ಬೀಜಿಂಗ್: ಪ್ರಸಕ್ತ ಸಾಲಿನಲ್ಲಿ ಸಾಕಷ್ಟು ನಿರಾಸೆ ಅನುಭವಿಸಿರುವ ರಾಫೆಲ್ ನಡಾಲ್ ಅವರು ಚೀನಾ ಓಪನ್ ಟೆನಿಸ್ ಟೂರ್ನಿಯ ಎರಡನೇ ಸುತ್ತಿಗೆ ಲಗ್ಗೆ ಹಾಕಿದ್ದಾರೆ.
ಮಂಗಳವಾರ ನಡೆದ ಪುರುಷರ ಸಿಂಗಲ್ಸ್ ವಿಭಾಗದ ಮೊದಲ ಸುತ್ತಿನ ಪಂದ್ಯದಲ್ಲಿ 14ನ ಗ್ರಾಂಡ್‌ಸ್ಲಾಮ್ ಪ್ರಶಸ್ತಿ ವಿಜೇತ ನಡಾಲ್, ತಮ್ಮ ಪ್ರತಿಸ್ಪರ್ಧಿ ಸ್ಥಳೀಯ ಆಟಗಾರ ಡಿ ವು ವಿರುದ್ಧ ಗೆಲುವು ಸಾಧಿಸಿದರು.
1 ಗಂಟೆ 26 ನಿಮಿಷಗಳ ಕಾಲ ನಡೆದ ಪಂದ್ಯದಲ್ಲಿ ನಡಾಲ್ 6-4, 6-4 ಸೆಟ್‌ಗಳ ಮೂಲಕ ಜಯಿಸಿದರು. ಗ್ರಾಂಡ್ ಸ್ಲಾಮ್ ಟೂರ್ನಿಗಳಲ್ಲಿನ ನಿರಾಸೆಯನ್ನು ಮುಂದಿನ ತಿಂಗಳು ನಡೆಯಲಿರುವ ಎಟಿಪಿ ವಿಶ್ವ ಟೂರ್ ಫೈನಲ್ಸ್‌ನಲ್ಲಿ ಮೆರೆಯಲು ನಡಾಲ್ ಸಜ್ಜಾಗುತ್ತಿದ್ದಾರೆ.
ಜೊಕೊಗೆ ಜಯ: ವಿಶ್ವದ ನಂಬರ್ ಒನ್ ಆಟಗಾರ ನೊವಾಕ್ ಜೊಕೊವಿಚ್, ಚೀನಾ ಓಪನ್ ದ್ವಿತೀಯ ಸುತ್ತು ತಲುಪಿದ್ದಾರೆ. ಇಟಲಿಯ ಸಿಮೊನ್ ಬೊಲೆಲ್ಲಿ ವಿರುದ್ಧ ಸೆಣಸಿದ ಅವರು, 6-1,6-1 ಸೆಟ್‌ಗಳ ಅಂತರದಲ್ಲಿ ಜಯ ಸಾಧಿಸಿದರು. ಈ ಗೆಲುವಿನ ಮೂಲಕ ಸತತ 25 ಪಂದ್ಯಗಳಲ್ಲಿ ಜಯ ಕಂಡ ಸಾಧನೆ ಮಾಡಿದ್ದಾರೆ ವಿಶ್ವದ ನಂಬರ್ ಒನ್ ಆಟಗಾರ ಜೊಕೊವಿಚ್.
