹಾಗೂ ಖಾತೆ ತೆರೆಯದ ಆಲ್ರೌಂಡರ್ ಶಕೀಬ್ ಅಲ್ ಹಸನ್ ಅಂತಿಮ ದಿನಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ.

ಸಂಕ್ಷಿಪ್ತ ಸ್ಕೋರ್:
ಭಾರತ ಮೊದಲ ಇನ್ನಿಂಗ್ಸ್ 103.3 ಓವರ್ 462 ಕ್ಕೆ 6 ಡಿಕ್ಲೇರ್
ಶಿಖರ್ ಧವನ್ 173, ಮುರಳಿ ವಿಜಯ್ 150, ಅಜಿಂಕ್ಯ ರಹಾನೆ 98,

ಬೌಲಿಂಗ್
ಶಕೀಬ್ ಉಲ್ ಹಸನ್ 105ಕ್ಕೆ 4, ಜುಬೈರ್ ಹುಸೇನ್ 113 ಕ್ಕೆ 2

ಬಾಂಗ್ಲಾದೇಶ ಮೊದಲ ಇನ್ನಿಂಗ್ಸ್ 30.1 ಓವರ್ 111 ಕ್ಕೆ 3
ಇಮರುಲ್ ಕಯೇಸ್ ಅಜೇಯ 59*, ಮೋನಿಮುಲ್ ಹಕ್ 30

ಬೌಲಿಂಗ್
ಆರ್. ಅಶ್ವಿನ್ 30 ಕ್ಕೆ 2, ಹರಭಜನ್ ಸಿಂಗ್ 23 ಕ್ಕೆ 1