ಓದಿನಲ್ಲಿ ಆಸಕ್ತಿಯಿದ್ದ ಅಕ್ಕನ ಮಗಳನ್ನು ವಿವಾಹವಾದ ಅನಕ್ಷರಸ್ಥನೊಬ್ಬ, ತನ್ನ ಮಡದಿಯನ್ನು 'ಕೂಲಿನಾಲಿ' ಮಾಡಿ ಚೆನ್ನಾಗಿ ಓದಿಸಿದನು. ಚೆನ್ನಾಗಿ ಓದಿ ಸರ್ಕಾರಿ ಕೆಲಸ ಪಡೆದ ಯುವತಿ "ತನಗೆ ಸರಿಯಾದ ಜೋಡಿ ಇವನಲ್ಲ" ಎಂದು ಭಾವಿಸಿ ಅವನನ್ನು ಬಿಟ್ಟು ಹೋದಳು!
=
ಬಂದ ಬರಗಾಲಕ್ಕೆ ದೇವರ ಮುನಿಸೇ ಕಾರಣ ಎಂದು ಭಾವಿಸಿದ ಗ್ರಾಮಸ್ಥರು ಮರಗಳನ್ನು ಕಡಿದು ಸುಂದರ ದೇವಾಲಯವನ್ನು ಕಟ್ಟಿದರು!
=
ಯುವಕನಿಂದ ವಂಚನೆಗೊಳಗಾದ ಹುಡುಗಿಗೆ ನ್ಯಾಯ ಕೊಡಿಸಲು ಮಹಿಳೆಯೊಬ್ಬಳು ಹೋರಾಡಿ, ವಂಚಿತೆಗೆ ಹಣ ಕೊಡಿಸಿದಳು. ಅವಳಿಂದ ಕಮೀಷನ್ ರೂಪದಲ್ಲಿ ಪಾಲು ಪಡೆದಳು!
=
ಗೆಳೆಯರೊಂದಿಗೆ ಬಾಜಿ ಕಟ್ಟಿಕೊಂಡ ಯುವಕನೊಬ್ಬ ಕುರುಡನಂತೆ ನಟಿಸಿ ರಸ್ತೆಯನ್ನು ಸುಂದರ ತರುಣಿಯ ಸಹಾಯದಿಂದ ದಾಟಿದ. ಸತ್ಯ ತಿಳಿದ ತರುಣಿ ಕೆಲ ದಿನಗಳ ನಂತರ ರಸ್ತೆಯಲಿ ನೈಜ ಕುರುಡನೊಬ್ಬ ರಸ್ತೆ ದಾಟಿಸುವಂತೆ ಬೇಡಿಕೊಂಡರೂ ಸುಳ್ಳೆಂದು ಭಾವಿಸಿ ಹಾಗೆಯೇ ಹೋದಳು!
=
ಜನರಿಗೆ ಕುಡಿಯುವ ನೀರು ಇಲ್ಲದಂತಹ ಊರಿನಲ್ಲಿ ಗಣ್ಯರ ಪ್ರಭಾವದಿಂದ ಹೊಸದಾಗಿ ಬಾರೊಂದು
ಆರಂಭವಾಗಿತ್ತು!
=
ಅದುವರೆಗೂ ತಲೆನೋವು ಅಂದ್ರೇನೇ ತಿಳಿಯದ ವ್ಯಕ್ತಿಗೆ ಒಮ್ಮೆ ತಲೆನೋವು ಬಂತು. ಆ ದಿನ ಮನೆಯವರೆಲ್ಲಾ
ಅವನನ್ನು ಕೆಲಸಕ್ಕೆ ಕಳಿಸದೇ ಚೆನ್ನಾಗಿ ಆರೈಕೆ ಮಾಡಿದರು. ಅಂದಿನಿಂದ ಅವನಿಗೆ ಆಗಾಗ್ಗೆ ತಲೆ ನೋವು
ಬರತೊಡಗಿತು!
= ಬಸವನಗೌಡ ಹೆಬ್ಬಳಗೆರೆ
ಚನ್ನಗಿರಿ
