ಕ್ರಿಕೆಟ್ ಬದುಕಿನಲ್ಲಿ 10 ಸಾವಿರ ರನ್ ಪೂರೈಸಿದ ಮೊಹಮ್ಮದ್ ಕೈಫ್ ಗೆ ಮಾಜಿ ಕ್ರಿಕೆಟಿಗ ವೀರೇಂದ್ರ ಸೆಹ್ವಾಗ್ ಶುಭಾಶಯ ತಿಳಿಸಿದ್ದಾರೆ.
ಪ್ರಸ್ತುತ ನಡೆಯುತ್ತಿರುವ ರಣಜಿ ಟ್ರೋಫಿಯ ಛತ್ತೀಸ್ಗಢ್ ತಂಡದ ನಾಯಕನಾಗಿರುವ ಮೊಹಮ್ಮದ್ ಕೈಫ್ 27 ರನ್ ಪೂರೈಸುವುದರೊಂದಿಗೆ 10 ಸಾವಿರ ರನ್ ಗಡಿ ದಾಟಿದರು. ಕೈಫ್ ರ ಈ ಸಾಧನೆಗೆ ಟ್ವೀಟರ್ ನಲ್ಲಿ ಅಭಿಮಾನಿಗಳಿಂದ ಶುಭಾಶಯದ ಮಹಾಪೂರವೇ ಹರಿದುಬರುತ್ತಿದ್ದು ಈ ನಡುವೆ ಸೆಹ್ವಾಗ್ ಕೂಡ ಮೊಹಮ್ಮದ್ ಕೈಫ್ ಗೆ ಶುಭಾಶಯ ತಿಳಿಸಿದ್ದಾರೆ.
ವೀರೇಂದ್ರ ಸೆಹ್ವಾಗ್ ತಮ್ಮ ಟ್ವೀಟ್ ನಲ್ಲಿ ಮೊಹಮ್ಮದ್ ಕೈಫ್ ಸಾಧನೆ ಕುರಿತಂತೆ ಪ್ರಥಮ ದರ್ಜೆಯಲ್ಲಿ 10 ಸಾವಿರ ರನ್ ಪೂರೈಸಿದ್ದೀರಾ. 9 ಸಾವಿರ ರನ್ ಓಡಿ ಓಡಿ ಕಲೆ ಹಾಕಿದ್ದೀರಾ, ಓಡುವುದು ನಿಮ್ಮ ಎರಡನೇ ನೆಚ್ಚಿನ ಆಟನಾ? ಎಂದು ಟ್ವೀಟಿಸಿದ್ದಾರೆ.
ಇದಕ್ಕೆ ಪ್ರತಿಯಾಗಿ ಮೊಹಮ್ಮದ್ ಕೈಫ್ ಸಹ ರಿಟ್ವೀಟ್ ಮಾಡಿದ್ದು, ಹ್ಹ ಹ್ಹ ಹ್ಹ, ಧನ್ಯವಾದಗಳು ವೀರು. ನಿಮ್ಮ ರೀತಿ ಸಿಕ್ಸರ್, ಬೌಂಡರಿ ಗಳಿಂದ ಶೇಕಡ 80 ರಷ್ಟು ರನ್ ಮಾಡುವುದು, ಅಥವಾ ಬೌಂಡರಿಗಳಿಂದಲೇ 300 ರನ್ ಸಿಡಿಸುವುದು ಯಾರಿಂದಲೂ ಸಾಧ್ಯವಿಲ್ಲ ಎಂದು ಟ್ವೀಟಿಸಿದ್ದಾರೆ.
