ಏಷ್ಯನ್ ಗೇಮ್ಸ್‌ 2018: 100 ಮೀ. ಓಟದಲ್ಲಿ ಬೆಳ್ಳಿ ಗೆದ್ದ ದ್ಯುತಿ ಚಾಂದ್

ಜಕಾರ್ತ: ಇಂಡೋನೇಷ್ಯಾದಲ್ಲಿ ನಡೆಯುತ್ತಿರುವ ಪ್ರತಿಷ್ಠಿತ ಏಷ್ಯನ್ ಗೇಮ್ಸ್ 2018 ಪಂದ್ಯಾವಳಿಯ ಎಂಟನೇ ದಿನವೂ ಭಾರತದ ಪದಕ ಬೇಟೆ ಮುಂದುವರೆದಿದ್ದು, ಭಾನುವಾರ ದೇಶದ ಉದಯೋನ್ಮುಖ ಓಟಗಾರ್ತಿ ದ್ಯುತಿ ಚಾಂದ್ ಮಹಿಳೆಯರ 100 ಮೀ. ಓಟದಲ್ಲಿ ಬೆಳ್ಳಿ ಪದಕ ಗೆದಿದ್ದಾರೆ. 

20 ವರ್ಷದಲ್ಲೇ ಇದು ಮಹಿಳೆಯರ 100 ಮೀ. ಓಟದಲ್ಲಿ ದೇಶಕ್ಕೆ ಮೊದಲ ಬೆಳ್ಳಿ ಪದಕವಾಗಿದ್ದು, 11.32 ಸೆಕೆಂಡ್‌ನಲ್ಲಿ ದ್ಯುತಿ ಗುರಿ ತಲುಪಿದ್ದಾರೆ. ದ್ಯುತಿ ಈ ಹಿಂದೆ 11.29 ಸೆಕೆಂಡ್‌ನಲ್ಲಿ ದಾಖಲೆ ಸ್ಥಾಪಿಸಿದ್ದರು. ಏಷ್ಯನ್‌ ಗೇಮ್ಸ್‌ ನಲ್ಲಿ 100 ಮೀ. ಡ್ಯಾಶ್ ಅತ್ಯಂತ ಪ್ರತಿಷ್ಟಿತ ಸ್ಪರ್ಧೆಯಾಗಿದ್ದು, ಭಾರಿ ಕುತೂಹಲ ಮೂಡಿಸಿದ್ದ ಈ ಪಂದ್ಯದಲ್ಲಿ ಭಾರತ ಬೆಳ್ಳಿ ಪದಕ ಗೆಲ್ಲುವಲ್ಲಿ ಯಶಸ್ವಿಯಾಗಿದೆ. 

ಇನ್ನು ಬಹ್ರೇನ್‌ ನ ಓಡಿಯಾಂಗ್ ಎಡಿಡಿಂಗ್ 11.30 ಸೆಕೆಂಡ್‌ ನಲ್ಲಿ ಗುರಿ ತಲುಪಿ ಚಿನ್ನ ತಮ್ಮದಾಗಿಸಿಕೊಂಡರೆ, ಚೀನಾದ ವೇ ಯೋಂಗ್ಲಿ 11.33 ಸೆಕೆಂಡ್‌ನಲ್ಲಿ ಓಟ ಪೂರ್ತಿಗೊಳಿಸಿ ಕಂಚು ತಮ್ಮದಾಗಿಸಿಕೊಂಡರು. ಏಷ್ಯನ್‌ ಗೇಮ್ಸ್‌ ನಲ್ಲಿ ಈ ಹಿಂದೆ 1998ರಲ್ಲಿ ರಚಿತಾ ಮಿಸ್ತ್ರಿ ಕಂಚಿನ ಪದಕ ಗಳಿಸಿದ್ದರು.